Indigo Update : आजही शुक्रवारी शेकडो उड्डाणे रद्द, मुंबई-पुणे-नागपूरसह प्रमुख विमानतळांवर गोंधळ

Indigo flights from Mumbai Pune Nagpur cancelled : इंडिगो एअरलाइन्सने देशभरातील प्रमुख विमानतळांवर ५०० हून अधिक विमाने रद्द केल्याने प्रवाशांचे मोठे हाल झाले. क्रू कर्मचाऱ्यांची कमतरता आणि नवीन FDTL नियमांमुळे हा अडथळा निर्माण झाला.

Indigo flights from Mumbai Pune Nagpur cancelled : देशातील सर्वात व्यस्त विमानतळांवर आज (शुक्रवार) इंडिगो एअरलाइन्सच्या कामकाजात आलेल्या मोठ्या अडथळ्यामुळे प्रचंड तणाव दिसून आला. महत्त्वाच्या महानगरांमध्ये विमानांची मालिका रद्द झाल्याने प्रवाशांचे मोठे हाल झाले. प्राप्त माहितीनुसार, देशातील या सर्वात मोठ्या खासगी विमान कंपनीने आज ५०० हून अधिक विमाने रद्द केली. गुरुवारीही इंडिगोच्या सुमारे ५५० सेवा रद्द करण्यात आल्या होत्या.

प्रमुख महानगरांमधील स्थिती

• दिल्ली: दिल्ली विमानतळ चालवणाऱ्या 'DIAL' ने जाहीर केले की, इंडिगोने आज मध्यरात्रीपर्यंत दिल्लीहून उड्डाण करणारी सर्व देशांतर्गत विमाने रद्द केली आहेत. मात्र, इतर सर्व विमान कंपन्यांचे कामकाज वेळापत्रकानुसार सुरू असल्याचे त्यांनी स्पष्ट केले.
• बंगळूरु: केंपेगौडा आंतरराष्ट्रीय विमानतळावर इंडिगोची ५२ आगमन आणि ५० प्रस्थान विमाने रद्द झाली. अधिकारी म्हणाले की, पुढील माहिती सायंकाळी ६ वाजल्यानंतर दिली जाईल.
• हैदराबाद: 'जीएमआर एअरपोर्ट्स लि. पीआरओ' नुसार, गुरुवारी इंडिगोच्या ४३ आगमन आणि ४९ प्रस्थान सेवांवर मोठा परिणाम झाला.
• मुंबई: मुंबई आंतरराष्ट्रीय विमानतळ लिमिटेड (MIAL) ने सांगितले की, इंडिगोने ५ डिसेंबरसाठी १०४ उड्डाणे (५३ प्रस्थान आणि ५१ आगमन) रद्द करण्याचे नियोजन केले आहे. या आकडेवारीत बदल झाल्यास पुढील माहिती दिली जाईल.
• पुणे: पुणे विमानतळावर मध्यरात्री ते सकाळी ८ वाजेपर्यंत ३२ विमाने रद्द झाल्याची पुष्टी झाली. यामध्ये नागपूर-पुणे विमान हैदराबादकडे वळवण्याचा समावेश आहे.
• केरळ: तिरुवनंतपुरम आंतरराष्ट्रीय विमानतळावर इंडिगोची दोन आगमन आणि दोन प्रस्थान विमाने रद्द झाली, तर तीन आगमन आणि तीन प्रस्थान सेवांना विलंब झाला.

क्रू कर्मचाऱ्यांची कमतरता हे मुख्य कारण

एअरलाइन्स देशभरात आधीपासूनच विमानांच्या मालिकेतील रद्दीकरणाशी झगडत असताना हे नवीन अडथळे उभे राहिले आहेत.

