India vs Pakistan Asia Cup Final : आज भारत-पाकिस्तानमध्ये पुन्हा ऑपरेशन सिंदूर, भारत लोळवणार, की पाक वचपा काढणार?

India vs Pakistan Asia Cup Final : एकही सामना न गमावता सूर्यकुमार यादव आणि संघ विजेतेपदाच्या लढाईसाठी उतरत आहे. पाकिस्तान भारताकडून दोन सामन्यांत पराभूत झाला आहे. गट टप्प्यात सात विकेट्सनी आणि सुपर फोरमध्ये सहा विकेट्सनी पराभूत झाला आहे.

India vs Pakistan Asia Cup Final : आशिया कपमध्ये आज भारत-पाकिस्तान यांच्यात विजेतेपदासाठी लढत होणार आहे. दुबईत रात्री आठ वाजता अंतिम सामना सुरू होईल. या स्पर्धेत भारत आणि पाकिस्तान तिसऱ्यांदा आमनेसामने येत आहेत. हस्तांदोलनासाठीही तयार नसलेले शेजारी, मैदानापलीकडे जाणारी स्पर्धा आणि जिद्द, खंडातील चॅम्पियन बनण्यासाठी भारत आणि पाकिस्तान आमनेसामने येत असताना, चाहत्यांना एका रोमांचक लढतीची अपेक्षा आहे.

एकही सामना न गमावता सूर्यकुमार यादव आणि संघ विजेतेपदाच्या लढाईसाठी उतरत आहे. पाकिस्तान भारताकडून दोन सामन्यांत पराभूत झाला आहे. गट टप्प्यात सात विकेट्सनी आणि सुपर फोरमध्ये सहा विकेट्सनी पराभव पत्करावा लागला होता. सलमान अली आगा आणि त्याच्या संघाला आणखी एक पराभव परवडणारा नाही. आतापर्यंतच्या कामगिरीवरून पाकिस्तान भारताला मात देऊ शकणार नाही हे निश्चित आहे.

भारतासाठी आनंदाची बातमी

स्फोटक सुरुवात करणारा अभिषेक शर्मा दुखापतीतून सावरला ही भारतासाठी दिलासादायक बातमी आहे. अभिषेक आणि शुभमन गिल यांनी क्रीजवर जम बसवल्यास भारताचा विजयाचा मार्ग सोपा होईल. सूर्यकुमार यादव, तिलक वर्मा, संजू सॅमसन, शिवम दुबे यांना संधीचे सोने करावे लागेल. जसप्रीत बुमराहच्या वेगवान गोलंदाजीसोबत कुलदीप यादव, वरुण चक्रवर्ती आणि अक्षर पटेल यांची फिरकी सामन्याची दिशा आणि निकाल ठरवेल.

पाकिस्तानच्या अडचणी कायम

पाकिस्तानच्या संघात अडचणी वाढल्या आहेत. चार सामन्यांत शून्यावर बाद झालेला सईम अयूब आणि कर्णधार सलमान अली आगा यांच्यासह अनेक फलंदाज धावा काढण्यासाठी झगडत आहेत. गोलंदाजीलाही धार नाही. शाहीन शाह आफ्रिदीची गोलंदाजीच नव्हे, तर शेवटच्या षटकांमधील त्याचे मोठे फटकेही पाकिस्तानसाठी महत्त्वाचे ठरतील. आशिया कपच्या अंतिम फेरीत भारत आणि पाकिस्तान पहिल्यांदाच आमनेसामने येत आहेत. भारत सहाव्यांदा विजेतेपद पटकावण्याच्या प्रयत्नात आहे, तर पाकिस्तान दुसऱ्यांदा विजेतेपद मिळवण्यासाठी मैदानात उतरेल. टी-20 मधील आकडेवारी पाहता भारताचे पारडे जड आहे. पंधरा सामन्यांपैकी बारा सामन्यांत विजय मिळवला आहे. पाकिस्तान आता भारताचा प्रतिस्पर्धी राहिला नाही, असे सूर्यकुमार यादव म्हणण्यामागे हीच आकडेवारी आहे.