मुंबईच्या पराभवानंतर रोहितचा मोठा निर्णय, मुश्ताक अली T20 क्रिकेटमध्ये परतणार!

Rohit Sharma To Play Mushtaq Ali Trophy : गेल्या वर्षी दक्षिण आफ्रिकेला हरवून भारताने T20 विश्वचषक जिंकल्यानंतर रोहितने T20 क्रिकेटमधून निवृत्ती घेतली होती. आता रोहित शर्मा मुंबईच्या T20 संघात परतणार आहे

Rohit Sharma To Play Mushtaq Ali Trophy : मुश्ताक अली T20 ट्रॉफीमध्ये केरळकडून मुंबईचा धक्कादायक पराभव झाल्यानंतर, माजी कर्णधार रोहित शर्मा मुंबईच्या T20 संघात परतणार आहे. मुश्ताक अली T20 ट्रॉफीच्या उपांत्यपूर्व फेरीपासून मुंबईकडून खेळण्यास तयार असल्याचे रोहितने मुंबई क्रिकेट असोसिएशनला कळवले आहे, असे वृत्त आहे.

गेल्या वर्षी दक्षिण आफ्रिकेला हरवून भारताने T20 विश्वचषक जिंकल्यानंतर रोहितने T20 क्रिकेटमधून निवृत्ती घेतली होती. गेल्या आयपीएलमध्ये तो मुंबई इंडियन्सकडून खेळला, पण अनेक सामन्यांमध्ये ३८ वर्षीय रोहित इम्पॅक्ट प्लेअर म्हणून खेळला. दक्षिण आफ्रिकेविरुद्धच्या तिसऱ्या एकदिवसीय सामन्यानंतर मुश्ताक अली ट्रॉफीच्या नॉकआऊट सामन्यांमध्ये खेळण्यास तयार असल्याचे रोहितने मुंबई क्रिकेट असोसिएशनला कळवले आहे. या महिन्याच्या १२ ते १८ तारखेदरम्यान मुश्ताक अली ट्रॉफीचे नॉकआऊट सामने होणार आहेत. भारतीय T20 संघाचा कर्णधार सूर्यकुमार यादव T20 मालिकेसाठी गेल्यावर रोहित शर्मा मुंबई संघात परतण्याची शक्यता आहे.

टेस्ट आणि T20 मधून निवृत्त झाल्यामुळे, एकदिवसीय संघात स्थान मिळवण्यासाठी देशांतर्गत स्पर्धांमध्ये खेळून फिटनेस सिद्ध करावा लागेल, असे भारतीय संघ व्यवस्थापनाने रोहित आणि विराट कोहलीला सांगितले होते. त्यानंतर दोघांनीही विजय हजारे ट्रॉफी एकदिवसीय स्पर्धेत खेळण्याची तयारी दर्शवली होती. यानंतर आता रोहितने एक पाऊल पुढे टाकत मुश्ताक अली ट्रॉफीमध्येही मुंबईकडून खेळण्याची इच्छा व्यक्त केली आहे.

आज झालेल्या मुश्ताक अली ट्रॉफीच्या सामन्यात मुंबईचा केरळविरुद्ध १५ धावांनी नाट्यमय पराभव झाला. १७९ धावांच्या लक्ष्याचा पाठलाग करताना मुंबईने १७ षटकांत ४ बाद १४८ धावा केल्या होत्या आणि ते मजबूत स्थितीत होते. शेवटच्या तीन षटकांत विजयासाठी फक्त ३१ धावांची गरज होती आणि ६ विकेट्स शिल्लक होत्या. पण, फक्त ५ धावांत ४ विकेट्स गमावल्यामुळे मुंबईचा संघ १६३ धावांवर सर्वबाद झाला आणि त्यांना धक्कादायक पराभव पत्करावा लागला. पराभव होऊनही, ५ सामन्यांत ४ विजय आणि १६ गुणांसह मुंबई एलिट ग्रुप ए मध्ये अव्वल स्थानी आहे. केरळ तिसऱ्या स्थानी आहे.