JW Marriott Mumbai : मुंबईच्या फाईव्ह स्टार हॉटेलमध्ये जेवणाच्या ताटात झुरळ!
सार
मुंबईतील प्रसिद्ध जे डब्ल्यू मॅरियट हॉटेलमध्ये हृदयरोगतज्ज्ञ डॉ. अशोक सेठ यांच्या जेवणाच्या टेबलावर चक्क एक झुरळ आढळलं. त्यांनी या घटनेचा व्हिडिओ शेअर करत थेट अन्न आणि औषध प्रशासनाकडे हॉटेलच्या स्वच्छतेची चौकशी करण्याची मागणी केली आहे.
मुंबई : मुंबईतील आलिशान जे डब्ल्यू मॅरियट (JW Marriott) हॉटेलमध्ये जेवायला गेलेल्या हृदयरोगतज्ज्ञ डॉ. अशोक सेठ यांना एक वेगळाच अनुभव आला. त्यांच्या जेवणाच्या टेबलावर चक्क एक छोटं झुरळ फिरताना दिसलं. मुंबईच्या सहार भागातील या हॉटेलच्या 'रोमानो' रेस्टॉरंटमधला हा व्हिडिओ त्यांनी शेअर केला आहे. या घटनेवर त्यांनी केलेली खोचक पोस्ट सध्या सोशल मीडियावर प्रचंड व्हायरल होत आहे.
फोर्टिस एस्कॉर्ट्स हार्ट इन्स्टिट्यूटचे अध्यक्ष असलेल्या डॉ. सेठ यांनी शनिवारी रात्री घडलेल्या या प्रकारानंतर 'एक्स' (X) वर एक व्हिडिओ पोस्ट केला. त्यांनी या न बोलावलेल्या पाहुण्याला 'रोची' (Roachie) असं नाव दिलं आणि या फाईव्ह स्टार हॉटेलच्या स्वच्छतेवरच प्रश्नचिन्ह निर्माण केलं.
आपल्या पोस्टमध्ये डॉ. सेठ यांनी लिहिलंय, "पाहा, आमच्यासोबत जेवायला अचानक कोण आलंय. शनिवारी रात्री मुंबईच्या सहारमधील जे डब्ल्यू मॅरियटच्या रोमानो रेस्टॉरंटमध्ये 'रोची' नावाचं हे छोटं झुरळ आमच्या टेबलावर होतं आणि त्याला आमच्यासोबत जेवायचं होतं." त्यांनी पुढे असंही सांगितलं की, त्यांनी या झुरळाला तिथून हाकलण्याचा खूप प्रयत्न केला, पण ते तिथून हलायला तयारच नव्हतं.
हा व्हायरल व्हिडिओ इथे पाहा:
Look who came for dinner unexpectedly. ‘Roachie’ - a baby *cockroach was on our table wanting to share our dinner at the Romano restaurant at JW Marriott , Sahar , Mumbai, Saturday night*!!! Despite our persuasion ‘ Roachie’ refused to leave . Maybe wanted Piazza and not… pic.twitter.com/w1h92KZiaU
— Dr. Ashok Seth (@Dr_AshokSeth) September 20, 2026
या प्रकारावर टोमणा मारताना डॉ. सेठ यांनी मजेत म्हटलं की, या झुरळाला कदाचित 'पास्ता नको तर पिझ्झा' हवा असावा. पण या किळसवाण्या प्रकारामुळे त्यांची भूकच मेली आणि त्यांना जेवण न करताच रेस्टॉरंटमधून बाहेर पडावं लागलं.
डॉ. सेठ यांनी महाराष्ट्राचे अन्न आणि औषध प्रशासन (FDA) आयुक्त तुकाराम मुंढे यांनाही या पोस्टमध्ये टॅग केलं. ही घटना त्यांच्या 'हद्दीत' घडली असून त्यांनी या प्रकरणाची गंभीर दखल घ्यावी, अशी मागणी त्यांनी केली.
या पोस्टवर सोशल मीडिया युजर्सनीही संताप व्यक्त केला आहे. एवढ्या मोठ्या आणि महागड्या हॉटेलमध्ये जेवणाच्या टेबलावर झुरळ कसं काय येऊ शकतं, असा सवाल अनेकांनी विचारला. काही युजर्सनी तर या रेस्टॉरंटची आणि तिथल्या स्वच्छतेची तातडीने तपासणी करण्याची मागणी केली आहे.
या वादानंतर 'मॅरियट बॉनवॉय असिस्ट'ने (Marriott Bonvoy Assist) डॉ. सेठ यांच्या पोस्टला उत्तर देत माफी मागितली आहे. "नमस्कार डॉ. अशोक, आम्हाला याबद्दल माहिती दिल्याबद्दल धन्यवाद. आम्ही या प्रकरणाची गंभीर दखल घेत आहोत आणि याची नक्कीच चौकशी करू," असं उत्तर त्यांच्या कस्टमर सपोर्ट अकाऊंटवरून देण्यात आलं.
Hello Dr. Ahok, thank you for letting us know. We take this matter seriously. We would like to look into it for you. Could you please DM us your first, last name, and your confirmation number?
— Marriott Bonvoy Assist (@MBonvoyAssist) September 20, 2026
सध्या हॉटेल्स आणि रेस्टॉरंट्समधील अन्नाचा दर्जा आणि स्वच्छतेचा मुद्दा चांगलाच ऐरणीवर आला आहे. 'इंडिया टुडे'च्या वृत्तानुसार, ऑगस्ट महिन्यातच FSSAI ने दिल्लीच्या एरोसिटीमधील जे डब्ल्यू मॅरियटसह दोन फाईव्ह स्टार हॉटेल्सना नोटीस बजावली होती. तपासणीदरम्यान तिथे अन्न सुरक्षा, स्वच्छता आणि साठवणुकीच्या नियमांचं उल्लंघन झाल्याचं समोर आलं होतं.
डॉ. सेठ यांचा हा व्हिडिओ इंटरनेटवर वेगाने पसरत असून, जेवणाच्या टेबलावर आलेल्या या 'रोची'मुळे आता मोठ्या हॉटेल्समधील स्वच्छतेच्या दाव्यांवर सोशल मीडियावर जोरदार चर्चा सुरू झाली आहे.