Viral Video: पुण्यात भर पावसात तुटकी छत्री घेऊन ड्युटी, तरुणाने पोलिसाला अशी मदत केली की मनं जिंकली!

पुण्यात मुसळधार पाऊस पडत असताना, एक वाहतूक पोलीस तुटक्या छत्रीने आपलं कर्तव्य बजावत होते. कपिष माखिजा नावाच्या एका कंटेंट क्रिएटरने हे पाहिलं आणि त्याने त्या पोलिसाला आपली दुसरी छत्री दिली.

पुण्याच्या रस्त्यांवर धो धो पाऊस कोसळत होता. अशातच एक वाहतूक पोलीस तुटकी छत्री घेऊन वाहतूक नियंत्रणाचं काम करत होते आणि पावसात पूर्णपणे भिजत होते. हे दृश्य एका कारमधून जाणाऱ्या तरुणाने पाहिलं आणि त्याने जे केलं, त्यामुळे आता तो सगळ्यांची मनं जिंकत आहे. कपिष माखिजा असं या तरुणाचं नाव असून तो पुण्याचा एक कंटेंट क्रिएटर आहे. त्यानेच हा व्हिडिओ सोशल मीडियावर शेअर केला आहे.

व्हिडिओमध्ये दिसतंय की, पोलिसांची छत्री तुटलेली असूनही ते आपल्या जागेवरून न हलता गाड्यांना वाट दाखवत आहेत. रस्त्यावर पाणी साचलेलं असूनही ते आपलं कर्तव्य बजावत होते. हे पाहून कपिषला राहवलं नाही आणि त्याने गाडी थांबवली.

त्याने आपल्या गाडीतील एक जास्तीची छत्री काढली आणि तो त्या वाहतूक पोलिसांच्या दिशेने धावत गेला. सुरुवातीला त्या पोलीस कर्मचाऱ्याने छत्री घ्यायला थोडा संकोच केला आणि नकारही दिला. पण कपिषने त्यांना नम्रपणे आग्रह करत ती छत्री दिलीच. हा सगळा प्रसंग कॅमेऱ्यात कैद झाला आहे.

या घटनेचं कौतुक फक्त सोशल मीडियावरच नाही, तर तिथे उपस्थित असलेल्या लोकांनीही केलं. कपिष जेव्हा आपल्या गाडीकडे परत आला, तेव्हा ट्रॅफिकमध्ये थांबलेल्या अनेक लोकांनी टाळ्या वाजवून त्याच्या या कामाचं कौतुक केलं. यातून त्या तरुणाच्या चांगल्या वागणुकीसोबतच त्या पोलिसाच्या कर्तव्यनिष्ठेचंही कौतुक झालं.

व्हायरल व्हिडिओ पाहा

हा व्हिडिओ व्हायरल झाल्यापासून अनेकजण कपिषचं कौतुक करत आहेत. ऊन, वारा, पाऊस आणि प्रदूषण अशा कोणत्याही परिस्थितीत तासनतास बाहेर उभं राहून काम करणाऱ्या वाहतूक पोलिसांच्या कामाची दखल सहसा कोणी घेत नाही, पण कपिषने दाखवलेली ही माणुसकी खरंच कौतुकास्पद आहे, असं अनेकजण म्हणत आहेत.

या व्हिडिओने अनेकांना एक गोष्ट शिकवली आहे की, माणुसकी दाखवण्यासाठी किंवा मदत करण्यासाठी काहीतरी मोठंच करायला हवं असं नाही. कधीकधी शांतपणे आपलं काम करणाऱ्या व्यक्तीला पाहून, गरजेच्या वेळी केलेली छोटीशी मदतही खूप मोलाची ठरते.