ओला-उबरला टक्कर! महाराष्ट्रात लवकरच सुरू होणार अॅप-आधारित सहकारी टॅक्सी सेवा

Sahakar Bharat Taxi : महाराष्ट्रात अॅप-आधारित सहकारी टॅक्सी सेवा सुरू करण्याच्या हालचालींना वेग आला आहे. मुख्यमंत्री देवेंद्र फडणवीस यांनी परिवहन विभागाला आवश्यक नियमावली तयार करण्याचे निर्देश दिले आहेत. 

Sahakar Bharat Taxi : ऑनलाइन कॅब आणि टॅक्सी सेवा आजच्या शहरी जीवनाचा अविभाज्य भाग बनल्या आहेत. दररोज लाखो नागरिक विविध मोबाईल अॅप्सच्या माध्यमातून प्रवासासाठी कॅब बुक करतात. याच पार्श्वभूमीवर महाराष्ट्रात आता अॅप-आधारित सहकारी टॅक्सी सेवा सुरू करण्याची तयारी सुरू झाली आहे. या नव्या उपक्रमामुळे चालकांना अधिक उत्पन्नाची संधी मिळणार असून प्रवाशांनाही स्वस्त आणि विश्वासार्ह सेवा मिळण्याची अपेक्षा आहे.

अॅप-आधारित सहकारी टॅक्सी सेवेला सरकारची गती

राज्यात सहकारी तत्त्वावर चालणारी अॅप-आधारित टॅक्सी सेवा सुरू करण्यासाठी राज्य सरकारने महत्त्वाचे पाऊल उचलले आहे. मुख्यमंत्री देवेंद्र फडणवीस यांनी परिवहन विभागाला या सेवेसाठी आवश्यक नियमावली तयार करण्याचे तसेच आवश्यक परवानग्या देण्याचे निर्देश दिले आहेत. त्यामुळे या प्रकल्पाला प्रशासकीय पातळीवर वेग मिळाला आहे.

'सहकार भारत टॅक्सी' योजनेचा आराखडा तयार

काही दिवसांपूर्वी 'सहकार भारत टॅक्सी को-ऑपरेटिव्ह लिमिटेड'च्या प्रतिनिधींसोबत महत्त्वाची बैठक पार पडली. या बैठकीत प्रस्तावित टॅक्सी सेवेचा संपूर्ण आराखडा, कार्यपद्धती आणि अंमलबजावणीबाबत सविस्तर चर्चा करण्यात आली. या सेवेच्या माध्यमातून खासगी अॅग्रीगेटर कंपन्यांवर अवलंबित्व कमी करण्याचा प्रयत्न केला जाणार आहे.

चालकांचे उत्पन्न वाढवण्यावर भर

'सहकार भारत टॅक्सी'चे प्रतिनिधी कर्नल हिमांशु यांनी या योजनेबाबत माहिती देताना सांगितले की, अनेक टॅक्सी चालकांचे उत्पन्न वाढावे आणि त्यांना त्यांच्या मेहनतीचा अधिक लाभ मिळावा, हा या उपक्रमामागील मुख्य उद्देश आहे. सध्याच्या अॅप-आधारित सेवांमध्ये चालकांना मोठ्या प्रमाणात कमिशन द्यावे लागते. मात्र, सहकारी मॉडेलमध्ये चालकांना थेट फायदा मिळण्याची शक्यता आहे.

मुंबईतून सुरुवात; पुणे आणि नागपूरमध्ये विस्तार

या नव्या सेवेची सुरुवात सर्वप्रथम मुंबईमध्ये केली जाणार आहे. त्यानंतर टप्प्याटप्प्याने पुणे आणि नागपूरसारख्या प्रमुख शहरांमध्ये या सेवेचा विस्तार करण्यात येणार आहे. राज्यातील वाढत्या शहरीकरणाच्या पार्श्वभूमीवर या सेवेला मोठा प्रतिसाद मिळू शकतो, असा विश्वास व्यक्त केला जात आहे.

प्रवाशांनाही मिळणार अधिक पर्याय

सहकारी टॅक्सी मॉडेलमुळे केवळ चालकांनाच नव्हे तर लाखो प्रवाशांनाही फायदा होणार आहे. स्पर्धात्मक दर, पारदर्शक सेवा आणि स्थानिक चालकांचा सहभाग यामुळे प्रवाशांना अधिक चांगले पर्याय उपलब्ध होण्याची अपेक्षा आहे. तसेच राज्यातील वाहतूक व्यवस्थेतही या नव्या प्रयोगामुळे सकारात्मक बदल घडू शकतो.