Siddhivinayak Temple Update: बाप्पाच्या दर्शनासाठी जाताय? सिद्धिविनायक मंदिराच्या वेळापत्रकात मोठा बदल; 'हे' आहे मुख्य कारण

मुंबईतील श्री सिद्धिविनायक मंदिरात ३ मार्च २०२६ रोजी होणाऱ्या खग्रास चंद्रग्रहणामुळे दर्शनाच्या वेळेत बदल करण्यात आला आहे. या दिवशी दुपारी ३:०० ते सायंकाळी ७:३० पर्यंत गाभारा दर्शन बंद राहणार असले तरी, भाविकांना बाहेरून दर्शन घेता येईल. 

मुंबई : मुंबईचे आराध्य दैवत असलेल्या प्रभादेवीच्या श्री सिद्धिविनायक गणपती मंदिरात दर्शनासाठी जाणाऱ्या भाविकांसाठी महत्त्वाची बातमी आहे. मंगळवार, ३ मार्च २०२६ रोजी होणाऱ्या खग्रास चंद्रग्रहणामुळे मंदिरातील रोजच्या पूजा आणि दर्शनाच्या वेळेत तात्पुरता बदल करण्यात आला आहे. या दिवशी ग्रहणाचे वेध पाळले जाणार असल्याने मंदिराच्या गाभाऱ्यातील दर्शनावर काही काळ मर्यादा येणार आहेत.

चंद्रग्रहणाची वेळ आणि महत्त्वाचे बदल

३ मार्च रोजी फाल्गुन शुद्ध पौर्णिमा असून या दिवशी खग्रास चंद्रग्रहण होणार आहे. त्याचे वेळापत्रक खालीलप्रमाणे असेल.

ग्रहण स्पर्श (सुरुवात): दुपारी ०३:२० वाजता.

ग्रहण मोक्ष (समाप्ती): सायंकाळी ०६:४८ वाजता.

गाभारा दर्शन बंद: दुपारी ०३:०० ते सायंकाळी ०७:३० या वेळेत मुख्य गाभाऱ्यातील दर्शन बंद राहील.

भाविकांसाठी विशेष सूचना

१. बाह्य दर्शन सुरू: गाभाऱ्यातील दर्शन बंद असले तरी, भाविकांना बाहेरून बाप्पाचे दर्शन घेता येईल.

२. नैवेद्य आणि प्रसाद: ग्रहण काळात दुपारी नैवेद्य दाखवला जाणार नाही, तसेच कोणत्याही प्रकारचा प्रसाद स्वीकारला जाणार नाही.

३. नित्य पूजा: पहाटेच्या पूजा आणि आरतीमध्ये कोणताही बदल करण्यात आलेला नाही.

४. फेरबदलानंतरचे दर्शन: सायंकाळी ७:३० वाजता धूपारती झाल्यानंतर नेहमीप्रमाणे दर्शन सुरू होईल. रात्री ९:०० वाजता पूजा, तर ९:३० वाजता महानैवेद्य आणि आरती संपन्न होईल.

महत्त्वाची नोंद: जर तुम्ही मंगळवारी दर्शनाचा विचार करत असाल, तर दुपारी ३ ते रात्री ७:३० या वेळेचे नियोजन करूनच घराबाहेर पडावे, जेणेकरून तुमची गैरसोय होणार नाही.