Virat Kohli ने मोडला Sachin Tendulkar चा विक्रम, बांगलादेशचा शाकिब अल हसन तिसऱ्या क्रमांकावर!

Virat Kohli Breaks Sachin Tendulkars Record : आंतरराष्ट्रीय क्रिकेटमध्ये सर्वाधिक मालिकावीर पुरस्कार जिंकण्याचा विक्रम विराट कोहलीने आपल्या नावावर केला आहे.

Virat Kohli Breaks Sachin Tendulkars Record : आंतरराष्ट्रीय क्रिकेटमध्ये सर्वाधिक मालिकावीर पुरस्कार मिळवणारा खेळाडू म्हणून विराट कोहलीने आपले नाव कोरले आहे. दक्षिण आफ्रिकेविरुद्ध मालिकावीर ठरल्याने कोहलीने सचिन तेंडुलकरला मागे टाकले. कोहलीच्या नावावर आता 20 पुरस्कार आहेत. क्रिकेटचा देव सचिन 19 पुरस्कारांसह दुसऱ्या स्थानावर आहे. बांगलादेशचा शाकिब अल हसन तिसऱ्या क्रमांकावर असून, त्याने 17 वेळा मालिकावीर पुरस्कार जिंकला आहे.

दक्षिण आफ्रिकेचा माजी अष्टपैलू खेळाडू जॅक कॅलिस चौथ्या स्थानावर आहे. त्याच्या नावावर 14 पुरस्कार आहेत. श्रीलंकेचा माजी कर्णधार सनथ जयसूर्या आणि ऑस्ट्रेलियाचा माजी सलामीवीर डेव्हिड वॉर्नर पाचव्या आणि सहाव्या स्थानावर आहेत. दोघांच्याही नावावर प्रत्येकी 13 पुरस्कार आहेत. फक्त एकदिवसीय सामन्यांचा विचार केल्यास सचिन आघाडीवर आहे. सचिनने 14 मालिकावीर पुरस्कार जिंकले आहेत. जयसूर्या आणि कोहली प्रत्येकी 11 पुरस्कारांसह दुसऱ्या स्थानावर आहेत. वेस्ट इंडिजचा माजी खेळाडू ख्रिस गेल आणि दक्षिण आफ्रिकेचा माजी वेगवान गोलंदाज शॉन पोलॉक प्रत्येकी आठ पुरस्कारांसह पुढील स्थानांवर आहेत.

दरम्यान, दक्षिण आफ्रिकेविरुद्धच्या तिसऱ्या एकदिवसीय सामन्यात रोहित शर्मानेही एक महत्त्वाचा टप्पा गाठला. या सामन्यात 27 धावा करताच रोहितने आंतरराष्ट्रीय क्रिकेटमध्ये 20,000 धावांचा टप्पा ओलांडला. सचिन तेंडुलकर (34357), विराट कोहली (27910) आणि राहुल द्रविड (24208) यांच्यानंतर ही कामगिरी करणारा रोहित चौथा भारतीय खेळाडू ठरला आहे. तसेच, आंतरराष्ट्रीय क्रिकेटमध्ये 20,000 धावा पूर्ण करणारा तो जगातील तेरावा खेळाडू आहे.

दक्षिण आफ्रिकेविरुद्धच्या तिसऱ्या एकदिवसीय सामन्यापूर्वी रोहितला 20,000 धावा पूर्ण करण्यासाठी 27 धावांची गरज होती. रोहितने कसोटी, एकदिवसीय आणि T20 अशा 504 सामन्यांमध्ये 20,000 आंतरराष्ट्रीय धावा केल्या आहेत. 38 वर्षीय रोहित एकदिवसीय क्रिकेटमध्ये किती काळ खेळेल याबद्दल शंका असतानाच त्याने हा विक्रम केला आहे. रोहितच्या 20,000 धावांपैकी 11,500 हून अधिक धावा एकदिवसीय सामन्यांतील आहेत. त्याने कसोटीत 4301 आणि T20 मध्ये 4231 धावा केल्या आहेत.