Pune Nasarapur Crime : पुण्यातील भोर प्रकरणातील आरोपीबद्दल धक्कादायक माहिती समोर, आधीही केलेल्या भयावह कृत्याचा खुलासा

Pune Nasarapur Crime : पुणे जिल्ह्यातील भोर तालुक्यातील नसरापूर येथे 3.5 वर्षांच्या मुलीवर अत्याचार करून तिची हत्या केल्याची संतापजनक घटना घडली. 65 वर्षीय आरोपीला पोलिसांनी अल्पावधीत अटक केली. यानंतर आता आरोपीच्या जुन्या विकृत कृत्याबद्दल धक्कादायक माहिती समोर आली आहे.

Pune Nasarapur Crime : पुणे जिल्ह्यातील भोर तालुक्यातील नसरापूर गावात एका साडेतीन वर्षांच्या चिमुकलीवर अत्याचार करून तिची निर्घृण हत्या केल्याची धक्कादायक घटना समोर आली आहे. या घटनेमुळे संपूर्ण परिसर हादरला असून नागरिकांमध्ये संतापाची लाट उसळली आहे. पोलिसांनी तत्काळ कारवाई करत आरोपीला अटक केली आहे. अशातच आरोपीच्या जुन्या कृत्याबद्दल धक्कादायक माहिती समोर आली आहे. 

घटना कशी घडली?

मिळालेल्या माहितीनुसार, पीडित मुलगी उन्हाळ्याच्या सुट्टीत तिच्या आजीकडे आली होती. दुपारच्या सुमारास आरोपीने ‘वासरू दाखवतो’ असे आमिष दाखवून तिला जवळील गोठ्यात नेले. तेथे तिच्यावर अत्याचार करून तिची हत्या करण्यात आली. त्यानंतर आरोपीने मृतदेह लपवण्याचा प्रयत्न केला. मुलगी बेपत्ता झाल्यानंतर कुटुंबीयांनी शोध सुरू केला असता ती गोठ्यात मृत अवस्थेत आढळली.

पोलिसांची तात्काळ कारवाई

घटनेची माहिती मिळताच पोलिसांनी शोधमोहीम सुरू केली आणि अवघ्या दीड तासांत आरोपीला ताब्यात घेतले. पुणे ग्रामीणचे पोलीस अधीक्षक संदीपसिंग गिल यांनी सांगितले की, संध्याकाळी साडेपाचच्या सुमारास तक्रार मिळताच तातडीने कारवाई करण्यात आली. आरोपीला अटक करून पुढील तपास सुरू आहे.

आरोपीचा गुन्हेगारी इतिहास उघड

तपासादरम्यान आरोपीविरुद्ध यापूर्वीही गंभीर गुन्हे नोंद असल्याचे समोर आले आहे. 1998 मध्ये विनयभंगाचा गुन्हा, तर 2015 मध्ये पोक्सो अंतर्गत गुन्हा दाखल झाला होता. 2019 मध्ये त्याची सुटका झाली होती. आरोपी मजूर म्हणून काम करत असल्याची माहिती पोलिसांनी दिली आहे.

सीसीटीव्ही फुटेजमुळे प्रकरण उघड

परिसरातील सीसीटीव्ही फुटेज तपासल्यावर आरोपी चिमुरडीला गोठ्याकडे नेत असल्याचे दिसून आले. यावरून संशय बळावला आणि तपासाचा वेग वाढवण्यात आला. त्यानंतर संपूर्ण गुन्हा उघडकीस आला.

ग्रामस्थांचा संताप आणि मागण्या

या घटनेनंतर नसरापूर परिसरात संतापाची लाट उसळली आहे. ग्रामस्थांनी आरोपीला कठोर शिक्षा देण्याची मागणी केली असून प्रकरण फास्ट ट्रॅक कोर्टात चालवावे, अशी मागणी जोर धरत आहे.