इंडिगोवरील ताण गेल्या काही दिवसांपासून वाढत आहे. बुधवारपर्यंत, इंडिगोने 'नागरिक उड्डयन महासंचालनालयाला' (DGCA) सांगितले की, नोव्हेंबरमध्ये त्यांनी १,२३२ विमाने रद्द केली, ज्याचे सर्वात मोठे कारण 'क्रू कर्मचाऱ्यांची कमतरता' हे आहे. 'फ्लाइट ड्युटी टाइम लिमिटेशन्स' (FDTL) नियमांचे उल्लंघन न करता कर्मचाऱ्यांची ड्युटी लावता येत नसल्याने तब्बल ७५५ सेवा रद्द कराव्या लागल्या.

इंडिगोकडून सेवेतील त्रुटींची कबुली

इंडिगोचे मुख्य कार्यकारी अधिकारी (CEO) पीटर एल्बर्स यांनी काल (गुरुवारी) सेवेतील त्रुटी मान्य करत, एअरलाइन सध्या मोठ्या 'ऑपरेशनल टर्ब्युलन्स' मधून जात असल्याचे सांगितले. सेवा स्थिर करणे आणि वेळेवर सेवा बहाल करणे हे त्यांचे तात्काळ प्राधान्य आहे, मात्र हे लक्ष्य साधणे सोपे नाही, अशी कबुली त्यांनी दिली.

एल्बर्स यांनी कर्मचाऱ्यांसाठी अंतर्गत संदेशात सांगितले की, इंडिगो अलीकडच्या दिवसांत ग्राहकांना समाधानकारक प्रवासाचा अनुभव देण्यात कमी पडली आहे. ते म्हणाले, "गेले काही दिवस इंडिगोचे अनेक ग्राहक आणि सहकाऱ्यांसाठी कठीण होते. आम्ही दररोज सुमारे ३,८०,००० ग्राहकांना सेवा देतो आणि त्या प्रत्येकाला चांगला अनुभव मिळावा अशी आमची इच्छा आहे. गेल्या काही दिवसांत आम्ही या आश्वासनावर खरे उतरू शकलो नाही आणि त्यासाठी आम्ही जाहीरपणे माफी मागितली आहे."

सीईओनुसार, ही समस्या एकाच वेळी अनेक ऑपरेशनल आव्हाने वाढल्यामुळे निर्माण झाली आहे, ज्यात किरकोळ तांत्रिक समस्या, वेळापत्रकात बदल, प्रतिकूल हवामान, विमान वाहतूक प्रणालीमधील वाढलेली गर्दी आणि नवीन 'FDTL' नियमांची अंमलबजावणी यांचा समावेश आहे.

फेब्रुवारी २०२६ पर्यंत परिस्थिती पूर्ववत करण्याचे आश्वासन

'नागरिक उड्डयन महासंचालनालयाने' (DGCA) इंडिगोसोबत सविस्तर आढावा बैठक घेतल्यानंतर एका निवेदनात सांगितले की, या खासगी एअरलाइनने त्यांच्या A320 विमानांसाठी १० फेब्रुवारी २०२६ पर्यंत विशिष्ट 'FDTL' तरतुदींमधून तात्पुरती operational सूट मागितली आहे. तोपर्यंत कामकाजाची स्थिरता पूर्ववत होण्याची अपेक्षा आहे.

विमान वाहतूक नियामकाने स्पष्ट केले, "प्रवाशांची गैरसोय कमी करताना सुरक्षिततेचे मानक जपण्यासाठी, इंडिगोने १० फेब्रुवारी २०२६ पर्यंत A320 ऑपरेशनसाठी विशिष्ट FDTL तरतुदींमधून operational बदल किंवा सूट देण्याची विनंती केली आहे. इंडिगोने DGCA ला आश्वासन दिले आहे की सुधारणात्मक उपाययोजना सुरू आहेत आणि १० फेब्रुवारी २०२६ पर्यंत सामान्य आणि स्थिर कामकाज पूर्णपणे पूर्ववत केले जाईल."