Seed Oil: केमिकलला मारा फुली, केसांसाठी वापरा 'या' 5 बियांचं तेल, केस होतील शायनी आणि हेल्दी!

Seed Oil महागडे हेअर सीरम वापरण्याऐवजी केसांवर नैसर्गिक चमक आणायची आहे का? केस चमकदार बनवण्यासाठी घरगुती उपाय शोधत आहात? फ्रिझी आणि डॅमेज झालेल्या केसांची समस्या दूर करण्याचे सोपे मार्ग कोणते आहेत? चला जाणून घेऊया.

आपली धावपळीची जीवनशैली आणि जंक फूड खाण्याच्या सवयींचा परिणाम फक्त शरीरावर किंवा चेहऱ्यावरच नाही, तर केसांवरही होतो. अनेकदा केस लांब आणि दाट असूनही निर्जीव आणि कोरडे दिसतात. केसांना शायनी बनवण्यासाठी लोक वेगवेगळ्या प्रकारचे सीरम, हेअर ग्रोथ क्रीम, शॅम्पू आणि इतर अनेक हेअर प्रोडक्ट्सवर पाण्यासारखा पैसा खर्च करतात. तुम्हीही आतापर्यंत हजारो रुपये खर्च करून थकला असाल आणि काहीच परिणाम मिळाला नसेल, तर आता घरातील गोष्टींनी केसांवर उपचार करण्याची वेळ आली आहे. आज आम्ही तुमच्यासाठी अशा 5 बियांच्या तेलांची (Seed Hair Oil) माहिती घेऊन आलो आहोत, जे तुम्हाला काळे, दाट आणि चमकदार केस देऊ शकतात.

ॲबिसिनियन सीड ऑइल (Abyssinian Seed Oil)

सिलिकॉन असलेले हेअर ऑइल केसांना तात्पुरती चमक नक्की देतात, पण सततच्या वापरामुळे केसांवर त्याचा एक थर जमा होतो. यामुळे केस आणखी कोरडे आणि निर्जीव वाटू लागतात. अशावेळी तुम्ही ॲबिसिनियन सीड ऑइल वापरू शकता, जे केसांना नैसर्गिक चमक देतं. विशेष म्हणजे, हे तेल लावल्यावर केस जड वाटत नाहीत आणि केसांचा विस्कटलेपणा (frizz) कमी करण्यासही मदत करतं.

ब्रोकोली सीड ऑइल (Broccoli Seed Oil)

केस धुतल्यानंतर आणि हेअर क्रीम वापरल्यानंतरही तुमचे केस कोरडे आणि निर्जीव दिसत असतील, तर तुमच्या हेअर केअर रुटीनमध्ये बदल करण्याची वेळ आली आहे. आठवड्यातून दोनदा ब्रोकोली सीड ऑइल लावून पाहा. याला 'नॅचरल सिलिकॉन' असंही म्हणतात, जे केस मुलायम बनवण्यासोबतच त्यांचा विस्कटलेपणाही दूर करतं. केसांना जास्त चमक आणि मऊपणा हवा असेल, तर हा एक उत्तम पर्याय आहे.

प्रॉक्सी ऑइल (Proxy Oil)

ज्यांचे केस खूप जास्त खराब किंवा डॅमेज झाले आहेत, त्यांच्यासाठी प्रॉक्सी ऑइल (Proxy Afghan Oil) सर्वोत्तम आहे. यामध्ये असलेले फॅटी ॲसिड केसांमधील नैसर्गिक केराटिनला वाढवतं, ज्यामुळे केस गुंतत नाहीत आणि एकसारखे दिसतात. हे तेल तुम्ही ऑनलाइन किंवा ऑफलाइन सहज खरेदी करू शकता.

प्लम कर्नल ऑइल (Plum Kernel Oil)

जर तुमच्या केसांमध्ये व्हॉल्यूम (volume) कमी असेल आणि तेल लावल्यावर ते अगदीच पातळ वाटत असतील, तर तुम्ही प्लम कर्नल ऑइलचा पर्याय निवडू शकता. हे तेल वजनाने खूप हलकं आहे आणि केसांना नैसर्गिक चमक देतं. हे तेल आळुबुखारच्या बियांपासून बनवलं जातं. यात असलेले व्हिटॅमिन ई आणि ओलिक ॲसिड नैसर्गिकरित्या केसांवर उपचार करतात.

करंज ऑइल (Karanj Oil)

पोंगामिया पिन्नाटा (Pongamia pinnata) म्हणजेच करंजाच्या बियांपासून काढलेलं करंज तेल हे एक नैसर्गिक वनस्पती तेल आहे. यात कडुलिंबाच्या तेलापेक्षाही जास्त औषधी गुणधर्म आढळतात. हे तेल केस आणि स्काल्प (टाळू) या दोन्हींसाठी उत्तम आहे. जर तुम्हाला केसांमध्ये कोंडा होण्याची समस्या असेल, तर हे तेल नक्की निवडा. तसेच, हे तेल सूर्याच्या हानिकारक किरणांपासून होणारं नुकसान टाळण्यासाठी केसांचं संरक्षणही करतं.

बियांचं तेल कसं वापरायचं?

• आठवड्यातून दोनदा केस धुवा.
• ओल्या केसांवर तेलाचे ३-४ थेंब लावा.
• टाळूपेक्षा केसांच्या लांबीवर आणि टोकांवर जास्त लक्ष द्या.
• खूप जास्त तेल लावू नका.
• आठवड्यातून दोनदा याचा वापर करा.