Ravindra Jadeja : रवींद्र जडेजाचा रेकॉर्ड, ४,००० धावा आणि ३५० विकेट्स...कपिल देव यांच्यासोबत एलिट क्लबमध्ये सामील

Ravindra Jadeja Recoed : रवींद्र जडेजाने कसोटीत ४,००० धावा आणि ३५० बळी घेणारा तो कपिल देव यांच्यानंतरचा दुसरा भारतीय आणि जगातील केवळ चौथा अष्टपैलू खेळाडू ठरला आहे.

गॉल : भारतीय ऑलराऊंडर रवींद्र जडेजाने टेस्ट क्रिकेटमध्ये एक मोठा विक्रम केला आहे. श्रीलंकेविरुद्धच्या गॉल (Galle) टेस्टच्या तिसऱ्या दिवशी त्याने ३५० विकेट्सचा टप्पा पार केला. यासोबतच त्याने माजी कर्णधार कपिल देव यांच्या एका खास क्लबमध्ये जागा मिळवली आहे. टेस्ट क्रिकेटमध्ये ४,००० धावा आणि ३५० विकेट्स घेणारा तो दुसरा भारतीय आणि जगातला फक्त चौथा ऑलराऊंडर ठरला आहे.

याआधी कोणी - कोणी केलाय हा रेकॉर्ड?

याआधी हा पराक्रम कपिल देव (५,२४८ धावा, ४३४ विकेट्स), इंग्लंडचे इयान बॉथम (५,२०० धावा, ३८३ विकेट्स) आणि न्यूझीलंडचे डॅनियल व्हिटोरी (४,५३१ धावा, ३६२ विकेट्स) यांनी केला आहे. श्रीलंकेविरुद्धच्या टेस्टला सुरुवात होण्यापूर्वी जडेजाच्या नावावर ८९ टेस्टमध्ये ४,०९५ धावा आणि ३४८ विकेट्स होत्या.

जडेजाने श्रीलंकेचा कर्णधार धनंजय डी सिल्वाला स्लिपमध्ये के. एल. राहुलकरवी झेलबाद करून भारताला महत्त्वाची विकेट मिळवून दिली. त्यानंतर केसर नुवान्थला बाद करून त्याने टेस्ट क्रिकेटमध्ये ३५० विकेट्सचा ऐतिहासिक टप्पा गाठला. अनिल कुंबळे, रविचंद्रन अश्विन, कपिल देव आणि हरभजन सिंग यांच्यानंतर टेस्टमध्ये ३५० विकेट्स पूर्ण करणारा जडेजा पाचवा भारतीय गोलंदाज आहे.

Ravindra Jadeja finds the perfect length, gets it to grip and beat the Lankan skipper all ends up. 🕸️

Watch #SLvIND, 1st Test, LIVE NOW on Sony Sports Network TV channels & Sony LIV.#SonySportsNetwork #SonyLIV #BeautifulGameOfTestCricket pic.twitter.com/PKINskBUoN

— Sony Sports Network (@SonySportsNetwk) August 17, 2026

टेस्ट क्रिकेटच्या इतिहासात सर्वाधिक विकेट्स घेणाऱ्या डावखुऱ्या स्पिनर्सच्या यादीत जडेजा आता तिसऱ्या स्थानावर आहे. त्याच्या पुढे श्रीलंकेचा रंगना हेराथ (४३३) आणि न्यूझीलंडचा डॅनियल व्हिटोरी (३६२) आहेत. या सामन्यात देवदत्त पडिक्कलच्या शतकाच्या (१६७) जोरावर भारताने पहिल्या डावात ४६२ धावा केल्या होत्या. तिसऱ्या दिवशी भारताने श्रीलंकेचा डाव २८४ धावांवर संपवला आणि पहिल्या डावात १७८ धावांची महत्त्वाची आघाडी घेतली.