Hair Care : शॅम्पूत फक्त 'ही' गोष्ट करा मिक्स; केसांना येईल चमक

शॅम्पूत दोन चमचे साखर घालणं ऐकायला विचित्र वाटेल, पण हा सोपा हेअरकेअर हॅक तुमच्या स्कॅल्पला एक्सफोलिएट करण्यास, केसांमधील घाण काढून टाकण्यास आणि केस अधिक स्वच्छ, मऊ आणि ताजेतवाने करण्यास मदत करू शकतो.

शॅम्पूमध्ये साखर का मिक्स करावी?

साखर एका नैसर्गिक 'एक्सफोलिएंट'प्रमाणे काम करते. सोप्या भाषेत सांगायचं तर, ती तुमच्या स्कॅल्पवरील मृत पेशी (dead skin) आणि घाण काढून टाकायला मदत करते. जेव्हा तुम्ही ती शॅम्पूत मिसळता, तेव्हा स्कॅल्पचं आरोग्य सुधारतं आणि तुमचे केस अधिक चमकदार दिसतात.

फायदे काय?

हे मिश्रण स्कॅल्पवरील मृत पेशी काढून टाकते आणि अतिरिक्त तेल नियंत्रित करते. तसेच, हेअर स्प्रे किंवा जेलचे केसांमध्ये राहिलेले कण खोलवर स्वच्छ करते. यामुळे तुमचे केस एकदम स्वच्छ आणि चमकदार दिसतात.

कसा करायचा वापर?

महत्त्वाचं: साखर थेट शॅम्पूच्या बाटलीत ओतू नका. नेहमीप्रमाणे हातावर शॅम्पू घ्या, त्यात एक ते दोन चमचे साखर घालून मिक्स करा. बोटांनी (नखं न लावता!) स्कॅल्पवर एक मिनिट हलक्या हाताने मसाज करा. केस पूर्णपणे स्वच्छ धुवा आणि नंतर केसांच्या मध्यापासून टोकांपर्यंत कंडिशनर लावा.

किती वेळा वापरावे?

ही एक स्क्रबिंग प्रक्रिया असल्याने, तुम्ही ती रोज करू नये. तुमचे केस तेलकट असल्यास, आठवड्यातून एकदा वापरणे ठीक आहे. पण केस कोरडे किंवा स्कॅल्प संवेदनशील असल्यास, १५ दिवसांतून एकदा किंवा महिन्यातून एकदाच हा उपाय करा.

या गोष्टीही ठेवा लक्षात

जर तुम्हाला खूप कोंडा झाला असेल, केसगळतीचा गंभीर त्रास असेल किंवा स्कॅल्पवर जखम वा जळजळ होत असेल, तर कृपया हा उपाय टाळा. अशा परिस्थितीत, त्वचा तज्ज्ञांचा (dermatologist) सल्ला घेणेच उत्तम. लक्षात ठेवा, हा एक घरगुती उपाय आहे, वैद्यकीय उपचार नाही.