Manali Zipline Accident : 30 फुटांवरुन पडलेली तरुणी नागपुरची, गंभीर जखमी झाल्याने उपचार सुरु

मनालीत झिपलाइन साहसांदरम्यान केबल तुटल्याने एक तरुणी ३० फूट उंचीवरून खाली पडली. या घटनेचे दृश्य कॅमेऱ्यात कैद झाले असून, सोशल मीडियावर व्हायरल झाले आहे. गंभीर जखमी झालेल्या तरुणीवर नागपूरच्या रुग्णालयात उपचार सुरू आहेत.

नागपूर - उन्हाळ्याच्या सुट्टीत मनालीला फिरायला आलेल्या कुटुंबाला धक्का बसला आहे. एक तरुणी झिपलाइन साहस करत असताना केबल तुटली. परिणामी, ती ३० फूट उंचीवरून खाली पडली. हे भयानक दृश्य कॅमेऱ्यात कैद झाले आहे. या घटनेत तरुणी गंभीर जखमी झाली असून, नागपूरच्या रुग्णालयात तिच्यावर उपचार सुरू आहेत. घटनेचा व्हिडिओ सोशल मीडियावर व्हायरल झाला असून, अंगावर काटा आणणारा आहे.

उन्हाळी सुट्टीनिमित्त नागपूरचे एक कुटुंब हिमाचल प्रदेशातील मनालीला फिरायला आले होते. नागपूरचे रहिवासी प्रफुल बजवे हे त्यांच्या पत्नी आणि मुलीसोबत फिरायला आले होते. या सहलीत त्यांची मुलगी तृषा बजवे हिने झिपलाइन साहस करण्याची इच्छा व्यक्त केली. तिच्या इच्छेनुसार पालकांनी होकार दिला आणि ती झिपलाइन साहसासाठी केबलवर चढली. मात्र, तिला घेऊन जात असताना केबलच्या मध्यावर पोहोचताच तिला लटकवणाऱ्या कडी तुटली आणि ती सुमारे ३० फूट उंचीवरून खाली पडली. गेल्या रविवारी ही घटना घडली असून, तिचा व्हिडिओ सोशल मीडियावर व्हायरल होत आहे.

निकिल सैनी यांनी हा व्हिडिओ ट्विटरवर पोस्ट केला असून, भारतात साहसी खेळ सुरक्षित नाहीत, असे म्हटले आहे. मनालीत एक तरुणी सुमारे ३० फूट उंचीवरून झिपलाइनवरून पडली आणि आता गंभीर जखमी झाली आहे. योग्य अनुभव नसलेले लोक अशा उपक्रमांची सुरुवात करतात आणि तपासणी करणारे कोणीही नसते. जीवघेणा अपघात झाल्यानंतरच कारवाई केली जाते, असेही त्यांनी म्हटले आहे. दोन लाखांहून अधिक लोकांनी हा व्हिडिओ पाहिला आहे.

३० फूट उंचीवरून पडल्याने तृषाच्या पायाला अनेक फ्रॅक्चर झाले आहेत. तिला प्रथम मनालीतील स्थानिक रुग्णालयात दाखल करण्यात आले आणि नंतर पुढील उपचारांसाठी चंदीगडच्या वैद्यकीय रुग्णालयात हलवण्यात आले. सध्या ती नागपूरच्या खासगी रुग्णालयात उपचार घेत आहे. तिथे डॉक्टर तिच्या प्रकृतीवर बारकाईने लक्ष ठेवून आहेत.

या घटनेसंदर्भात तृषाच्या कुटुंबीयांनी झिपलाइन साहस आयोजित करणाऱ्या कंपनीवर निष्काळजीपणाचा आरोप केला आहे. तिथे योग्य सुरक्षा उपाययोजना नव्हत्या आणि घटना घडल्यानंतरही आम्हाला योग्य मदत मिळाली नाही, अशी तक्रार कुटुंबीयांनी केली आहे.