Asia Cup U19: आर्यवीर सेहवागची 'कोहली स्टाईल', ठोकली 160 धावांची वादळी खेळी

आशिया कप 2026 मध्ये भारताच्या अंडर-19 संघाने यूएईविरुद्ध जबरदस्त खेळ केला. वीरेंद्र सेहवागचा मुलगा आर्यवीर सेहवागने शानदार 160 धावांची खेळी केली. वडील आणि विराट कोहली यांच्यापासून प्रेरणा घेतलेल्या आर्यवीरच्या या खेळीमुळे भारताने 310 धावांचे मोठे लक्ष्य दिले.

भारताचा माजी सलामीवीर वीरेंद्र सेहवागचा मुलगा आर्यवीरने क्रिकेटच्या मोठ्या मंचावर शानदार एन्ट्री घेतली आहे. मंगळवारी, 10 नोव्हेंबर रोजी ओमानमधील अल अमेरत क्रिकेट ग्राउंडवर भारताच्या अंडर-19 आशिया कप 2026 च्या सामन्यात यूएई विरुद्ध त्याने दमदार शतक झळकावले.

यूएईचा कर्णधार अयान मिस्बाहने नाणेफेक जिंकून भारताला प्रथम फलंदाजीचे आमंत्रण दिले. सुरुवातीला खेळपट्टीवर वेगवान गोलंदाजांना मदत मिळत होती, पण भारताने यूएईच्या अनुभवहीन गोलंदाजीचा फायदा घेतला. कर्णधार लक्ष्य राजेश रायचंदानी 17 धावांवर बाद झाल्यावर भारताची धावसंख्या 62/1 होती. पण त्यानंतर सलामीवीर आर्यवीर सेहवाग आणि व्हीके विनीत यांनी भारताचा डाव सावरला.

आर्यवीर आणि विनीतने दुसऱ्या विकेटसाठी 193 धावांची जबरदस्त भागीदारी केली. त्यांनी यूएईच्या गोलंदाजांवर हल्लाबोल करत उत्तम स्ट्राइक रोटेशन आणि आक्रमक फटकेबाजीचा नजराणा पेश केला.

आर्यवीर सेहवागने झळकावले शानदार शतक

अल अमेरत ग्राउंडवर जेव्हा भारत अंडर-19 संघ यूएई विरुद्ध फलंदाजीला उतरला, तेव्हा सर्वांच्या नजरा आर्यवीर सेहवाग आणि माजी भारतीय कर्णधार राहुल द्रविडचा मुलगा अन्वय द्रविडवर होत्या. या स्पर्धेतील पहिल्या दोन सामन्यांमध्ये 70* आणि 22 धावा करणाऱ्या आर्यवीरने चाहत्यांची निराशा केली नाही.

हदयातउल्लाहच्या सुरुवातीच्या स्विंग गोलंदाजीवर आर्यवीरने खातं उघडण्यासाठी 14 चेंडू घेतले. पण एकदा सेट झाल्यावर त्याने आपल्या वडिलांसारखीच आक्रमक फलंदाजी सुरु केली. 19 वर्षीय आर्यवीरने 69 चेंडूत आपलं दुसरं अर्धशतक पूर्ण केलं आणि त्यानंतर वेगाने धावा करत 131 चेंडूत आपलं पहिलं यूथ वनडे शतक पूर्ण केलं.

130 चेंडूत 99 धावांवर खेळताना आर्यवीरने बिला खानच्या चेंडूवर एक धाव घेत आपलं शतक साजरं केलं. 37 व्या षटकात सेहवागने डावखुरा फिरकीपटू उद्दिश सुरीवर जोरदार हल्ला करत दोन षटकार आणि दोन चौकार मारले. 42 व्या षटकात त्याने 150 धावांचा टप्पा ओलांडला.

AARYAVIR SEHWAG SMASHED AN ASTONISHING 160 (168) IN THE ASIA CUP. https://t.co/PFV4xfutrn

— Mufaddal Vohra (@mufaddal_vohra) November 10, 2026

आर्यवीर सेहवागची फटकेबाजी यूएईच्या गोलंदाजांसाठी मोठी डोकेदुखी ठरत होती. अखेर नसीम खानने सेहवागला 160 धावांवर बाद करत भारताला 255/2 वर दुसरा धक्का दिला. यासोबतच दोन्ही सलामीवीरांमधील 193 धावांची मोठी भागीदारी संपुष्टात आली.

आर्यवीर सेहवागच्या या शानदार खेळीत 17 चौकार आणि 7 षटकारांचा समावेश होता. त्याने 95.24 च्या स्ट्राईक रेटने धावा करत संयम आणि आक्रमकतेचा उत्तम मेळ साधला.

‘फक्त सेहवाग स्टाईल नाही, कोहली स्टाईल पण’

आर्यवीर सेहवागच्या 160 धावांच्या खेळीची चर्चा होत असतानाच, स्पर्धेपूर्वीचा त्याचा एक इंटरव्ह्यू सोशल मीडियावर व्हायरल झाला आहे. यात त्याने सांगितलं की, वडिलांसारखा आक्रमक खेळ त्याला आवडतो, पण त्याच्या खेळावर आधुनिक क्रिकेटचा किंग विराट कोहलीचा पण प्रभाव आहे.

"नाही सर, 100%. मला आक्रमक खेळायला आवडतं. मी विराट कोहलीचा खूप मोठा फॅन आहे आणि मला माझं क्रिकेट आक्रमकपणे खेळायला आवडतं. फक्त सेहवाग स्टाईल नाही, तर कोहली स्टाईलने पण, कारण मी त्याचा खूप मोठा फॅन आहे," असं आर्यवीर या व्हायरल व्हिडिओमध्ये म्हणाला.

“आणि हो, मला आमच्या विरोधात येणाऱ्या प्रत्येक संघावर वर्चस्व गाजवायला आवडेल. देशासाठी जास्तीत जास्त योगदान देण्याचा आणि भारताला सामने जिंकवून देण्याचा माझा प्रयत्न असेल," असंही तो पुढे म्हणाला.

Aaryavir Sehwag : "I don't want to only play the Sehwag way, I want to play the Kohli way". https://t.co/xobgdEnDPL

— Nikhil. (@ishowwhyrat) November 10, 2026

या सामन्यात भारत अंडर-19 संघाने 309/7 अशी मोठी धावसंख्या उभारली आणि यूएईला 310 धावांचे लक्ष्य दिले. मागील सामन्यात पाकिस्तानकडून पराभव पत्करल्यानंतर 'बॉइज इन ब्लू'ने दमदार कमबॅक करत ग्रुप ए च्या या सामन्यावर पूर्ण वर्चस्व मिळवले आहे.

अंडर-19 आशिया कप 2026 मध्ये आतापर्यंत सेहवागने तीन सामन्यांमध्ये 126.00 च्या सरासरीने 252 धावा केल्या आहेत, ज्यामध्ये एक शतक आणि एका अर्धशतकाचा समावेश आहे.