Mumbai Water Cut News: मुंबईकरांनो लक्ष द्या! 'या' भागातील पाणीकपात अखेर संपली; पाहा तुमच्या नळाला पाणी कधी येणार?

Mumbai Water Cut News: बृहन्मुंबई महानगरपालिकेने घाटकोपर जलाशयाच्या दुरुस्तीचे काम यशस्वीरित्या पूर्ण केले. यामुळे १० एप्रिल २०२६ पासून विस्कळीत झालेला पाणीपुरवठा पुन्हा जुन्या वेळेनुसार सुरळीत होणार आहे.

मुंबईकरांनो लक्ष द्या! 'या' भागातील पाणीकपात अखेर संपली

मुंबई: घाटकोपर पश्चिम परिसरातील नागरिकांसाठी दिलासादायक बातमी आहे. घाटकोपर जलाशयातील (Ghatkopar Reservoir) दोन मोठ्या कप्प्यांच्या दुरुस्तीचे किचकट काम बृहन्मुंबई महानगरपालिकेच्या (BMC) जल अभियंता विभागाने यशस्वीरित्या पूर्ण केले आहे. यामुळे गेल्या काही दिवसांपासून विस्कळीत झालेला पाणीपुरवठा आता १० एप्रिल २०२६ पासून पुन्हा जुन्या वेळेनुसार सुरळीत होणार आहे. 

तुमच्या भागातील पाणीपुरवठ्याची नवीन वेळ जाणून घ्या

दुरुस्तीचे काम पूर्ण झाल्यानंतर महापालिकेने विविध विभागांसाठी सुधारित वेळापत्रक जाहीर केले आहे.

१. नारायणनगर आणि चिरागनगर परिसर (NX 03)

प्रमुख भाग: आझाद नगर, गणेश मैदान, पारशीवाडी, विद्याविहार (पश्चिम), किरोळ गाव, एल.बी.एस. मार्ग परिसर.

सुधारित वेळ: दुपारी ०३:१५ ते सायंकाळी ०७:१५ वाजेपर्यंत. 

२. पंतनगर आऊटलेट आणि भीमनगर परिसर (NX 06)

प्रमुख भाग: लोअर भीमनगर, नित्यानंद नगर, सी.जी.एस. वसाहत, गंगावाडी, श्रेयस सिग्नलपर्यंतचा एल.बी.एस. मार्ग परिसर.

सुधारित वेळ: सायंकाळी ०६:४५ ते रात्री ११:०० वाजेपर्यंत. 

३. सर्वोदय बुस्टींग परिसर

प्रमुख भाग: सॅनिटोरियम गल्ली, एच. आर. देसाई मार्ग, कामा गल्ली, गांधीनगर परिसर.

सुधारित वेळ: सायंकाळी ०७:१५ ते रात्री ०९:१५ वाजेपर्यंत (ही वेळ पूर्वीप्रमाणेच कायम राहील). 

नागरिकांसाठी महत्त्वाची सूचना

पाणीपुरवठा पूर्ववत होत असला तरी, तांत्रिक दुरुस्तीनंतर सुरुवातीच्या काळात पाण्याचा दर्जा बदलण्याची शक्यता असते. त्यामुळे खबरदारीचा उपाय म्हणून महापालिकेने खालील आवाहन केले आहे.

पुढील ५ दिवस पाणी उकळून आणि गाळूनच प्यावे.

पाणीपुरवठा नियमित होत असला तरी पाण्याचा वापर काटकसरीने करावा. 

प्रशासकीय दिलासा

जलाशयाच्या कप्प्यांमध्ये देखभालीचे काम सुरू असल्यामुळे गेल्या काही दिवसांपासून या भागात तात्पुरत्या आणि कमी वेळेसाठी पाणी दिले जात होते. मात्र, १० एप्रिलपासून सर्व तांत्रिक अडथळे दूर झाल्याने घाटकोपरकरांना मोठा दिलासा मिळणार आहे.