Shubman Gill Breaks 46-Year Gavaskar Record in England : शुबमन गिलचा ऐतिहासिक पराक्रम! गावस्कर, द्रविड, सचिन यांच्यावर मात करत इंग्लंडमध्ये ठरला 'सर्वश्रेष्ठ'

Shubman Gill Breaks 46-Year Gavaskar Record in England : शुबमन गिलने इंग्लंडविरुद्धच्या दुसऱ्या कसोटीत २६९ धावांची खेळी करत सुनील गावस्कर यांचा ४६ वर्षांपूर्वीचा विक्रम मोडला. गिलने कसोटी कारकिर्दीतील पहिले द्विशतक झळकावत अनेक विक्रम आपल्या नावे केले

बर्मिंगहॅम : भारतीय संघाचा युवा कर्णधार शुबमन गिल याने इंग्लंडमध्ये खेळल्या गेलेल्या दुसऱ्या कसोटी सामन्यात विक्रमी द्विशतक झळकावत भारतीय क्रिकेटच्या इतिहासात नवा अध्याय लिहिला आहे. गिलने या शानदार खेळीत तब्बल २६९ धावा करत ४६ वर्षांपूर्वीचा सुनील गावस्कर यांचा ऐतिहासिक विक्रम मोडला आहे.

४६ वर्षांपूर्वीचा गावस्कर यांचा ‘महाविक्रम’ अखेर मोडला

1979 मध्ये द ओव्हलवर सुनील गावस्कर यांनी झळकावलेल्या 221 धावांचा विक्रम आजवर कोणालाही मोडता आलेला नव्हता. मात्र, शुबमन गिलने इंग्लिश गोलंदाजांची धुलाई करत 269 धावांची ऐतिहासिक खेळी साकारली आणि गावस्कर, द्रविड (217), सचिन (193), शास्त्री (187) यांच्यासारख्या दिग्गजांनाही मागे टाकले.

‘कॅप्टन गिल’चे कसोटीत पहिले द्विशतक

या सामन्यात शुबमन गिलने कसोटी कारकिर्दीत पहिल्यांदाच 200+ धावा करत कर्णधार म्हणूनही एक विशेष विक्रम आपल्या नावे केला. तो इंग्लंडमध्ये कसोटी सामन्यात द्विशतक करणारा केवळ तिसरा भारतीय कर्णधार ठरला आहे.

तसेच, 25 वर्षे 298 दिवसांचे असताना हे द्विशतक झळकावून, गिलने ‘कसोटीमध्ये द्विशतक करणाऱ्या सर्वात तरुण भारतीय कर्णधारांपैकी एक’ म्हणून स्वतःचे स्थान निश्चित केले आहे. याआधी हे यश मन्सूर अली खान पतौडी (वय 23) यांनी मिळवले होते.

SENA देशांतील ऐतिहासिक विक्रम

SENA म्हणजेच दक्षिण आफ्रिका, इंग्लंड, न्यूझीलंड आणि ऑस्ट्रेलिया या देशांमध्ये कसोटी क्रिकेटमध्ये द्विशतक करणारा गिल पहिला आशियाई कर्णधार ठरला आहे. या आधी श्रीलंकेच्या तिलकरत्ने दिलशान यांनी 193 धावा केल्या होत्या.

सामन्यात अन्य खेळाडूंचे योगदान

गिलने यशस्वी जयस्वाल, ऋषभ पंत आणि रवींद्र जडेजा यांच्यासोबत महत्वाच्या भागीदाऱ्या केल्या. विशेषतः, जडेजासोबतच्या सहाव्या विकेटसाठी 203 धावांची भागीदारी सामन्याचा टर्निंग पॉईंट ठरली.

शुबमन गिलची ही खेळी फक्त एक विक्रम नाही, तर भारतीय क्रिकेटसाठी प्रेरणादायी क्षण आहे. त्याने सिद्ध केले की, युवा पिढीही इतिहास घडवू शकते. आता गिलकडे पाहिले जातेय एक दीर्घकाळचा कसोटी कर्णधार म्हणून.