Geyser Safety Tips : 6 महिन्यांनंतर गिझर चालू करताय? ही चूक अजिबात करू नका

भारतीय घरांमध्ये गिझरचा वापर आता खूप वाढला आहे. हिवाळा आणि पावसाळ्यात लोक सकाळी गरम पाण्यासाठी गिझर हमखास वापरतात. पण गिझर वापरताना तुम्ही काळजी घेणे खूप महत्त्वाचे आहे. तुमचा थोडासा निष्काळजीपणाही मोठा धोका निर्माण करू शकतो.

गिझर वापरण्यापूर्वी वायर आणि स्विच तपासा

तुम्ही रोज गिझर वापरत असाल तर त्याचे वेळोवेळी सर्व्हिसिंग करणे महत्त्वाचे आहे. पण तुम्ही अनेक दिवसांनंतर गिझर चालू करत असाल, तर थेट स्विच ऑन करू नका. आधी गिझरचे स्विच, वायर आणि हीटिंग एलिमेंट तपासून घ्या. वायर खराब झाली असेल, जळल्याच्या खुणा असतील किंवा इतर कोणतीही अडचण असेल, तर लगेच इलेक्ट्रिशियनला बोलावून दुरुस्त करून घ्या.

या गोष्टी नक्की तपासा

तुम्ही अनेक महिने गिझर वापरला नसेल, तर सेफ्टी व्हॉल्व्ह, थर्मोस्टॅट आणि पाणी गळती (लिकेज) होत आहे का, हे नक्की तपासा. तज्ज्ञांकडून या गोष्टी तपासून घेणे कधीही चांगले. गिझर किंवा पाईपमध्ये तुम्हाला कोणतेही लिकेज दिसले, तर त्याकडे दुर्लक्ष न करता ते लगेच दुरुस्त करून घ्या.

थेट आंघोळीला जाऊ नका

सर्व गोष्टी तपासल्यानंतरही गिझर चालू करून लगेच आंघोळीला जाऊ नका. आधी गिझर व्यवस्थित काम करत आहे का, याकडे थोडा वेळ लक्ष द्या. गिझरमधून काही विचित्र आवाज येत आहे का, पाणी नीट गरम होत आहे का किंवा करंट लागण्याची शक्यता आहे का, हे तपासा. काही अडचण वाटल्यास गिझर लगेच बंद करा आणि तज्ज्ञांना दाखवा.

गिझरचे सर्व्हिसिंग

तुम्ही जसे एसीचे सर्व्हिसिंग करता, तसेच गिझरचेही नियमित सर्व्हिसिंग करणे गरजेचे आहे. विशेषतः तुम्ही अनेक महिने गिझर वापरला नसेल, तर तो पुन्हा वापरण्यापूर्वी एकदा सर्व्हिसिंग करून घेणे सर्वात सुरक्षित ठरते.