Hardik Pandya : 'श्रेयस माझा कर्णधार', पंजाब किंग्जमध्ये आल्यावर हार्दिक पंड्याची पहिली प्रतिक्रिया

मुंबई इंडियन्समधून पंजाब किंग्जमध्ये दाखल झाल्यानंतर हार्दिक पंड्याने पंजाबचा कर्णधार श्रेयस अय्यर आणि प्रशिक्षकांना पूर्ण पाठिंबा दिला आहे. दुसरीकडे, मुंबई इंडियन्सचा नवा कर्णधार कोण होणार, याकडे चाहत्यांचे लक्ष लागले आहे.

मोहाली : खेळाडूंच्या अदलाबदलीतून (ट्रेड) पंजाब किंग्जमध्ये दाखल झाल्यानंतर हार्दिक पंड्याने आपली भूमिका स्पष्ट केली आहे. हार्दिकने कर्णधार आणि प्रशिक्षकांना पूर्ण पाठिंबा जाहीर केला. दरम्यान, हार्दिकच्या जागी आता मुंबई इंडियन्सचा नवा कर्णधार कोण होणार, याची उत्सुकता चाहत्यांना लागून आहे. मुंबई इंडियन्सचा माजी कर्णधार हार्दिक पंड्या जेव्हा पंजाब किंग्जमध्ये आला, तेव्हा श्रेयस अय्यरच्या नेतृत्वाखालील या संघात त्याची भूमिका काय असेल, हे जाणून घेण्यासाठी चाहते उत्सुक होते.

अधिकृत घोषणेनंतर दिलेल्या पहिल्याच प्रतिक्रियेत हार्दिकने यावर स्पष्टीकरण दिले आहे. आपला पाठिंबा कर्णधार श्रेयस अय्यर, प्रशिक्षक रिकी पॉन्टिंग आणि पंजाब संघाला असेल, असे हार्दिकने आपल्या सोशल मीडिया पोस्टमध्ये म्हटले आहे. 'माझा कर्णधार, श्रेयस. माझा प्रशिक्षक, रिकी. माझी टीम, पंजाब.' असे हार्दिकने इन्स्टाग्रामवर लिहिले. ही एक प्रकारे जाहीर घोषणा होती की, तो श्रेयसच्या कर्णधारपदासाठी आव्हान उभे करणार नाही. मुंबई इंडियन्सच्या चार आयपीएल विजेतेपदात महत्त्वाची भूमिका बजावणाऱ्या हार्दिकने २०२२ मध्ये गुजरात टायटन्सचे नेतृत्व केले होते.

पहिल्याच हंगामात गुजरातला आयपीएल चॅम्पियन बनवण्याच्या दिमाखात हार्दिक मुंबई इंडियन्सचा कर्णधार म्हणून परतला होता. दीर्घकालीन योजनांचा भाग म्हणून रोहित शर्माच्या जागी हार्दिक संघाचे नेतृत्व करेल, अशी घोषणा मुंबई इंडियन्सच्या संघ व्यवस्थापनाने केली होती. मात्र, तिन्ही हंगामात मुंबईने सपशेल निराशा केल्याने हार्दिकला संघातील स्थानही गमवावे लागले. त्यामुळे आता मुंबई इंडियन्सचा नवा कर्णधार कोण होणार, याची चाहत्यांना उत्सुकता आहे.

रोहित शर्मा पुन्हा कर्णधार म्हणून परतणार असल्याची चर्चा जोरदार सुरू आहे. संघ व्यवस्थापन आणि रोहित शर्मा यांच्यात कर्णधारपद स्वीकारण्याबाबत सहमती झाल्याचे वृत्त आहे. तिलक वर्मा, सूर्यकुमार यादव आणि जसप्रीत बुमराह यांच्या नावांचाही विचार सुरू आहे. १६ डिसेंबर रोजी होणाऱ्या लिलावापूर्वी मुंबई आपला नवा कर्णधार जाहीर करण्याची शक्यता आहे.