Maharashtra Election 2024: मनसेशिवाय सत्ता स्थापन होणार नाही : अमित ठाकरे
सार
माहीम विधानसभा मतदारसंघात मनसे, शिवसेना (शिंदे गट) आणि शिवसेना (ठाकरे गट) यांच्यात तिरंगी लढत आहे. अमित ठाकरे यांनी मतदान केल्यानंतर मनसेशिवाय राज्यात सत्ता स्थापन होणार नाही, असा दावा केला आहे.
Maharashtra Election 2024: महाराष्ट्र विधानसभा निवडणुकीत माहीम विधानसभा मतदारसंघात तिरंगी लढत सुरू आहे. या लढतीत मनसेचे अमित ठाकरे, शिवसेना शिंदे गटाचे सदा सरवणकर आणि शिवसेना ठाकरे गटाचे महेश सावंत यांच्यात थेट सामना होईल. आज सकाळी अमित ठाकरे यांनी मतदानाचा हक्क बजावत माहीमवासीयांना महत्त्वाचे आवाहन केले. "माहीम आणि दादरमधील नागरिकांनी जास्तीत जास्त मतदान करावं," असं त्यांनी सांगितलं.
'मनसेशिवाय सत्ता स्थापन होणार नाही!'
अमित ठाकरे यांनी एक अत्यंत महत्वाचं विधान केलं. "मी दाव्यानं सांगतो, मनसेशिवाय राज्यात सत्ता स्थापन होणार नाही," असं त्यांनी सांगितलं. यावेळी त्यांनी आपल्या प्रचाराची खास चर्चा केली. "मी डोअर-टू-डोअर प्रचार केला, आणि लोकांपर्यंत माझं संदेश पोहोचवलं आहे," असं ते म्हणाले.
अमित ठाकरे आणि सदा सरवणकरांची भेट
मतदान करण्याआधी, सदा सरवणकर सिद्धिविनायक मंदिरात दर्शनासाठी गेले होते, त्याच वेळी अमित ठाकरे देखील दर्शनासाठी उपस्थित होते. दोन्ही नेत्यांची भेट झाली आणि त्यांनी एकमेकांना शुभेच्छा दिल्या.
मनसेच्या पाठिंब्यावरच मुख्यमंत्री होईल: राज ठाकरे
राज ठाकरे यांनी महाराष्ट्र व्हिजन कार्यक्रमातून महत्त्वाची घोषणा केली. "2024 चा मुख्यमंत्री भाजपचा असेल, पण 2029 मध्ये मुख्यमंत्री मनसेचा होईल," असं त्यांनी भाकीत केलं. यामुळे, राज ठाकरे यांनी सूचित केलं की, आगामी निवडणुकीत मुख्यमंत्रीपदावर भाजपचा उमेदवार असला तरी, 2029 मध्ये मनसेचाच मुख्यमंत्री होईल.
यंदाच्या विधानसभा निवडणुकीला तिसरी आघाडी मनसे आणि वंचित बहुजन आघाडी पूर्ण ताकदीने मैदानात उतरले आहेत. मनसेने 100 पेक्षा अधिक जागांवर उमेदवार उभे केले आहेत आणि "एकला चलो रे" चा नारा दिला आहे. यामुळे या निवडणुकीच्या निकालाची सर्वांना उत्सुकता लागून राहिली आहे.
राज ठाकरे यांनी देखील एक प्रकारे देवेंद्र फडणवीस यांच्या मुख्यमंत्रीपदाच्या दाव्याला चालना दिली आहे, तसेच मनसेच्या पाठिंब्याशिवाय भाजपला सत्ता स्थापन करणे अशक्य असल्याचं सांगितलं आहे.
यंदाच्या महाराष्ट्र विधानसभा निवडणुकीचा निकाल राज्याच्या राजकारणात महत्त्वाचा ठरणार आहे, आणि त्यावर सर्वांचे लक्ष लागून राहिले आहे.