Khadki To Indore Special Train: पुणेकरांसाठी गूड न्यूज! खडकी-इंदूर स्पेशल ट्रेनच्या फेऱ्या वाढवल्या; उन्हाळी सुट्टीत प्रवाशांची चंगळ, पाहा नवे वेळापत्रक

Khadki To Indore Special Train: उन्हाळी सुट्ट्यांत गर्दी लक्षात घेत मध्य रेल्वेने खडकी ते इंदूर दरम्यान साप्ताहिक 'ट्रेन ऑन डिमांड' स्पेशल ट्रेनच्या फेऱ्या वाढवण्याचा निर्णय घेतला. या वाढीव फेऱ्या २ एप्रिल २०२६ ते ३० जुलै २०२६ पर्यंत सुरू राहणार आहे.

पुणेकरांसाठी गूड न्यूज! खडकी-इंदूर स्पेशल ट्रेनच्या फेऱ्या वाढवल्या

पुणे: उन्हाळी सुट्ट्यांच्या काळात प्रवाशांची होणारी तुफान गर्दी लक्षात घेऊन मध्य रेल्वेने एक अत्यंत महत्त्वाचा निर्णय घेतला आहे. पुण्यातील खडकी ते इंदूर दरम्यान धावणाऱ्या साप्ताहिक 'ट्रेन ऑन डिमांड' (TOD) स्पेशल ट्रेनच्या कालावधीत मोठी वाढ करण्यात आली आहे. यामुळे पर्यटनासाठी किंवा गावी जाणाऱ्या प्रवाशांचा प्रवास आता अधिक सुखकर होणार आहे. 

कसे असेल नवीन वेळापत्रक?

खडकी-इंदूर-खडकी ही विशेष गाडी पूर्वीच्याच थांब्यांवर आणि वेळेनुसार धावणार आहे. बदललेला कालावधी खालीलप्रमाणे आहे.

खडकी - इंदूर साप्ताहिक विशेष (गाडी क्र. ०९३२३): ही गाडी दर गुरुवारी धावते. पूर्वी ही सेवा २६ मार्च २०२६ पर्यंतच होती, मात्र आता ती वाढवून २ एप्रिल २०२६ ते ३० जुलै २०२६ पर्यंत करण्यात आली आहे.

इंदूर - खडकी साप्ताहिक विशेष (गाडी क्र. ०९३२४): परतीच्या प्रवासासाठी दर बुधवारी सुटणारी ही गाडी आता २९ जुलै २०२६ पर्यंत धावणार आहे. 

बुकिंग कधीपासून सुरू होणार?

प्रवाशांना नियोजित प्रवासासाठी आरक्षण (Reservation) करणे सोपे जावे यासाठी रेल्वेने तारखा जाहीर केल्या आहेत.

आरक्षण: गाडी क्रमांक ०९३२३ च्या वाढीव फेऱ्यांसाठी ३१ मार्च २०२६ पासून बुकिंग सुरू होईल.

कुठे कराल बुकिंग? प्रवासी सर्व अधिकृत संगणकीकृत PRS केंद्रांवरून किंवा IRCTC च्या अधिकृत वेबसाईटवरून तिकीट बुक करू शकतात.

अनारक्षित डबे (General Ticket): ज्यांना जनरल डब्यातून प्रवास करायचा आहे, ते UTS ॲप किंवा तिकीट खिडकीवरून तिकीट घेऊ शकतात. या गाड्यांसाठी सुपरफास्ट मेल किंवा एक्सप्रेसचे नेहमीचे शुल्क लागू असेल. 

का घेतला हा निर्णय?

मार्च ते जुलै या कालावधीत शाळा-कॉलेजला सुट्ट्या असल्याने इंदूर आणि मध्य प्रदेशच्या दिशेने जाणाऱ्या प्रवाशांची संख्या मोठी असते. नियमित गाड्यांमधील वेटिंग लिस्ट कमी करण्यासाठी आणि प्रवाशांना 'कन्फर्म' सीट मिळावी यासाठी रेल्वेने या 'स्पेशल' फेऱ्या वाढवल्या आहेत. 

उन्हाळी सुट्टीत इंदूरला जात असाल तर वाढीव फेऱ्या सुवर्णसंधी

जर तुम्ही उन्हाळी सुट्टीत इंदूरला जाण्याचा बेत आखत असाल, तर या वाढीव फेऱ्या तुमच्यासाठी सुवर्णसंधी आहेत. ३१ मार्चला सकाळीच आपले आरक्षण करून टाका!