Pune Property Dispute : धक्कादायक! पुण्यात भावाने बहिणीला मनोरुग्णालयात तर आईला चक्क वृद्धाश्रमात टाकले, कारण वाचून व्हाल थक्क!

Pune Property Dispute : पुण्यात एका ५४ वर्षीय व्यक्तीने कौटुंबिक मालमत्ता हडपण्यासाठी बहिणीला जबरदस्तीने मनोरुग्णालयात आणि आईला वृद्धाश्रमात पाठवल्याची धक्कादायक घटना घडली आहे.

पुणे : पुण्यातून एक अत्यंत धक्कादायक आणि माणुसकीला काळीमा फासणारी घटना समोर आली आहे. औंध येथील सिंध हाऊसिंग सोसायटीमध्ये एका ५४ वर्षीय व्यक्तीने कौटुंबिक मालमत्ता हडपण्याच्या उद्देशाने आपल्या सख्ख्या बहिणीला जबरदस्तीने मनोरुग्णालयात पाठवले, तर ८० वर्षीय वृद्ध आईला त्यांच्या संमतीशिवाय वृद्धाश्रमात दाखल केले. या प्रकरणी पोलिसांनी आरोपीला अटक केली आहे.

मिळालेल्या माहितीनुसार, मुंबईतील चेंबूर येथील धर्मेंद्र इंदूर राय नावाच्या व्यक्तीने ७ ते १८ जुलै दरम्यान चार महिला बाउन्सरना सोबत घेऊन कुटुंबाच्या घरात प्रवेश केला. त्यावेळी त्यांची ५६ वर्षीय बहीण आणि ८० वर्षीय आई घरी होत्या. रायने वैद्यकीय रक्त तपासणीच्या बहाण्याने आपल्या बहिणीला एका अज्ञात पदार्थाचे इंजेक्शन दिले आणि तिला बालेवाडी येथील मानसिक आरोग्य केंद्रात नेले. विशेष म्हणजे, तेथील डॉक्टरांनी तपासणीनंतर तिला कोणतीही मानसिक आजार नसल्याचे सांगून डिस्चार्ज दिला.

त्याच दिवशी, रायने आपल्या वृद्ध आईला त्यांच्या इच्छेविरुद्ध एका वृद्धाश्रमात हलवले. या घटनेनंतर दोन्ही महिलांना त्यांच्या घरात परत येण्यास मज्जाव करण्यात आला होता.

पोलिसांनी दिलेल्या माहितीनुसार, बहिणीने मित्र आणि शेजाऱ्यांच्या मदतीने मानसिक आरोग्य केंद्रातून कशीबशी सुटका करून घेतली. त्यानंतर तिने चतुःशृंगी पोलिसांशी संपर्क साधून भाऊ आणि बाउन्सर यांच्या विरोधात औपचारिक तक्रार दाखल केली. तिच्या जबाबानुसार, भारतीय न्याय संहिता आणि मानसिक आरोग्य कायद्याच्या कलमांतर्गत एफआयआर (FIR) नोंदवण्यात आला. धर्मेंद्र रायला अटक करण्यात आली असून, पोलिसांनी बहीण आणि आई दोघांनाही वैद्यकीय उपचार पुरवल्याची पुष्टी केली आहे.

तक्रारदार महिलेने पोलिसांना सांगितले की, मालमत्तेच्या अधिकारावरून हा वाद सुरू झाला. तिने आपल्या भावाला मुखत्यारपत्र (Power of Attorney) देण्यास नकार दिला होता. तसेच, तिने एक मृत्यूपत्राचा (Will) मसुदाही त्याला पाठवला होता, ज्यामध्ये तिने आपला मालमत्तेतील वाटा तिच्या दोन मुलींना मिळावा असे नमूद केले होते. यानंतर धर्मेंद्र रायच्या वागण्यात बदल झाला आणि तो अचानक शत्रुत्व पत्करू लागला, असेही तिने सांगितले.

आता पोलीस वैद्यकीय दाव्यांची सत्यता पडताळून पाहत आहेत आणि कथितपणे वापरलेल्या औषधाचीही तपासणी करत आहेत. बाउन्सरच्या भूमिकेचीही चौकशी सुरू आहे. तक्रारदार महिला आणि त्यांची आई सध्या त्यांच्या घरी परतल्या असून, या प्रकरणाचा तपास पोलिसांच्या निगराणीखाली सुरू आहे.