Sehwag Ashwin Controvercy : कॉमेंट्रीत सेहवागची अश्विनवर टोलेबाजी, चाहते म्हणाले 'अति झालं!'

Virender Sehwag Faces Fan Backlash : भारताचा माजी सलामीवीर वीरेंद्र सेहवाग आयपीएल २०२६ च्या पहिल्या सामन्यादरम्यान केलेल्या कॉमेंट्रीमुळे चांगलाच वादात सापडला आहे. 

Virender Sehwag Faces Fan Backlash : भारताचा माजी धडाकेबाज सलामीवीर वीरेंद्र सेहवाग सध्या चाहत्यांच्या निशाण्यावर आला आहे. शनिवारी, २९ मार्च रोजी बंगळुरूमध्ये रॉयल चॅलेंजर्स बंगळुरू आणि सनरायझर्स हैदराबाद यांच्यात झालेल्या आयपीएल २०२६ च्या सलामीच्या सामन्यात कॉमेंट्री करताना त्याने आपला माजी सहकारी रविचंद्रन अश्विनची खिल्ली उडवली, ज्यामुळे त्याच्यावर जोरदार टीका होत आहे.

आयपीएल २०२६ च्या अधिकृत प्रसारकांसाठी वीरेंद्र सेहवाग हिंदी कॉमेंट्री पॅनलचा भाग होता. त्याच्यासोबत माजी क्रिकेटपटू आकाश चोप्रा आणि रविचंद्रन अश्विनही कॉमेंट्रीसाठी सामील झाले होते. डिसेंबर २०२४ मध्ये आंतरराष्ट्रीय क्रिकेटमधून निवृत्ती घेतलेल्या अश्विनचा आयपीएल २०२६ च्या या पहिल्या सामन्यातून कॉमेंट्रीमध्ये पदार्पण झालं.

या आयपीएल हंगामासाठी वीरेंद्र सेहवाग, आकाश चोप्रा, रविचंद्रन अश्विन यांच्यासह सुरेश रैना आणि नवज्योत सिंग सिद्धू हे हिंदी कॉमेंट्री पॅनलमध्ये आहेत, ज्यामुळे प्रेक्षकांना तज्ज्ञांचे विश्लेषण आणि मनोरंजक गप्पांची मेजवानी मिळत आहे.

सेहवागने घेतली अश्विनची फिरकी

कॉमेंट्री दरम्यान, एकेकाळचे टीम इंडियाचे सहकारी असलेले वीरेंद्र सेहवाग आणि रविचंद्रन अश्विन यांच्यात हलकीफुलकी पण टोलेबाजी झाली. मात्र, सेहवागने अश्विनवर केलेल्या काही टिप्पण्यांनी चाहते आणि क्रिकेटप्रेमींचं लक्ष वेधून घेतलं. आंतरराष्ट्रीय क्रिकेटमधून निवृत्तीनंतर पहिल्यांदाच कॉमेंट्री करणाऱ्या अश्विनची सेहवागने चांगलीच फिरकी घेतली.

स्टार स्पोर्ट्सने आपल्या एक्स (पूर्वीचे ट्विटर) हँडलवर पोस्ट केलेल्या व्हिडिओमध्ये, सेहवागने अश्विनला 'ये नयी मुर्गी है' असं म्हटलं. कॉमेंट्री बॉक्समध्ये अश्विन नवा असल्यामुळे तो दबावाखाली आहे, असं त्याला सुचवायचं होतं.

त्यानंतर, सेहवागने ड्रेसिंग रूममधील एक जुनी आठवण सांगितली, ज्यात अश्विन अनेक ओव्हर्स विकेट न मिळाल्याने वैतागून एका स्पिनरवर हल्ला करण्याच्या प्रयत्नात कसा आऊट झाला होता, याचा किस्सा सांगितला.

एका दुसऱ्या प्रसंगात, जेव्हा अश्विन आरसीबी आणि एसआरएच सामन्याबद्दल आपलं मत मांडण्याचा प्रयत्न करत होता, तेव्हा सेहवाग त्याला वारंवार मध्येच अडवत होता. सेहवागने अश्विनला गमतीने सल्ला दिला की, 'इथे जास्त विचार करून बोलू नकोस, थेट मनापासून बोल'. त्याचा रोख असा होता की अश्विनने प्रत्येक गोष्टीचं जास्त विश्लेषण करण्याऐवजी स्वाभाविकपणे कॉमेंट्री करावी.

वीरेंद्र सेहवाग आणि रविचंद्रन अश्विन २०१० ते २०१७ पर्यंत तब्बल सात वर्षे एकत्र ड्रेसिंग रूम शेअर करत होते. त्यामुळे कॉमेंट्री दरम्यान सेहवागने केलेली ही टोलेबाजी त्यांच्या जुन्या मैत्री आणि विनोदी स्वभावाला दर्शवणारी होती.

अश्विनची खिल्ली उडवल्याने सेहवागवर टीका

जरी वीरेंद्र सेहवागने केलेली ही मस्करी मैत्रीच्या नात्याने हलकीफुलकी असली, तरी सोशल मीडियावर, विशेषतः एक्सवर (पूर्वीचे ट्विटर) चाहते आणि क्रिकेटप्रेमींनी सेहवागला चांगलंच धारेवर धरलं आहे.

चाहत्यांनी आपल्या एक्स हँडलवरून सेहवागवर टीका केली आहे. कॉमेंट्रीमध्ये अश्विनला वारंवार अडवणे, त्याच्यावर वर्चस्व गाजवणे आणि त्याच्या कॉमेंट्री पदार्पणाच्या दिवशी असे विनोद करणे हे अनादर करणारे होते, असं मत अनेकांनी व्यक्त केलं आहे.

दरम्यान, या सामन्यात रॉयल चॅलेंजर्स बंगळुरूने सनरायझर्स हैदराबादवर सहा विकेट्सने विजय मिळवत आपल्या आयपीएल विजेतेपदाच्या मोहिमेची शानदार सुरुवात केली. २०२ धावांच्या लक्ष्याचा पाठलाग करताना आरसीबीने हे लक्ष्य फक्त १५.४ षटकांत, म्हणजेच २६ चेंडू राखून पूर्ण केले. आयपीएलच्या इतिहासातील हा सर्वात वेगवान २००+ धावांचा यशस्वी पाठलाग ठरला.

विराट कोहलीने १८१.५८ च्या स्ट्राइक रेटने नाबाद ६९ धावांची खेळी केली, ज्यात ५ चौकार आणि तितकेच षटकार होते. देवदत्त पडिक्कलसोबत (२६ चेंडूत ६१ धावा) दुसऱ्या विकेटसाठी १०१ धावांची आणि कर्णधार रजत पाटीदारसोबत (१२ चेंडूत ३१ धावा) तिसऱ्या विकेटसाठी ५३ धावांची भागीदारी करून त्याने आरसीबीच्या विजयाचा पाया रचला.