October Hit in Mumbai : ऑक्टोबरच्या उकाड्याने मुंबईकर हैराण; पुढील काही दिवस उष्णतेचा तडाखा कायम राहणार

मुंबईत ऑक्टोबरच्या सुरुवातीलाच उन्हाचा तडाखा वाढला आहे. कुलाब्यात शुक्रवारी 37.4°C कमाल तापमान नोंदवले गेले, जे सरासरीपेक्षा 5.6°C अधिक आहे.

मुंबई : मुंबईत ऑक्टोबरच्या सुरुवातीलाच उन्हाचा कडाका जाणवू लागला आहे. शुक्रवारी कुलाब्यात कमाल तापमान 37.4 अंश सेल्सिअस नोंदवण्यात आले. हे तापमान सरासरीपेक्षा तब्बल 5.6 अंशांनी अधिक झाले आहे. तर वर्ष 2013 नंतर दक्षिण मुंबईत ऑक्टोबर महिन्यात नोंदवलेले हे सर्वाधिक तापमान ठरले आहे. त्यातच वाढलेल्या आर्द्रतेमुळे मुंबईकरांच्या त्रासात आणखी भर पडली.

कुलाब्यात 37.4°C; सरासरीपेक्षा 5.6 अंश अधिक

भारतीय हवामान विभागाच्या (IMD) माहितीनुसार, शुक्रवारी दक्षिण मुंबई उपनगरांच्या तुलनेत अधिक उष्ण होती. कुलाबा हवामान केंद्रात दुपारचे कमाल तापमान 37.4°C नोंदवण्यात आले. ऑक्टोबर महिन्यात या हवामान केंद्रावर आतापर्यंतचे सर्वकालीन उच्च कमाल तापमान 39.5°C आहे. ते 22 ऑक्टोबर 1968 रोजी नोंदवले गेले होते.

पहाटेपासूनच उकाडा; किमान तापमानही अधिक

मुंबईत केवळ दिवसाचे तापमानच वाढले नाही, तर पहाटेच्या तापमानातही वाढ दिसून आली. शुक्रवारी सकाळी 5.30 वाजता कुलाब्यात 27.5°C किमान तापमान नोंदवले गेले. हे सरासरीपेक्षा 2.2°C अधिक होते. मुंबईचे बेसलाइन हवामान केंद्र मानल्या जाणाऱ्या सांताक्रूझ येथे कमाल तापमान 36.9°C नोंदवण्यात आले. हे तापमान सरासरीपेक्षा 4.6°C अधिक होते. मात्र, सांताक्रूझमधील किमान तापमान 25.7°C नोंदवले गेले, जे तुलनेने सामान्य होते.

पुढील दोन-तीन दिवस उकाडा कायम राहणार

IMD मुंबईच्या प्रादेशिक हवामान केंद्रातील वरिष्ठ शास्त्रज्ञ सुषमा नायर यांच्या म्हणण्यानुसार, पुढील दोन ते तीन दिवस मुंबईतील दिवसाचे तापमान 35 ते 37°C दरम्यान राहण्याची शक्यता आहे. त्यामुळे ऑक्टोबरच्या सुरुवातीलाच मुंबईकरांना उन्हाचा आणि वाढलेल्या आर्द्रतेचा सामना करावा लागणार आहे.

ऑक्टोबरच्या सुरुवातीलाच तापमानवाढ

ऑक्टोबर महिन्यात इतक्या लवकर तापमान वाढण्याची ही पहिलीच वेळ नाही. 8 ऑक्टोबर 2024 रोजी मुंबईत कमाल तापमान 36.5°C पर्यंत पोहोचले होते. यंदा मात्र ऑक्टोबरच्या सुरुवातीलाच कुलाब्यात 37.4°C तापमानाची नोंद झाली आहे.