मुंबईहून लंडनकडे जाणारे विमान परत बोलवले, एअर इंडियाच्या २० हून अधिक फ्लाईट्स वळवण्यात आल्या

प्रवाशांच्या सुरक्षेला सर्वोच्च प्राधान्य देत, एअर इंडियाने आपल्या २० हून अधिक आंतरराष्ट्रीय फ्लाईट्सचे मार्ग तातडीने बदलले आहेत.

नवी दिल्ली/मुंबई - इस्त्रायलने इराणवर जोरदार हवाई हल्ला केल्यानंतर संपूर्ण पश्चिम आशिया खळबळून गेले आहे. दोन्ही देशांनी आपले हवाई क्षेत्र तत्काळ बंद केल्याने त्याचा थेट परिणाम भारतीय आंतरराष्ट्रीय विमान वाहतुकीवर झाला आहे. प्रवाशांच्या सुरक्षेला सर्वोच्च प्राधान्य देत, एअर इंडियाने आपल्या २० हून अधिक आंतरराष्ट्रीय फ्लाईट्सचे मार्ग तातडीने बदलले आहेत.

सुरक्षिततेसाठी फ्लाईट्स वळवल्या किंवा परत बोलावल्या

लंडनहून मुंबईकडे येणारी एआय 130 फ्लाईट व्हिएन्नाकडे वळवण्यात आली, तर मुंबईहून लंडनकडे जाणारी एआय 129 फ्लाईट अर्ध्या वाटेतूनच परत मुंबईला बोलावण्यात आली. तसेच मुंबई-न्यू यॉर्कची एआय 119 फ्लाईट आणि लंडनहून दिल्लीकडे येणारी एआय 2018 फ्लाईटही सुरक्षिततेच्या कारणास्तव मार्ग बदलण्यात आलेल्या प्रमुख फ्लाईट्सपैकी आहेत.

एअर इंडियाने दिलेल्या निवेदनात म्हटलं आहे की, “हा निर्णय प्रवाशांच्या सुरक्षिततेच्या दृष्टीने अत्यंत आवश्यक होता. या तातडीच्या बदलांमुळे प्रवाशांना झालेल्या गैरसोयीबद्दल आम्ही दिलगिरी व्यक्त करतो.”

वळवण्यात आलेल्या/परत बोलावण्यात आलेल्या एअर इंडिया फ्लाईट्स:

AI130 – लंडन हीथ्रो – मुंबई → व्हिएन्नाकडे वळवले

AI102 – न्यू यॉर्क – दिल्ली → शारजाकडे वळवले

AI116 – न्यू यॉर्क – मुंबई → जेद्दाहकडे वळवले

AI2018 – लंडन – दिल्ली → मुंबईकडे वळवले

AI129 – मुंबई – लंडन → मुंबईकडे परत

AI119 – मुंबई – न्यू यॉर्क → मुंबईकडे परत

AI103 – दिल्ली – वॉशिंग्टन → दिल्लीकडे परत

AI106 – नेवार्क – दिल्ली → दिल्लीकडे परत

AI188 – व्हँकुव्हर – दिल्ली → जेद्दाहकडे वळवले

AI101 – दिल्ली – न्यू यॉर्क → फ्रँकफर्ट/मिलानकडे वळवले

AI126 – शिकागो – दिल्ली → जेद्दाहकडे वळवले

AI132 – लंडन – बेंगळुरू → शारजाकडे वळवले

AI2016 – लंडन – दिल्ली → व्हिएन्नाकडे वळवले

AI104 – वॉशिंग्टन – दिल्ली → व्हिएन्नाकडे वळवले

AI190 – टोरांटो – दिल्ली → फ्रँकफर्टकडे वळवले

AI189 – दिल्ली – टोरांटो → दिल्लीकडे परत

इस्रायलकडून इराणवर १२ हून अधिक लष्करी तळांवर हल्ला

गुरुवारी रात्रीच्या सुमारास इस्रायलने इराणच्या राजधानी तेहरानवर आणि इतर भागांवर क्षेपणास्त्रे, ड्रोन आणि लढाऊ विमानांच्या साहाय्याने जोरदार हल्ला चढवला. या हल्ल्यात इराणच्या १२ हून अधिक लष्करी तळांना आणि अणुशक्ती केंद्रांना लक्ष्य करण्यात आले.

हल्ल्यामुळे तेहरान शहरात जोरदार स्फोट झाले, आणि त्याचा आवाज दूरदूरपर्यंत ऐकू गेला. इस्रायलच्या लष्करी अधिकाऱ्यांनी दावा केला आहे की या कारवाईत इराणचे अनेक कमांडो जवान, अणुशास्त्रज्ञ ठार झाले असून, अणु कार्यक्रमाची ठिकाणे उद्ध्वस्त करण्यात आली आहेत.

भारतीय उड्डाण मार्गांवर संभाव्य परिणाम

इराण आणि इस्त्रायलच्या हवाई क्षेत्रातील बंदीमुळे युरोप, अमेरिका आणि कॅनडा कडे जाणाऱ्या/येणाऱ्या भारतीय फ्लाईट्सना मार्ग वळवण्याची आवश्यकता भासते आहे. या नव्या परिस्थितीत इंधन खर्च, वेळेचा विलंब आणि विमान कंपनीवर आर्थिक ताण येण्याची शक्यता वर्तवली जात आहे.

नवीन उड्डाण वेळापत्रकाची शक्यता

या तातडीच्या उपायांमुळे अनेक प्रवाशांचे प्रवास उशिराने किंवा अनिश्चिततेत सुरू झाले आहेत. एअर इंडिया आणि नागरी उड्डाण मंत्रालयाकडून नवीन मार्ग नियोजनावर काम सुरू असून, प्रवाशांना वेळोवेळी अद्ययावत माहिती देण्याचे प्रयत्न सुरू आहेत.

सावधतेचा उपाय म्हणून निर्णय

पश्चिम आशियातील तणावाच्या पार्श्वभूमीवर, भारतीय विमान कंपन्यांकडून प्रवाशांच्या सुरक्षिततेस सर्वोच्च प्राधान्य देऊन तातडीचे निर्णय घेण्यात येत आहेत. एअर इंडियाने दाखवलेली तत्परता ही एक जबाबदारीची भावना दर्शवते, तरीही परिस्थिती सामान्य होईपर्यंत प्रवाशांनी संयम बाळगून अधिकृत सूचनांकडे लक्ष देण्याचे आवाहन करण्यात आले आहे.