Nepal Floods : नेपाळमधील प्रलयातून नागपूरचे पर्यटक सुखरूप परतले, सांगितला थरारक अनुभव

नेपाळमध्ये आलेल्या महापुरामुळे अडकलेले नागपूरचे सुमारे १०० पर्यटक सुखरूप घरी परतले आहेत. डोळ्यादेखत एक बस वाहून जाताना पाहिल्याचा थरारक अनुभव सांगताना, त्यांनी काठमांडूतून सुटका केल्याबद्दल मुख्यमंत्री देवेंद्र फडणवीस यांचे आभार मानले.

नागपूर : नेपाळमध्ये आलेल्या महापुराच्या विध्वंसातून नागपूरचे सुमारे १०० पर्यटक थोडक्यात बचावले आहेत. रविवारी हे सर्वजण सुखरूप घरी परतले असून, त्यांनी आपला थरारक अनुभव सांगितला आहे.

पर्यटकांनी सांगितला काळजाचा ठोका चुकवणारा अनुभव

यापैकीच एक प्रवासी, योगेश गवांदे यांनी सांगितलं की, "मुख्य पूर आमच्या ठिकाणापासून ५० किलोमीटर दूर आला होता, पण आम्ही नेपाळची राजधानी काठमांडूमध्ये अडकून पडलो होतो. आमचे मुख्यमंत्री देवेंद्र फडणवीस यांनी आम्हाला मदत केली आणि नेपाळमधून सुखरूप भारतात परत आणलं. परत येतानाचा अनुभव तर आणखी भयानक होता. आमच्या पाच बसेसपैकी एक बस डोळ्यादेखत पाण्यात वाहून गेली. तिथलं वातावरण खूपच खराब होतं आणि सतत पाऊस पडत होता," असं गवांदे यांनी एएनआयला सांगितलं.

दुसऱ्या एका वृद्ध महिला यात्रेकरूनेही मुख्यमंत्री देवेंद्र फडणवीस यांचे आभार मानले. त्या म्हणाल्या, "नेपाळमधील परिस्थिती इतकी बिकट झाली होती की, आम्ही घरी परतण्याची आशाच सोडून दिली होती. नागपूरला, आपल्या मुला-बाळांकडे परत येऊ शकू असं वाटतच नव्हतं. जेव्हा देवेंद्र फडणवीस यांची मदत आमच्यापर्यंत पोहोचायला लागली, तेव्हाच आम्हाला वाटलं की आपण परत जाऊ शकतो. आम्ही स्वतःच्या डोळ्यांनी पूर, पाणी आणि लोकांना वाहून जाताना पाहिलं. पण आम्ही सुरक्षित ठिकाणी असल्यामुळे वाचलो," असं त्यांनी एएनआयशी बोलताना सांगितलं.

नेपाळमध्ये पुन्हा पुराचा धोका, नवीन इशारा जारी

दरम्यान, नेपाळच्या राष्ट्रीय आपत्ती जोखीम निवारण आणि व्यवस्थापन प्राधिकरणाने (NDRRMA) एक नवीन धोक्याचा इशारा दिला आहे. भोटे कोशी नदीच्या पाण्याच्या प्रवाहात आणि आवाजात अचानक वाढ झाल्याची माहिती मिळाल्यानंतर हा इशारा देण्यात आला आहे. अधिकाऱ्यांनी नदीकिनारी राहणाऱ्या नागरिकांना आणि मदत पथकांना अत्यंत सावध राहण्यास सांगितलं आहे.

NDRRMA ने X वर (पूर्वीचे ट्विटर) पोस्ट केलेल्या माहितीनुसार, स्थानिक अधिकाऱ्यांकडून ही सूचना मिळाली आहे. २६ ऑगस्टच्या महापुरानंतर ज्या तीन जिल्ह्यांना मोठा फटका बसला होता, तिथेच हा नवीन इशारा देण्यात आला आहे. रसुवा नदीकिनारी असलेल्या वस्त्यांना, विशेषतः नेपाळ-चीन सीमेजवळील भागांना, पाण्याच्या पातळीवर लक्ष ठेवण्यास सांगण्यात आलं आहे. तसेच, नुवाकोट आणि धादिंगमधील आपत्कालीन सेवा आणि स्थानिक प्रशासनाला हाय अलर्टवर ठेवण्यात आलं आहे.

"रसुवा जिल्हा प्रशासनाला मिळालेल्या माहितीनुसार, भोटे कोशी नदीतील पुराचा प्रवाह वाढल्याचा आवाज ऐकू आला आहे. त्यामुळे रसुवा, नुवाकोट आणि धादिंगपर्यंतच्या नदीकिनारी असलेल्या भागांमध्ये सावधगिरी बाळगण्याची विनंती आहे. अधिक माहिती मिळताच आम्ही कळवू," असं NDRRMA ने आपल्या पोस्टमध्ये म्हटलं आहे.