वैभव सुर्यवंशीला सुपर ओव्हरमध्ये न पाठवण्यावर जितेश शर्मा याने अखेर गुपित सांगितले!

Why Vaibhav Suryavanshi Did Not Bat In Super Over : सुपर ओव्हरमध्ये वैभव सूर्यवंशीला सलामीवीर म्हणून न पाठवण्याचा निर्णय अंतिम होता आणि त्याची संपूर्ण जबाबदारी मी घेतो, असे कर्णधार जितेश शर्माने स्पष्ट केले.

Why Vaibhav Suryavanshi Did Not Bat In Super Over : रायझिंग स्टार्स आशिया कपच्या उपांत्य फेरीत बांगलादेश ए विरुद्ध वैभव सूर्यवंशीला सुपर ओव्हरसाठी न पाठवण्यामागचे कारण भारतीय कर्णधार जितेश शर्माने स्पष्ट केले आहे. दोहामध्ये बांगलादेशकडून सुपर ओव्हरमध्ये पराभूत झाल्यानंतर भारत ए संघ स्पर्धेतून बाहेर पडला. नाणेफेक हारल्यानंतर प्रथम फलंदाजी करताना बांगलादेशने सहा गडी गमावून १९४ धावा केल्या होत्या. प्रत्युत्तरात भारतानेही सहा गडी गमावून तितक्याच धावा केल्या. त्यानंतर सामना सुपर ओव्हरमध्ये गेला.

सुपर ओव्हरमध्ये भारतासाठी पहिला चेंडू खेळताना जितेश शर्मा बोल्ड झाला. पुढच्याच चेंडूवर आशुतोष शर्माही बाद झाल्याने भारताला सुपर ओव्हरमध्ये एकही धाव करता आली नाही. सुयश शर्माच्या पहिल्या चेंडूवर यासिर अलीने षटकार मारण्याचा प्रयत्न केला, पण लाँग ऑनवर रमणदीप सिंगने त्याचा झेल घेतला. मात्र, पुढच्याच चेंडूवर बांगलादेशने विजय मिळवला. सुयशचा चेंडू वाइड ठरला आणि बांगलादेशने सामना जिंकला.

त्यानंतर जितेशने वैभवला न खेळवण्याबद्दल सांगितले. जितेश म्हणाला... '''संघामध्ये वैभव आणि प्रियांशू पॉवरप्लेमध्ये चांगले खेळतात. तर डेथ ओव्हर्समध्ये आशुतोष आणि रमणदीप चांगली कामगिरी करू शकतात. त्यामुळे सुपर ओव्हरची लाइनअप हा सांघिक निर्णय होता. अंतिम निर्णय मीच घेतला होता. मी त्याची पूर्ण जबाबदारी घेतो. एक वरिष्ठ खेळाडू म्हणून मी सामना संपवायला हवा होता,'' असे जितेश सामन्यानंतरच्या प्रेझेंटेशन सोहळ्यात म्हणाला.

याआधी भारताला चांगली सुरुवात मिळाली होती. वैभव सूर्यवंशी (१५ चेंडूंत ३८) आणि आर्य यांच्या जोडीने पहिल्या विकेटसाठी ५३ धावा जोडल्या. वैभव बाद झाल्यानंतर जितेश शर्मा (३३) आणि नेहल वढेरा (३२) यांनाच चांगली कामगिरी करता आली. नमन धीर (७), रमणदीप सिंग (१७) आणि आशुतोष शर्मा (१३) हे बाद झालेले इतर खेळाडू होते.