Ration Card: रेशन कार्ड धारकांसाठी आनंदाची बातमी! केंद्र सरकारचा मोठा निर्णय; जूनपर्यंतचे धान्य आता मिळणार 'अॅडव्हान्स'मध्ये

Ration Card: केंद्र सरकारने ८० कोटींहून अधिक रेशन लाभार्थ्यांना मोठा दिलासा दिला आहे. सरकारी गोदामातील अतिरिक्त धान्य साठा आणि संभाव्य पुरवठा साखळीतील अडचणींमुळे, राज्यांना एप्रिल ते जून या तीन महिन्यांचे धान्य आगाऊ वाटप करण्याचे निर्देश दिले आहेत. 

रेशन कार्ड धारकांसाठी आनंदाची बातमी!

मुंबई: देशातील ८० कोटींहून अधिक रेशन लाभार्थ्यांसाठी केंद्र सरकारने एक महत्त्वाचा दिलासा दिला आहे. आगामी काळातील धान्याची साठवणूक आणि पुरवठा साखळीतील संभाव्य अडचणी लक्षात घेऊन, राज्य सरकारांना जून २०२६ पर्यंतचा धान्य साठा (तांदूळ आणि गहू) आगाऊ उचलून त्याचे त्वरित वाटप करण्याचे निर्देश देण्यात आले आहेत. 

नेमका निर्णय काय आहे?

केंद्र सरकारने सर्व राज्ये आणि केंद्रशासित प्रदेशांच्या अन्न सचिवांना पत्र लिहून 'मोफत धान्य वितरण योजने' अंतर्गत पुढील तीन महिन्यांचे रेशन (एप्रिल ते जून) लाभार्थ्यांना आगाऊ देण्यास सांगितले आहे. नॅशनल फूड सिक्युरिटी ॲक्ट (NFSA) अंतर्गत ही प्रक्रिया राबवली जाणार आहे. 

हा निर्णय का घेण्यात आला?

१. बंपर स्टॉक: सरकारी गोदामांमध्ये सध्या धान्याचा प्रचंड साठा उपलब्ध आहे. १ एप्रिलच्या आवश्यक 'बफर स्टॉक'पेक्षा हा साठा तब्बल १८५ टक्क्यांनी जास्त आहे.

२. जागेची उपलब्धता: लवकरच गव्हाचा नवा खरेदी हंगाम सुरू होत आहे. नवीन पिकासाठी गोदामांमध्ये जागा रिकामी करणे आवश्यक आहे.

३. जागतिक परिस्थिती: पश्चिम आशियातील युद्धजन्य परिस्थितीमुळे भविष्यात इंधन आणि वाहतुकीवर परिणाम होण्याची शक्यता आहे. त्यामुळे पुरवठा साखळीवर ताण येऊ नये, म्हणून हा सावधगिरीचा उपाय आहे. 

आकडेवारी काय सांगते?

सध्या भारतीय अन्न महामंडळाकडे (FCI) एकूण ६०.७ दशलक्ष टन धान्य साठा आहे.

तांदूळ: ३७.२ दशलक्ष टन

गहू: २३.५ दशलक्ष टन 

लाभार्थ्यांना काय फायदा होणार?

रेशन दुकानांवर वारंवार जाण्याची गरज उरणार नाही.

एकाच वेळी तीन महिन्यांचे धान्य मिळाल्याने कुटुंबांना मोठा आधार मिळेल.

खुल्या बाजारातही धान्याची टंचाई भासणार नाही, कारण सरकार 'ओपन मार्केट सेल स्कीम' (OMS) सुरूच ठेवत आहे.