Balcony Cleaning: बाल्कनी साफ करणं झालं एकदम सोपं! या १० टिप्समुळे तुमचा वेळ आणि मेहनत दोन्ही वाचेल

तुमच्या बाल्कनी-गार्डनची साफसफाई करायला खूप वेळ लागतो का? मग या १० स्मार्ट क्लिनिंग टिप्स नक्की वाचा. यामुळे तुमची मेहनत कमी होईल आणि वेळही वाचेल. तुम्हीही घर हिरवंगार ठेवण्यासाठी या टिप्स वापरू शकता.

Balcony Cleaning Hacks: झाडं लावणं जितकं सोपं आहे, तितकंच त्यांची साफसफाई करणं अवघड. अनेकदा तर साफसफाईत २-३ तास सहज निघून जातात. जर तुम्हालाही तुमचा वेळ वाचवायचा असेल, तर काही सोप्या ट्रिक्स वापरता येतील. यामुळे तुमचं काम सोपं होईल आणि मेहनतही निम्मी होईल. आज आम्ही अशा १० टिप्स सांगणार आहोत, ज्या तुमच्या बाल्कनीपासून गार्डनपर्यंत सगळं काही स्वच्छ ठेवण्यास मदत करतील.

झाडं स्टँडवर ठेवा

जर तुम्ही झाडं थेट जमिनीवर ठेवली, तर कुंडीच्या खाली-मागे साफ करणं अवघड होतं. त्यामुळे झाडं नेहमी स्टँड किंवा प्लांटर्समध्ये ठेवा. यामुळे रोजच्या साफसफाईत तो भागही स्वच्छ करता येतो आणि त्यासाठी वेगळी मेहनत घ्यावी लागत नाही.

कुंड्यांसाठी डार्क रंग निवडा

कुंड्या मातीच्या असोत किंवा दुसऱ्या कोणत्याही मटेरियलच्या, त्यांच्यासाठी फिकट (लाईट) रंग निवडू नका. अशा रंगांवर धूळ आणि माती लवकर दिसते. त्याऐवजी तुम्ही काळा, ब्राऊन असे डार्क रंग निवडू शकता. यावर माती कमी दिसते आणि त्या लवकर खराब झाल्यासारख्या वाटत नाहीत.

हवामानानुसार बदल करा

तुमच्या बाल्कनीत छोटी रोपं किंवा हर्ब्स असतील, तर हवामानानुसार त्यांची जागा बदला. उन्हाळ्यात आणि वादळ-वाऱ्यात ती तुटून पडू शकतात. त्यांना अशा ठिकाणी ठेवा जिथे हलका सूर्यप्रकाश येईल आणि त्यांचं नुकसान होणार नाही.

सामानासाठी वेगळा बॉक्स बनवा

आपण जसं घरात औषधांचा किंवा सुई-दोऱ्याचा वेगळा डबा ठेवतो, तसंच बागकामाच्या सामानासाठी (Gardening Tools) एक वेगळा बॉक्स तयार करा. म्हणजे गरजेच्या वेळी सामान पटकन मिळेल आणि ते अस्ताव्यस्त पडून खराबही होणार नाही.

बाल्कनीसाठी वेगळ्या चपला ठेवा

बाहेरच्या चपला घालून घरात आलात, तर घरभर घाण होणारच. त्यामुळे बागकामासाठी वेगळ्या चपला ठेवा. यामुळे घरात माती येणार नाही आणि तुम्हाला साफसफाई कमी करावी लागेल. घरात लहान मुलं असतील आणि ती बाल्कनीत खेळत असतील, तर तिथे एक पायपुसणं (फुटमॅट) नक्की ठेवा. यामुळे जास्त घाण पसरणार नाही.

पाणी देताना काळजी घ्या

अनेकजण झाडांना खूप वेगाने किंवा जास्त दाबाने पाणी देतात. यामुळे कुंडीतली माती बाहेर येते आणि आपलं काम वाढतं. त्याऐवजी झाडांना हळूवारपणे पाणी घाला, म्हणजे माती कुंडीतच राहील. आजूबाजूला पाणी साचत असेल, तर ते लगेच काढून टाका.

सुकलेली पानं आणि तण लगेच काढा

तुम्ही जर १-२ महिन्यांतून एकदा गार्डन साफ करत असाल, तर तसं करू नका. त्याऐवजी दर ५-१० दिवसांनी कुंड्यांच्या आजूबाजूला किंवा भिंतींवर उगवलेली नको असलेली रोपं (तण) काढत राहा. सुकलेली पानं दिसल्यास तीसुद्धा लगेच साफ करा. यामुळे कमी मेहनतीत तुमचं गार्डन स्वच्छ आणि निरोगी राहील.

खूप जास्त झाडं लावू नका

बाल्कनीत गरजेपेक्षा आणि तुमच्या क्षमतेपेक्षा जास्त झाडं लावली, तर पसारा वाढतो. जर तुम्हाला त्यांची काळजी घेणं अवघड जात असेल, तर ती झाडं कोणालातरी गिफ्ट करणं जास्त चांगलं. तुम्ही तेवढीच झाडं लावा, जेवढ्यांची तुम्ही नीट काळजी घेऊ शकता.

पेंटिंग आणि देखभालीकडे लक्ष द्या

भिंती आणि कुंड्यांना वेळोवेळी पेंट करत राहा. यामुळे जागा नवीन आणि स्वच्छ दिसते. शिवाय कीटक आणि लहान जीवजंतूही कमी येतात.

बाल्कनीतच स्टोरेजची सोय करा

बागकामाशी संबंधित सामान ठेवण्यासाठी झाडांच्या जवळच एक स्टोरेजची जागा बनवा. म्हणजे गरजेच्या वेळी सामान पटकन मिळेल. यामुळे घर आणि बाल्कनी दोन्ही ठिकाणी पसारा होणार नाही.