मुंबईत मोठी दुर्घटना: मुलुंडमध्ये मेट्रोचा पिलर कोसळला, एकाचा मृत्यू

Mumbai Metro Pillar Collapses in Mulund : मुंबईतील मुलुंड परिसरात मोठी दुर्घटना घडली आहे. येथे मेट्रोच्या पिलरचा सिमेंटचा भाग तुटून थेट एका रिक्षा आणि कारवर पडला. यात एका तरुणाचा मृत्यू झाला असून तीन जण जखमी झाले आहेत.

मुंबईतून एक हृदयद्रावक अपघाताची बातमी समोर आली आहे. मुलुंड (पश्चिम) परिसरात शनिवारी दुपारी मेट्रोच्या बांधकामादरम्यान मोठी दुर्घटना घडली. मेट्रोच्या पिलरचा सिमेंटचा भाग तुटून थेट एका रिक्षावर पडला. या अपघातात एका तरुणाचा मृत्यू झाला असून तीन जण जखमी झाल्याची माहिती आहे.

ही मोठी दुर्घटना दुपारी सुमारे १२:२० वाजता एलबीएस रोडवरील जॉन्सन अँड जॉन्सन कंपनीजवळ घडली. येथे बांधकाम सुरू असलेल्या मेट्रो रेल्वे मार्गाच्या पिलरचा एक भाग कोसळून तीन ते चार जण जखमी झाले आहेत. अपघाताची माहिती मिळताच अग्निशमन दल आणि पोलीस घटनास्थळी दाखल झाले आणि बचावकार्य सुरू केले. तसेच, मेट्रो रेल्वे मार्गाचे काम करणारी फर्मचे कर्मचारी घटनास्थळावर देखरेखीसाठी उपस्थित आहेत.

या प्रकरणाची माहिती देताना एका अधिकाऱ्याने सांगितले की, जड सिमेंटचा स्लॅब तुटून खाली एका ऑटोरिक्षावर पडल्याने रिक्षाचा चक्काचूर झाला. तसेच, तो एका कारच्या पुढील भागावर आदळला, ज्यामुळे गाडीचे मोठे नुकसान झाले. अपघाताच्या वेळी पिलरखाली जास्त लोक नव्हते, अन्यथा मृतांचा आकडा वाढला असता, असे सांगितले जात आहे. सध्या जखमींना रुग्णालयात दाखल करण्यात आले आहे.