रत्नागिरीची वेदा ठरतेय इंटरनेट सेन्सेशन, वय 1 वर्ष 9 महिने, 100 मीटर पोहून इंडिया बुक ऑफ रेकॉर्डममध्ये विक्रमाची नोंद!

One Year Old Veda Swims 100 Meters : रत्नागिरीच्या १ वर्ष ९ महिन्यांच्या वेदा परेशने १०० मीटर पोहून भारतातील सर्वात लहान जलतरणपटू होण्याचा विक्रम केला आहे. ११ महिन्यांच्या प्रशिक्षणानंतर या चिमुकलीने 'इंडिया बुक ऑफ रेकॉर्ड्स'मध्ये स्थान मिळवले.

One Year Old Veda Swims 100 Meters : वेदा परेशचे वय फक्त १ वर्ष आणि ९ महिने आहे. पण, रत्नागिरीच्या या चिमुकलीने १०० मीटर पोहून विक्रम केला आहे. ती भारतातील सर्वात लहान जलतरणपटू ठरली आहे. या कामगिरीमुळे वेदाने 'इंडिया बुक ऑफ रेकॉर्ड्स'मध्येही स्थान मिळवले आहे. २५ मीटर लांबीच्या पूलमध्ये चार लॅप्सचे अंतर वेदाने १० मिनिटे आणि ८ सेकंदात पूर्ण केले.

स्थानिक नगरपालिकेच्या स्विमिंग पूलमध्ये तिचा मोठा भाऊ सराव करत असताना वेदाचाही पोहण्याचा प्रवास सुरू झाला. प्रशिक्षक महेश मिळके आणि त्यांची पत्नी गौरी मिळके यांच्या देखरेखीखाली वयाच्या नवव्या महिन्यापासून तिने प्रशिक्षण सुरू केले. केवळ ११ महिन्यांच्या नियमित सरावाने तिने हे मोठे यश मिळवले आहे. सोशल मीडियावर शेअर केलेल्या व्हिडिओमध्ये वेदा आत्मविश्वासाने पाण्यात उडी मारताना आणि सहजतेने प्रत्येक लॅप पूर्ण करताना दिसत आहे.

वेदाच्या या कामगिरीबद्दल सोशल मीडियावर कौतुकाचा वर्षाव होत आहे. ही चिमुकली देशासाठी अभिमानास्पद असल्याचे अनेकांनी कमेंटमध्ये लिहिले आहे. कौशल्य, पाठिंबा आणि दृढनिश्चय एकत्र आल्यास वय कधीही अडथळा ठरत नाही, याची आठवण या मुलीच्या कामगिरीने करून दिली आहे, असे काहींनी म्हटले. या अविश्वसनीय कामगिरीमुळे वेदाने केवळ राष्ट्रीय विक्रमच केला नाही, तर ती अनेकांसाठी प्रेरणास्थान बनली आहे. प्रोत्साहन आणि नियमित सराव असेल तर काहीही अशक्य नाही, हे वेदाने सिद्ध केले आहे.