Maharashtra Rain : महाराष्ट्रात पुन्हा मान्सून सक्रिय; अनेक जिल्ह्यांत पावसाची शक्यता, मुंबईसह कोकणाला जोरदार सरींचा इशारा

महाराष्ट्रात मान्सून पुन्हा सक्रिय झाला असून शनिवारी मुंबईसह कोकण, मराठवाडा आणि मध्य महाराष्ट्रातील अनेक भागांत पावसाची शक्यता आहे. उत्तर कोकणात मुसळधार पाऊस, तर घाट भागात जोरदार वाऱ्यासह पावसाचा अंदाज आहे.

मुंबई : महाराष्ट्रात मान्सून पुन्हा सक्रिय झाला असून राज्यातील अनेक भागांत पावसाने हजेरी लावली आहे. शनिवारीही राज्याच्या विविध भागांत पावसाचा जोर कायम राहण्याची शक्यता हवामान विभागाने व्यक्त केली आहे. मुंबई, ठाणे, पालघर, रायगडसह कोकणात मध्यम स्वरुपाच्या पावसाची शक्यता आहे. काही ठिकाणी मुसळधार सरींची शक्यता आहे. मराठवाड्यातील नांदेड, लातूर, बीड, जालना, परभणी, धाराशिव आणि हिंगोली जिल्ह्यांतही पावसाचा अंदाज वर्तवण्यात आला आहे.

मुंबईत ढगाळ वातावरण

भारतीय हवामान विभागाच्या अंदाजानुसार, मुंबई शहर आणि उपनगरात शनिवारी आकाश ढगाळ राहण्याची शक्यता आहे. शहरासह पालघर, ठाणे, रायगड आणि नवी मुंबई परिसरात अधूनमधून हलका ते मध्यम पाऊस पडू शकतो. काही ठिकाणी पावसाचा जोर वाढू शकतो.

मध्य महाराष्ट्रात १३ ऑगस्टपर्यंत पावसाचा अंदाज

मध्य महाराष्ट्रातील पुणे, नाशिक, कोल्हापूर, सोलापूर, अहिल्यानगर, जळगाव आणि धुळे या जिल्ह्यांमध्ये ९ ते १३ ऑगस्टदरम्यान पावसाच्या तुरळक सरी कोसळण्याची शक्यता आहे. घाट परिसरात पावसासोबत सोसाट्याचे वारे वाहण्याचा अंदाजही हवामान विभागाने व्यक्त केला आहे.

मराठवाड्यात अनेक ठिकाणी पावसाची हजेरी

शनिवारी मराठवाड्यातील अनेक जिल्ह्यांत पावसाची शक्यता आहे. नांदेड, लातूर, बीड, जालना, परभणी, धाराशिव आणि हिंगोली या जिल्ह्यांत अनेक ठिकाणी पाऊस पडू शकतो. काही ठिकाणी मेघगर्जनेसह विजांचा कडकडाट होण्याची शक्यता आहे. यामुळे नागरिकांनी खबरदारी घेण्याचे आवाहन करण्यात आले आहे.

उत्तर कोकणात मुसळधार पावसाचा इशारा

उत्तर कोकण आणि किनारपट्टीच्या भागात पुढील काही दिवस पावसाचा जोर कायम राहण्याची शक्यता आहे. काही ठिकाणी मुसळधार पाऊस पडण्याचा अंदाज आहे. तसेच मध्य महाराष्ट्रातील घाट भागात जोरदार पावसासह सोसाट्याचे वारे वाहू शकतात.