Northeast Trip: गर्दी नको, फक्त शांतता हवीये? मग उन्हाळ्याच्या सुट्टीत या 5 ठिकाणी नक्की जा

उन्हाळ्याच्या सुट्टीत शिमला-मनालीच्या गर्दीला कंटाळला असाल, तर नॉर्थ-ईस्ट इंडिया तुमच्यासाठी बेस्ट ऑप्शन आहे. तवांग, जुलुक, हाफलोंग, झिरो आणि युक्सोम यांसारखी शांत ठिकाणं तुम्हाला एक वेगळाच अनुभव देतील.

उन्हाळ्याची सुट्टी म्हटलं की सगळ्यांना आठवतात शिमला आणि मनाली. पण तिथे होणारी प्रचंड गर्दी, ट्रॅफिक आणि महागडी हॉटेल्स अनेकदा आपल्या ट्रिपची सगळी मजा घालवतात. जर तुम्ही यावर्षी शांत, हिरवीगार, थंड हवेची आणि कमी गर्दीची जागा शोधत असाल, तर नॉर्थ-ईस्ट इंडिया तुमच्यासाठी एक जबरदस्त पर्याय ठरू शकतो. इथली सुंदर दरी, ढगांनी झाकलेले डोंगर, धबधबे आणि शांत वातावरण म्हणजे एखाद्या स्वप्नासारखंच आहे. चला, नॉर्थ-ईस्टच्या अशा 5 थंड ठिकाणांबद्दल जाणून घेऊया, जिथे तुम्ही गर्दीपासून दूर शांतपणे सुट्टी घालवू शकता.

तवांग

अरुणाचल प्रदेशमधलं तवांग त्याच्या थंड हवामानासाठी आणि नैसर्गिक सौंदर्यासाठी खूप प्रसिद्ध आहे. समुद्रसपाटीपासून सुमारे 10 हजार फूट उंचीवर असलेलं हे ठिकाण उन्हाळ्यातही थंडगार असतं. इथले बर्फाच्छादित डोंगर, सुंदर तलाव आणि शांत वातावरण पर्यटकांना आकर्षित करतं. जर तुम्हाला गर्दीपासून दूर निसर्गाच्या सानिध्यात वेळ घालवायचा असेल, तर तवांग एक उत्तम पर्याय आहे.

जुलुक

सिक्कीममधलं एक छोटंसं गाव म्हणजे जुलुक. हे ठिकाण अजूनही अनेक पर्यटकांच्या नजरेपासून दूर आहे. इथले वळणावळणाचे रस्ते, ढगांनी झाकलेले डोंगर आणि थंडगार हवा याला खास बनवतात. ज्यांना 'इन्स्टाग्राम'च्या गर्दीपासून दूर शांत ठिकाणी सुट्टी घालवायची आहे, त्यांच्यासाठी जुलुक परफेक्ट आहे. सूर्योदयाच्या वेळी इथलं दृश्य खूपच सुंदर दिसतं.

हाफलोंग

जर तुम्ही आसामला फिरायला जाण्याचा प्लान करत असाल, तर तुमच्या लिस्टमध्ये हाफलोंग नक्की ठेवा. याला आसामचं एकमेव हिल स्टेशन म्हटलं जातं. चारही बाजूंना पसरलेली हिरवळ, तलाव आणि शांत वातावरणामुळे हे ठिकाण फॅमिली ट्रिपसाठी एकदम बेस्ट आहे. इथे उन्हाळ्यात हवामान खूप छान असतं आणि गर्दीही तुलनेने कमी असते.

झिरो

झिरो व्हॅली तिच्या हिरव्यागार निसर्गासाठी, भाताच्या शेतीसाठी आणि शांत वातावरणासाठी ओळखली जाते. निसर्गप्रेमी आणि फोटोग्राफीची आवड असणाऱ्यांमध्ये हे ठिकाण खूप लोकप्रिय होत आहे. इथली शुद्ध हवा आणि थंड हवामान उन्हाळ्यात आराम देतं. जर तुम्हाला एक शांत ट्रिप हवी असेल, तर झिरो तुमच्यासाठी एक उत्तम पर्याय असू शकतो.

युक्सोम

पश्चिम सिक्कीममध्ये असलेलं युक्सोम त्या प्रवाशांसाठी खास आहे, ज्यांना साहसासोबतच शांतताही हवी आहे. हे ठिकाण हिरवळ, डोंगराळ पायवाटा आणि शांत वातावरणासाठी ओळखलं जातं. इथून अनेक ट्रेकिंग रूट्ससुद्धा सुरू होतात. गर्दीपासून दूर वेळ घालवण्यासाठी हे एक उत्तम डेस्टिनेशन मानलं जातं.