Gardening Tips: ४-५ दिवस बाहेरगावी जायचंय? झाडं सुकण्याची चिंता सोडा, हे ५ सोपे जुगाड करा ट्राय

तुम्ही ४-५ दिवसांसाठी घराबाहेर जात आहात का? मग झाडं सुकतील याची काळजी करू नका. बॉटल ड्रिप, विक सिस्टीम आणि मिनी ग्रीनहाऊससारखे ५ सोपे जुगाड वापरून तुम्ही तुमची झाडं हिरवीगार ठेवू शकता, तेही कोणाच्याही मदतीशिवाय.

घराबाहेर जायचं म्हटलं की सगळ्यात आधी टेंशन येतं ते झाडांना पाणी कोण देणार? बाजारात महागडी मशीन्स मिळतात, पण कोणताही खर्च न करता काही सोपे घरगुती उपाय तुमची ही चिंता दूर करू शकतात. या साध्या ट्रिक्स वापरून तुम्ही झाडांना सुकण्यापासून वाचवू शकता. चला तर मग, पाहूया ४ ते ५ दिवस झाडांना पाणी देण्यासाठी कोणते जुगाड करता येतील.

धाग्याच्या मदतीने झाडांना पाणी द्या

झाडांना पाणी देण्यासाठी तुम्ही एखादा जाड सुती धागा किंवा कापडाची पट्टी वापरू शकता. एका भांड्यात पाणी भरून त्यात धाग्याचं एक टोक बुडवा. दुसरं टोक कुंडीतील मातीत खोचून ठेवा. यामुळे झाडाला हळूहळू ओलावा मिळत राहील आणि ते सुकणार नाही.

ट्रे ट्रिकने झाडांमध्ये ओलावा टिकवा

झाडांना पाणी देण्याचा दुसरा सोपा उपाय म्हणजे ट्रे ट्रिक. एका मोठ्या ट्रे किंवा टबमध्ये थोडं पाणी भरा आणि त्यात कुंड्या ठेवा. असं केल्याने कुंडीच्या खालच्या छिद्रातून (ड्रेनेज होल) झाडाला गरजेनुसार पाणी मिळत राहील आणि झाडं सुकणार नाहीत.

झाडांना प्लास्टिकने कव्हर करा

तुम्ही जर चार-पाच दिवसांसाठी बाहेर जात असाल, तर तुमची झाडं एका मोठ्या प्लास्टिक पिशवीने कव्हर करा. यामुळे झाडांमधील ओलावा टिकून राहतो आणि ती लवकर सुकत नाहीत. यासाठी तुम्हाला वेगळं पाणी देण्याची गरज भासणार नाही.

बर्फाच्या तुकड्यांचा वापर करा

जर तुम्ही कुंडीतील मातीवर बर्फाचे चार-पाच तुकडे ठेवले, तर तो हळूहळू वितळेल आणि झाडाला ओलावा मिळत राहील. यामुळे झाड ताजंतवानं राहील आणि सुकणार नाही.

प्लास्टिक बॉटल आणि सुईचा जुगाड

तुमच्या घरात सुई (needle) किंवा सिरिंज असेल, तर त्याचा वापर करूनही तुम्ही झाडं सुकण्यापासून वाचवू शकता. यासाठी एका प्लास्टिक बॉटलमध्ये पाणी भरा. आता बॉटलच्या झाकणाला एक बारीक छिद्र पाडून त्यात सिरिंजची सुई बसवा. या सुईमधून थेंब-थेंब पाणी जमिनीत टपकत राहील.