Dasara Melava : शिवसेना UBT चा दसरा मेळावा शिवाजी पार्कवरच होणार, महापालिकेची परवानगी मिळाली!

Dasara Melava : मुंबईत उद्धव ठाकरे यांच्या शिवसेनेचा दसरा मेळावा शिवाजी पार्कवर होणार आहे. यासाठी मुंबई महापालिकेकडून परवानी देण्यात आली आहे. याशिवाय एकनाथ शिंदे आपला दसरा मेळावा आझाद मैदानावर घेण्याची शक्यता आहे. 

मुंबई : शिवसेना उद्धव बाळासाहेब ठाकरे (UBT) गटाला अखेर शिवाजी पार्क मैदानावर दसरा मेळावा आयोजित करण्याची परवानगी मुंबई महापालिकेकडून मिळाली आहे. आगामी मुंबई महानगरपालिका तसेच स्थानिक स्वराज्य संस्थांच्या निवडणुकीच्या पार्श्वभूमीवर या मेळाव्याला विशेष महत्त्व प्राप्त झाले आहे. त्यातच शिवसेना UBT आणि मनसे यांच्यातील संभाव्य सहकार्यामुळे हा मेळावा अधिक गाजण्याची शक्यता व्यक्त केली जात आहे.

उद्धव ठाकरे करतील कार्यकर्त्यांना मार्गदर्शन

शिवाजी पार्कवर मेळावा घेण्यासाठी शिवसेना UBT ने मुंबई महापालिकेशी पत्रव्यवहार केला होता. त्यावर महापालिकेकडून सकारात्मक प्रतिसाद देत परवानगी देण्यात आली आहे. या मेळाव्यात पक्षप्रमुख उद्धव ठाकरे आणि इतर वरिष्ठ नेते कार्यकर्त्यांना मार्गदर्शन करतील. पक्षाचे नेते सचिन अहिर यांनी या मेळाव्याबाबत ‘न भूतो न भविष्यति’ असे विधान करत त्याची भव्यता अधोरेखित केली.

शिवसेनेचा दसरा मेळावा आझाद मैदानावर होणार?

दरम्यान, शिवसेना (शिंदे गट) आपल्या दसरा मेळाव्यासाठी पर्यायी ठिकाणांच्या शोधात आहे. वरळी डोम आणि आझाद मैदान या दोन्ही ठिकाणांचा विचार करण्यात आला होता. मात्र वरळी डोममध्ये जागा अपुरी पडेल, म्हणून आझाद मैदानालाच पसंती दिली गेली आहे. यासाठी महापालिकेकडे पत्रव्यवहार सुरू असून, लवकरच मेळाव्यासाठी आझाद मैदानावर शिक्कामोर्तब होणार असल्याचे संकेत आहेत.

मनसेची निवडणूक आयोगाला भेट

दरम्यान, महाराष्ट्र नवनिर्माण सेनेनेही स्थानिक स्वराज्य संस्थांच्या निवडणुकींच्या पार्श्वभूमीवर हालचाली सुरू केल्या आहेत. अद्ययावत मतदार याद्या लवकर प्रसिद्ध कराव्यात, या मागणीसाठी मनसेचे शिष्टमंडळ निवडणूक आयोगाची भेट घेणार आहे. पक्षाचे नेते बाळा नांदगावकर यांनी ही माहिती दिली.

राज ठाकरे यांची बैठक आणि सूचना

मुंबई महानगरपालिका निवडणुका आणि इतर स्थानिक स्वराज्य संस्थांच्या निवडणुकींच्या तयारीसाठी मनसे अध्यक्ष राज ठाकरे यांनी अलीकडेच पक्षनेते आणि पदाधिकाऱ्यांची बैठक शिवतीर्थ निवासस्थानी आयोजित केली. या वेळी बीएलओसह इतर नेमणुका त्वरित जाहीर करण्याच्या सूचना त्यांनी दिल्या.