नवी मुंबईत झोपडीधारकांसाठी सुवर्णसंधी! ७२ हजार कुटुंबांना मिळणार हक्काचं घर; कोणाला मिळणार मोफत आणि कोणाला मोजावे लागणार पैसे?

Navi Mumbai slum housing scheme: नवी मुंबईतील बेलापूर मतदारसंघातील सुमारे ७२ हजार झोपडीधारक कुटुंबांना आता हक्काचे घर मिळणार आहे. सरकारच्या नव्या धोरणानुसार, २००० पूर्वीच्या रहिवाशांना मोफत, तर २०११ पर्यंतच्या रहिवाशांना सवलतीच्या दरात घर दिले जाईल. 

नवी मुंबईत झोपडीधारकांसाठी सुवर्णसंधी! ७२ हजार कुटुंबांना मिळणार हक्काचं घर

नवी मुंबई : झपाट्याने विकसित होणाऱ्या नवी मुंबई शहरात आता झोपडपट्टीमुक्त उपक्रमाला मोठी गती मिळणार आहे. बेलापूर मतदारसंघातील हजारो कुटुंबांचे स्वतःच्या पक्क्या घराचे स्वप्न आता प्रत्यक्षात येणार असून, सुमारे ७२ हजार नागरिकांना या महत्त्वाकांक्षी योजनेचा लाभ मिळणार आहे.

पात्रतेचे नवे निकष, कोणाला काय मिळणार?

राज्य सरकारने झोपडीधारकांसाठी दोन मुख्य श्रेणी निश्चित केल्या आहेत, त्या खालीलप्रमाणे

पूर्णपणे मोफत घर: ज्या झोपडीधारकांचे पुरावे सन २००० पूर्वीचे आहेत, त्यांना हक्काचे घर मोफत मालकी हक्काने दिले जाणार आहे.

सवलतीच्या दरात घर: जे नागरिक २००० ते २०११ या कालावधीत वास्तव्यास आले आहेत, त्यांना केवळ २.५ लाख रुपये भरून घराचा मालकी हक्क मिळवता येईल. 

आमदार मंदा म्हात्रे यांची पुढाकार आणि बैठकीतील निर्णय

गृहनिर्माण राज्यमंत्री पंकज भोयर यांच्या उपस्थितीत झालेल्या विशेष बैठकीत या प्रकल्पाचा आढावा घेण्यात आला. भाजप आमदार मंदा म्हात्रे यांनी या निर्णयाबाबत माहिती देताना सांगितले की, बेलापूर मतदारसंघातील ७२,६६५ कुटुंबांच्या आयुष्यात आता 'अच्छे दिन' येणार आहेत. 

महत्त्वाचे निर्देश

बायोमेट्रिक सर्वेक्षण: सर्व पात्र झोपडीधारकांचे बायोमेट्रिक आणि डीएसआर (DSR) तयार करण्याची प्रक्रिया तातडीने पूर्ण करण्याचे आदेश देण्यात आले आहेत.

तुर्भे पॅटर्न: तुर्भे येथील शिवाजी नगर भागात 'जीबीआर' प्रक्रिया आधीच सुरू झाली असून ती आता प्रगत टप्प्यावर पोहोचली आहे.

मार्गदर्शन मेळावा: या योजनेचा लाभ कसा घ्यावा, यासाठी लवकरच नागरिकांसाठी मोठा मार्गदर्शन मेळावा आयोजित केला जाणार आहे. 

कुठल्या भागातील नागरिकांना होणार लाभ?

या निर्णयाचा सर्वाधिक फायदा तुर्भे, नेरूळ आणि बेलापूर परिसरातील झोपडपट्ट्यांमध्ये राहणाऱ्या नागरिकांना होणार आहे. शहराच्या नियोजित विकासामध्ये या प्रकल्पामुळे नवी मुंबईचे रूप पालटणार असून नागरिकांचे जीवनमान उंचावण्यास मदत होणार आहे.