Vaibhav Suryavanshi ODI records : टीम इंडियाचा युवा खेळाडू वैभव सूर्यवंशी युथ वनडेमध्ये धुमाकूळ घालत आहे. त्याने शुभमन गिल आणि उन्मुक्त चंद यांचे विक्रम मोडून नवा इतिहास रचला आहे. वयाच्या अवघ्या 14 व्या वर्षी तो उत्कृष्ट फॉर्ममध्ये आहे.
क्रिकेट विश्वाला हादरा, वैभव सूर्यवंशीचा नवा विक्रम
भारतीय क्रिकेटच्या इतिहासात एका नव्या अध्यायाची सुरुवात झाली आहे. अवघ्या 14 व्या वर्षी विक्रमांवर विक्रम रचत युवा फलंदाज वैभव सूर्यवंशीने क्रिकेट चाहत्यांना चकित केले आहे. रविवारी झालेल्या अंडर-19 वर्ल्ड कप 2026 च्या महत्त्वाच्या सामन्यात पाकिस्तानविरुद्ध चमकदार खेळी करून वैभवने भारताचे स्टार खेळाडू शुभमन गिल आणि उन्मुक्त चंद यांचे मोठे विक्रम मोडले.
26
गिल आणि उन्मुक्त यांचे विक्रम मोडणारा वैभव
पाकिस्तानविरुद्धच्या सामन्यात वैभव सूर्यवंशीने 22 चेंडूत 30 धावा केल्या. यात पाच चौकार आणि एका षटकाराचा समावेश आहे. या खेळीत त्याचा स्ट्राइक रेट 136.36 होता. या छोट्या खेळीनेच वैभवने युथ वनडे क्रिकेटमध्ये सर्वाधिक धावा करणाऱ्या भारतीय खेळाडूंच्या यादीत शुभमन गिल आणि उन्मुक्त चंद यांना मागे टाकले. गिल आणि चंद दोघांनीही आपल्या युथ वनडे कारकिर्दीत प्रत्येकी 1149 धावा केल्या होत्या, तर वैभवने आता तो टप्पा ओलांडला आहे.
36
उत्कृष्ट फलंदाजीने वैभव सूर्यवंशीचा जलवा
वैभव सूर्यवंशीने आतापर्यंत 23 युथ वनडे सामन्यांमध्ये 50.82 च्या सरासरीने 1169 धावा केल्या आहेत. यात 3 शतके आणि 6 अर्धशतकांचा समावेश आहे. युथ वनडेमधील त्याची सर्वोच्च धावसंख्या 171 आहे. भारतीय युथ वनडे इतिहासात सर्वाधिक धावा करणाऱ्या टॉप-4 फलंदाजांमध्ये वैभवने स्थान मिळवले आहे. सध्या विजय झोल (1404), यशस्वी जैस्वाल (1386) आणि तन्मय श्रीवास्तव (1316) हेच त्याच्या पुढे आहेत.
वैभवने केवळ अंडर-19 स्तरावरच नाही, तर जगातील सर्वात श्रीमंत लीग असलेल्या आयपीएलमध्येही आपली छाप पाडली आहे. 28 एप्रिल 2025 रोजी गुजरात टायटन्सविरुद्धच्या सामन्यात त्याने फक्त 35 चेंडूंमध्ये शतक झळकावून आयपीएल इतिहासातील सर्वात वेगवान शतक करणारा भारतीय फलंदाज म्हणून विक्रम केला. आयपीएल 2025 च्या मेगा लिलावात राजस्थान रॉयल्सने या युवा खेळाडूला 1.10 कोटी रुपयांना विकत घेतले. अगदी लहान वयात आयपीएलमध्ये पदार्पण करून त्याने सर्वांचे लक्ष वेधून घेतले आहे.
56
बिहार ते भारतीय संघ, वैभव सूर्यवंशीचा अद्भुत प्रवास
वैभव सूर्यवंशीचा जन्म 27 मार्च 2011 रोजी बिहारच्या समस्तीपूर जिल्ह्यातील ताजपूर गावात झाला. विशेष म्हणजे, भारताने दुसऱ्यांदा वनडे वर्ल्ड कप जिंकण्याच्या काही दिवस आधीच त्याचा जन्म झाला. त्याचे वडील संजीव सूर्यवंशी हे देखील माजी क्रिकेटपटू आहेत. वैभव डावखुरा फलंदाज आणि डावखुरा ऑर्थोडॉक्स फिरकीपटू आहे. 2024 मध्ये, वयाच्या अवघ्या 12 व्या वर्षी, त्याने बिहारकडून रणजी ट्रॉफीमध्ये प्रथम श्रेणी पदार्पण करून इतिहास रचला. वेस्ट इंडिजचा दिग्गज ब्रायन लाराला आपला आदर्श मानणारा वैभव, भारताचा माजी सलामीवीर वसीम जाफरकडून नेहमी सल्ला घेतो.
66
टीम इंडियात वैभव सूर्यवंशीची एन्ट्री कधी?
वैभवची कामगिरी पाहता तो लवकरच टीम इंडियाच्या वरिष्ठ संघात पदार्पण करेल, असे विश्लेषकांचे मत आहे. वयाच्या 14 व्या वर्षी अंडर-19 वर्ल्ड कप आणि आयपीएलमध्ये अशा प्रकारची स्फोटक खेळी करणे ही सामान्य गोष्ट नाही. त्याच्या तुफानी फलंदाजीच्या शैलीसोबतच गोलंदाजीतही तो चमकत आहे, जो त्याच्यासाठी एक मोठा प्लस पॉइंट आहे. लवकरच तो भारतीय राष्ट्रीय वरिष्ठ संघात सामील झाल्यास आश्चर्य वाटायला नको.
