IND W vs PAK W: हरमनप्रीत ब्रिगेडचा जलवा! “छोरियां भी छोरों से कम नहीं” म्हणत भारताने पाकिस्तानची केली धुलाई

IND W vs PAK W: भारतीय महिला संघाने पाकिस्तानला पुन्हा एकदा धुळ चारली आहे. महिला एकदिवसीय विश्वचषक २०२५ च्या सहाव्या सामन्यात टीम इंडियाने ८८ धावांनी विजय मिळवला आहे. भारतीय संघाने या सामन्यात अष्टपैलू कामगिरी केली आहे. 

IND W vs PAK W Womens ODI World Cup 2025: भारतीय महिला संघाने १२व्यांदा पाकिस्तानला धूळ चारली आहे. महिला एकदिवसीय विश्वचषक २०२५ मध्ये टीम इंडियाने पाकिस्तानवर ८८ धावांनी मोठा विजय नोंदवला आहे. यासह हरमनप्रीत कौरच्या नेतृत्वाखालील भारतीय संघाला या स्पर्धेत सलग दुसरा विजय मिळाला आहे. श्रीलंकेनंतर आता भारतीय वाघिणींनी पाकिस्तानला चिरडले आहे. प्रथम फलंदाजी करताना भारताने २४८ धावांचे लक्ष्य ठेवले होते, ज्याला प्रत्युत्तर देताना पाकिस्तानचा संपूर्ण संघ १५९ धावांवर सर्वबाद झाला. दीप्ती शर्माने पुन्हा एकदा चेंडू आणि बॅटने कमाल केली आहे.

भारताने पाकिस्तानला २४८ धावांचे लक्ष्य दिले होते

कोलंबोमध्ये खेळल्या गेलेल्या या सामन्यात पाकिस्तानने नाणेफेक जिंकून भारताला प्रथम फलंदाजीसाठी आमंत्रित केले. प्रत्युत्तरात भारतीय संघाने ५० षटकांत १० गडी गमावून २४७ धावा केल्या. स्मृती मानधनाची बॅट पुन्हा एकदा शांत राहिली. ती अवघ्या २३ धावा करून बाद झाली. कर्णधार हरमनप्रीत कौरनेही विशेष काही केले नाही आणि १९ धावा करून पॅव्हेलियनमध्ये परतली. तिच्याशिवाय प्रतिका रावल ३१, जेमिमा रॉड्रिग्ज ३२, दीप्ती शर्मा २५, स्नेह राणा २०, एन चारिणी १ आणि क्रांती गौडने ८ धावांचे योगदान दिले. रेणुका सिंग ठाकूरला या सामन्यात खाते उघडता आले नाही, तर शेवटी रिचा घोषने २० चेंडूत तीन चौकार आणि दोन षटकारांच्या मदतीने ३५ धावांची नाबाद खेळी केली.

भारताविरुद्ध पाकिस्तानची गोलंदाजी कशी होती?

पाकिस्तानच्या सर्व गोलंदाजांनी चांगली गोलंदाजी केली. संघासाठी सर्वोत्तम कामगिरी डीयाना बेगने केली. तिने १० षटकांत ६९ धावा देत ४ बळी घेतले. सादिया इक्बालनेही १० षटकांत ४७ धावा देत दोन बळी घेतले. कर्णधार फातिमाने १० षटकांत ३८ धावा देत दोन बळी घेतले. तर, रमीम शमीम आणि नसरा संधू यांना प्रत्येकी एक-एक बळी मिळाला.

भारताविरुद्ध पाकिस्तानचा संघ किती धावा करू शकला?

भारतीय संघासमोर २४८ धावांच्या लक्ष्याचा पाठलाग करताना पाकिस्तानचा संपूर्ण संघ ४३ षटकांत १५९ धावांवर गारद झाला. संघाकडून सर्वाधिक ८१ धावा सिद्रा अमीनने केल्या. तिने आपल्या खेळीत ९ चौकार आणि १ षटकार लगावला. तिच्याशिवाय नतालिया परवेझने ३३, सिद्रा नवाज १४, डीयाना बेग ९, सदफ शमस ६, मुनीबा अली २, फातिमा सना २, आलिया रियाझ २, रमीन शमीम ०, नशरा संधू २* आणि सादिया इक्बालने ० धावा केल्या.

भारतीय गोलंदाजांनी पाकिस्तानविरुद्ध कहर केला

बॅटने जे काम अपूर्ण राहिले होते, ते टीम इंडियाच्या गोलंदाजांनी पूर्ण केले. चेंडूने सर्व गोलंदाजांनी अप्रतिम कामगिरी केली. संघाकडून क्रांती गौडने १० षटकांत २० धावा देत सर्वाधिक ३ बळी घेतले. दीप्ती शर्मानेही ९ षटकांत ४५ धावा देत ३ बळी घेतले. तिच्याशिवाय स्नेह राणालाही २ यश मिळाले. क्रांतीला तिच्या अप्रतिम गोलंदाजीमुळे 'प्लेअर ऑफ द मॅच'चा पुरस्कार मिळाला.