Pune News : पुणेकरांनो लक्ष द्या! शुक्रवारी शाळांना अर्धा दिवस सुट्टी; भोसरीतील 6 हजार कंपन्या बंद, वाहतुकीत मोठे बदल

Pune Grand Challenge Tour : पुणे आणि पिंपरी-चिंचवडमध्ये शुक्रवारी होणाऱ्या 'पुणे ग्रँड चॅलेंज टूर' या आंतरराष्ट्रीय सायकल स्पर्धेमुळे मोठे बदल करण्यात आले आहेत. वाहतूक कोंडी टाळण्यासाठी भोसरी एमआयडीसीतील सुमारे 6 हजार कंपन्यांना सुट्टी जाहीर केली. 

पुणे : पुणे आणि पिंपरी-चिंचवड शहरात शुक्रवारी (दि. 23 जानेवारी) होणाऱ्या ‘पुणे ग्रँड चॅलेंज टूर’ या आंतरराष्ट्रीय सायकल स्पर्धेच्या पार्श्वभूमीवर प्रशासनाने महत्त्वाचे निर्णय घेतले आहेत. संभाव्य वाहतूक कोंडी टाळण्यासाठी भोसरी एमआयडीसीतील सुमारे 6 हजार कंपन्यांना सुट्टी जाहीर करण्यात आली असून, पुणे शहरातील शाळा दुपारी 12 नंतर बंद ठेवण्याचे आदेश देण्यात आले आहेत.

भोसरी एमआयडीसीतील 6 हजार कंपन्या राहणार बंद

ही सायकल शर्यत भोसरी एमआयडीसी पोलीस ठाण्याच्या हद्दीतील शाहूनगर, यशवंतनगर, टेल्को रोड आणि स्पाईन सिटी चौक या मार्गावरून जाणार आहे. या भागात वाहतुकीवर ताण येऊ नये, यासाठी पिंपरी-चिंचवड लघुउद्योग संघटनेने कंपन्यांना शुक्रवारी सुट्टी देण्याचे आवाहन केले आहे. संघटनेचे अध्यक्ष संदीप बेलसरे यांनी दिलेल्या माहितीनुसार, शुक्रवारी सुमारे 6 हजार लघु व मध्यम उद्योग बंद राहणार आहेत. तसेच, महावितरणने गुरुवारी नियोजित असलेले देखभाल-दुरुस्तीचे (लोडशेडिंग) काम शुक्रवारी हलवले आहे.

शाळांसाठी महत्त्वाचा आदेश

या स्पर्धेचा समारोप बालगंधर्व रंगमंदिर येथे होणार असल्याने पुणे शहरातील अनेक प्रमुख रस्त्यांवर वाहतूक बदल करण्यात येणार आहेत. विद्यार्थ्यांची व पालकांची गैरसोय टाळण्यासाठी जिल्हाधिकारी जितेंद्र डुडी यांनी आदेश जारी केले आहेत.

पुणे महानगरपालिका हद्दीतील सर्व सरकारी व खासगी शाळा शुक्रवारी दुपारी 12 वाजेपर्यंतच सुरू राहतील.

12 नंतर शाळांना सुट्टी देण्याचे स्पष्ट निर्देश देण्यात आले आहेत.

वाहतुकीत मोठे बदल; नागरिकांना सहकार्याचे आवाहन

ही आंतरराष्ट्रीय सायकल स्पर्धा 58 ते 75 किलोमीटरच्या मार्गावर पार पडणार असून बालेवाडी ते बालगंधर्व दरम्यानच्या प्रमुख चौकांमध्ये वाहतुकीत लक्षणीय बदल करण्यात आले आहेत. वाहतूक पोलिसांकडून नागरिक, पालक आणि वाहनचालकांना वाहतूक बदलांची पूर्वकल्पना घेऊन प्रशासनाला सहकार्य करण्याचे आवाहन करण्यात आले आहे.