Vaibhav Sooryavanshi: 'इथं खूप थंडीये, गरम पाणीच पी', न्यूझीलंडमध्ये वैभवला मिळालं आईसारखं प्रेम

न्यूझीलंड दौऱ्यावर असलेल्या टीम इंडियाचा युवा स्टार वैभव सूर्यवंशीने तिसऱ्या टी-२० मॅचमध्ये तुफान बॅटिंग केली. त्याच्या या खेळीने फॅन्सची मनं जिंकली आहेत. पण सामन्यानंतर एका महिला फॅनने त्याला दिलेला आईसारखा सल्ला सध्या सोशल मीडियावर चांगलाच व्हायरल होतोय.

वेलिंग्टनमध्ये भारत आणि न्यूझीलंड (New Zealand vs India) यांच्यात तिसरी टी-२० मॅच झाली. या सामन्यानंतर भारतीय क्रिकेटचा वंडर बॉय वैभव सूर्यवंशी याला एका महिला फॅनने अगदी आईसारखा सल्ला दिला. या मॅचमध्ये ओपनिंगला येत त्याने फक्त १९ बॉलमध्ये ४५ रन्स ठोकले. टीम इंडियाने मॅच आणि सिरीज जिंकल्यानंतर वैभव फॅन्सना ऑटोग्राफ देत होता. तेव्हा एक महिला पुढे आली आणि म्हणाली, 'वैभव, हॅलो वैभव! आम्ही पण बलियाचेच आहोत. इथं खूप थंडी आहे, त्यामुळे थंड पाणी पिऊ नकोस, पाणी गरम करूनच पी.' बलियाचं नाव ऐकून वैभवच्या चेहऱ्यावर हसू आलं. त्यानेही हसत 'ठीक आहे, अच्छा' असं उत्तर दिलं.

वैभवला मिळाला आईसारखा सल्ला

भारतीय क्रिकेट टीम जगात कुठेही खेळायला गेली, तरी तिथे त्यांना सपोर्ट करायला फॅन्सची गर्दी असतेच. न्यूझीलंडचा दौरा (India tour of New Zealand 2026) सुद्धा याला अपवाद नाही. सध्या सुरू असलेल्या टी-२० सिरीजमध्ये टीम इंडियाला चीअर करण्यासाठी अनेक फॅन्स स्टेडियममध्ये येत आहेत. मॅच संपल्यावर खेळाडू आणि फॅन्स यांच्यातल्या गप्पा अनेकदा चर्चेचा विषय ठरतात. यातच आता वैभवच्या या महिला फॅनने दिलेल्या सल्ल्याने सगळ्यांचं लक्ष वेधून घेतलंय. परदेशात आपल्याच भागातल्या एका युवा खेळाडूला असा काळजीपोटी सल्ला देण्याचा हा व्हिडिओ नेटकऱ्यांची मनं जिंकतोय. सोशल मीडियावर हा व्हिडिओ व्हायरल झाल्यावर अनेक लोक या महिलेच्या आपुलकीचं कौतुक करत आहेत.

हेलो वैभव, हम लोग भी बलिया से हैं, ठीक हो, गर्म पानी पियो ठंडा पानी मत पीना क्योंकि यहां पर ठंड है अभी

न्यूज़ीलैंड में उत्तर प्रदेश वाले बिहारी को बोल रहे हैं हेलो वैभव हम लोग भी बलिया से हैं। #VaibhavSooryavanshi #INDvsNZ https://t.co/9JLx0GO7ZI

— Sadan Singh (@SadanJee) October 27, 2026

वैभवची तुफानी बॅटिंग

न्यूझीलंडविरुद्धच्या तिसऱ्या टी-२० मॅचमध्ये अभिषेक शर्मासोबत ओपनिंगला येत वैभवने ७.१ ओव्हर्समध्ये १३३ रन्सची पार्टनरशिप केली. या युवा खेळाडूने आपल्या खेळीत ४ फोर आणि ४ सिक्स मारले. या ओपनिंग जोडीने अवघ्या पाच ओव्हर्समध्ये टीम इंडियाचा स्कोर १०० च्या पार नेला. पॉवर प्लेमध्ये भारताने एकही विकेट न गमावता ११८ रन्स कुटले. आयसीसीच्या पूर्ण सदस्य देशांपैकी कोणत्याही टी-२० मॅचच्या पॉवर प्लेमध्ये एवढे रन्स करणारी टीम इंडिया पहिलीच टीम ठरली आहे. १९९ रन्सचं टार्गेट भारताने फक्त १३.२ ओव्हर्समध्येच पूर्ण करत दणदणीत विजय मिळवला.