Kolhapur Accident : कोल्हापुरात ST वर्कशॉपमध्ये भीषण अपघात, बसखाली चिरडून कर्मचाऱ्याचा मृत्यू; CCTV फुटेज समोर
सार
Kolhapur Bus Accident : कोल्हापूरमधील एसटी वर्कशॉपमध्ये एक दुर्दैवी घटना घडली. पांडुरंग आण्णाप्पा चव्हाण नावाच्या कर्मचाऱ्याचा बसखाली चिरडून मृत्यू झाला. दुरुस्तीसाठी बस पुढे घेत असताना हा अपघात झाला. या घटनेचं सीसीटीव्ही फुटेज समोर आलं असून पोलीस तपास करत आहेत.
कोल्हापूर : कोल्हापुरातून एक धक्कादायक बातमी समोर आली आहे. इथल्या सेंट्रल बस स्टँडजवळच्या एसटी महामंडळाच्या वर्कशॉपमध्ये एका कर्मचाऱ्याचा बसखाली चिरडून मृत्यू झाला. शनिवारी सकाळी ही दुर्दैवी घटना घडली. मृत कर्मचाऱ्याचं नाव पांडुरंग आण्णाप्पा चव्हाण असं आहे. ते मूळचे ड्रायव्हर होते, पण प्रकृतीच्या कारणामुळे त्यांना वर्कशॉपमध्ये काम देण्यात आलं होतं.
शाहूपुरी पोलिसांच्या हद्दीत सकाळी ११ वाजण्याच्या सुमारास हा अपघात झाला. पोलिसांनी दिलेल्या माहितीनुसार, सिकंदर मणेर नावाचे दुसरे एसटी ड्रायव्हर दुरुस्तीसाठी बस पुढे घेत होते. त्याचवेळी, चव्हाण रॅम्पवरचं आपलं काम संपवून परत येत होते. बस रॅम्पवरून पुढे जात असताना चव्हाण पुढच्या चाकाखाली आले आणि त्यात त्यांचा जागीच मृत्यू झाला.
हा प्रकार पाहताच वर्कशॉपमधील इतर कर्मचाऱ्यांनी आरडाओरडा केला, त्यानंतर मणेर यांनी बस थांबवली. पण तोपर्यंत चव्हाण यांचा मृत्यू झाला होता. घटनेची माहिती मिळताच शाहूपुरी पोलीस घटनास्थळी दाखल झाले. पोलिसांनी परिसराची पाहणी करून पंचनामा केला आणि बस ड्रायव्हरविरोधात गुन्हा दाखल करण्याची प्रक्रिया सुरू केली आहे.
ही संपूर्ण घटना वर्कशॉपमधील सीसीटीव्ही कॅमेऱ्यात कैद झाली आहे. पोलीस तपासाचा भाग म्हणून या व्हिडिओची पाहणी करत आहेत.
व्हायरल व्हिडिओ पाहा
Kolhapur - A 55-year-old sweeper was killed after being run over by a Maharashtra State Road Transport Corporation (MSRTC/ST) bus at the maintenance workshop near Kolhapur Central Bus Stand. Police are examining available CCTV footage from the workshop as part of the… pic.twitter.com/HZLNircWfY
— NextMinute News (@nextminutenews7) August 17, 2026
चव्हाण यांच्या मृत्यूमुळे त्यांचे कुटुंबीय आणि सहकाऱ्यांना मोठा धक्का बसला आहे. कोणतीही पूर्वसूचना न देता बस हलवण्यात आली, त्यामुळे हा अपघात टाळता आला असता, असं त्यांच्या सहकाऱ्यांचं म्हणणं आहे. चव्हाण यांच्या कुटुंबीयांना आर्थिक मदत मिळावी, अशी मागणीही कुटुंब आणि सहकाऱ्यांनी केली आहे.