Mumbai Local Mega Block : मध्य, हार्बर आणि पश्चिम मार्गावर जम्बो मेगाब्लॉक, वीकेंडला बाहेर पडण्यापूर्वी जाणून घ्या वेळापत्रक

Mumbai Local Mega Block : मुंबई लोकल रेल्वेच्या मध्य, हार्बर आणि पश्चिम मार्गांवर रविवारी मेगाब्लॉक घेण्यात येणार आहे. विविध देखभाल आणि दुरुस्तीच्या कामांमुळे अनेक लोकल रद्द होणार असून काहींचे मार्ग बदलण्यात येणार आहेत. प्रवाशांनी प्रवासापूर्वी वेळापत्रक तपासण्याचे आवाहन करण्यात आले आहे.

Mumbai Local Mega Block : लाखो मुंबईकरांची जीवनवाहिनी मानल्या जाणाऱ्या मुंबई लोकलमधून दररोज प्रवास करणाऱ्यांसाठी महत्त्वाची बातमी आहे. वीकेंडच्या पार्श्वभूमीवर अनेक जण बाहेर पडण्याचा बेत आखत असताना, रविवारी मध्य, हार्बर आणि पश्चिम रेल्वे मार्गांवर मोठा मेगाब्लॉक जाहीर करण्यात आला आहे. त्यामुळे अनेक लोकल सेवा रद्द होणार असून काहींचे मार्ग व वेळा बदलण्यात येणार आहेत. प्रवाशांनी घराबाहेर पडण्यापूर्वी ही माहिती नक्की तपासावी, अन्यथा गैरसोयीला सामोरे जावे लागू शकते.

मध्य रेल्वेवर फलाट विस्तारासाठी विशेष ब्लॉक

मध्य रेल्वेअंतर्गत ठाणे आणि डोंबिवली स्थानकांवरील फलाट विस्तारासाठी विशेष ब्लॉक घेण्यात येणार आहे. शनिवारी मध्यरात्री 12 वाजल्यापासून सुरू होणारा हा ब्लॉक रविवारी सकाळी 10 वाजेपर्यंत लागू असेल. या कालावधीत अप आणि डाऊन धीम्या मार्गावरील सेवा प्रभावित होणार आहेत. याशिवाय, मुलुंड-ठाणे आणि दिवा-डोंबिवलीदरम्यान काही लोकल सेवा जलद मार्गावर वळवण्यात येणार असून त्या ठाकुर्ली आणि कोपर स्थानकांवर थांबणार नाहीत.

हार्बर आणि ट्रान्स-हार्बर मार्गावर सेवा रद्द

• हार्बर लाइनवर पनवेल-वाशी दरम्यान तसेच ट्रान्स-हार्बर मार्गावर देखभाल कामांसाठी ब्लॉक घेतला जाणार आहे.
• पनवेलहून सीएसएमटीकडे जाणाऱ्या आणि सीएसएमटीहून पनवेल/बेलापूरकडे जाणाऱ्या अनेक लोकल सेवा सकाळी ते दुपारी रद्द करण्यात येणार आहेत.
• ट्रान्स-हार्बर मार्गावर पनवेल-ठाणे दरम्यानही सकाळी 10 ते दुपारी 3.53 या वेळेत ब्लॉक राहणार असून अनेक सेवा पूर्णपणे रद्द असतील. मात्र, काही विशेष लोकल सेवा पर्यायी मार्गांवर उपलब्ध करून देण्यात येणार आहेत.

पश्चिम रेल्वेवर जलद मार्गावरील सेवा प्रभावित

पश्चिम रेल्वे मार्गावरही सांताक्रूझ ते गोरेगाव दरम्यान सकाळी 10 ते दुपारी 3 या वेळेत ब्लॉक घेण्यात येणार आहे. या काळात जलद मार्गावरील सर्व लोकल धीम्या मार्गावर वळवण्यात येतील.यामुळे काही गाड्या रद्द होणार असून काहींचे वेळापत्रक बदलण्यात येणार आहे. तसेच, काही लोकल बोरिवली आणि अंधेरीहून हार्बर मार्गावरून गोरेगावपर्यंत चालवल्या जाणार आहेत.

पालघर-उमरोली दरम्यान जम्बो ब्लॉक

पश्चिम रेल्वे अंतर्गत पालघर आणि उमरोली स्थानकांदरम्यान नवीन पूल बांधण्यासाठी जंबो ब्लॉक घेण्यात येणार आहे. हा ब्लॉक रात्री 2:10 ते पहाटे 5:10 दरम्यान डाउन लाईनवर लागू असेल. तसेच, 18/19 एप्रिलच्या रात्री दोन्ही लाईन्सवरही ब्लॉक राहणार आहे. या कामांमुळे काही गाड्या रद्द, काही कमी अंतरावर चालवण्यात येणार किंवा त्यांचे वेळापत्रक बदलण्यात येणार आहे.

प्रवाशांसाठी सूचना

या मेगाब्लॉकमुळे प्रवासात अडथळे निर्माण होण्याची शक्यता असल्याने प्रवाशांनी वेळापत्रक तपासूनच प्रवास करावा. पर्यायी मार्गांचा वापर करावा आणि शक्य असल्यास गर्दी टाळण्यासाठी वेळेत बदल करावा.