Street Dogs Chasing Bike : रात्री बाईकच्या मागे कुत्री लागली तर काय करावं? टू-व्हीलर चालवताना या 4 चुका अजिबात करू नका

बाईक चालवताना भटकी कुत्री मागे लागणं ही काही नवीन गोष्ट नाही. पण कुत्री मागे लागल्यावर अनेक जण गाडीचा वेग वाढवतात किंवा त्यांना लाथ मारायला जातात आणि अपघात करून बसतात. अशा वेळी प्राणी मानसशास्त्रानुसार नेमकं काय करायला हवं?

अजिबात करू नका या चुका

रात्रीच्या वेळी किंवा निर्मनुष्य रस्त्यावरून बाईक किंवा स्कूटरवरून जाताना अचानक भटकी कुत्री भुंकत मागे लागतात. अशा वेळी अनेक जण घाबरून छोट्या-छोट्या चुका करतात. यामुळे गाडी घसरून हात-पाय मोडतात किंवा कधीकधी जीवावरही बेतू शकतं. कुत्री मागे लागल्यावर कोणत्या चुका टाळाव्यात आणि यातून कसं वाचावं?

गाडीचा वेग अचानक वाढवू नका (Do Not Speed Up)

कुत्री मागे लागल्या लागल्या अनेक जण घाबरून लगेच गाडीचा वेग वाढवतात. ही खूप मोठी चूक आहे! वेग वाढवल्यामुळे बाईक स्लिप होऊ शकते किंवा समोरून येणाऱ्या वाहनाला धडकू शकते. शिवाय, प्राणीशास्त्रानुसार तुम्ही जेवढ्या वेगाने जाल, तेवढी कुत्री तुम्हाला 'शिकार' (Chasing target) समजून अधिक आक्रमकपणे तुमचा पाठलाग करतात.

ओरडणे आणि सतत हॉर्न वाजवणे टाळा

कुत्र्यांना घाबरवण्यासाठी मोठ्याने ओरडणे किंवा सतत जोरात हॉर्न वाजवणे चुकीचे आहे. या भयंकर आवाजामुळे कुत्र्यांचा राग आणि अस्वस्थता आणखी वाढते. यामुळे ती घाबरून पळून जाण्याऐवजी अधिक चिडतात आणि हल्ला करण्याचा प्रयत्न करतात.

चालत्या गाडीवरून लाथ मारू नका

बाईक चालवताना कुत्र्याला लाथ मारण्याचा किंवा घाबरवण्याचा प्रयत्न अजिबात करू नका. असं केल्यास १००% गाडीचा बॅलन्स बिघडतो आणि तुम्ही खाली पडता. चालत्या गाडीवरून पडल्यामुळे गंभीर दुखापत होऊ शकते.

कुत्र्यांच्या डोळ्यात थेट पाहू नका (Avoid Direct Eye Contact)

प्राण्यांच्या मानसशास्त्रानुसार, कुत्र्यांच्या डोळ्यात थेट पाहणे हे त्यांच्यासाठी 'आव्हान' (Challenge) किंवा 'हल्ल्याचा संकेत' असतो. त्यामुळे कुत्री मागे लागल्यास त्यांच्याकडे न बघता तुमची नजर फक्त समोरच्या रस्त्यावर ठेवा.

कुत्र्यांपासून वाचण्याचा योग्य मार्ग कोणता?

गाडीचा वेग कमी करा (Slow Down) - कुत्री मागे लागल्यास घाबरून न जाता बाईकचा वेग हळूहळू कमी करा. तुम्ही वेग कमी केल्यावर कुत्र्यांचा पाठलाग करण्याचा रस संपतो आणि ती मागे फिरतात.

गरज पडल्यास गाडी थांबवा आणि शांत राहा - कुत्री खूपच जवळ आली, तर गाडी सुरक्षितपणे बाजूला थांबवा आणि शांत बसा. तुम्ही कोणतीही आक्रमक हालचाल केली नाही, तर ती १-२ वेळा भुंकून स्वतःहून निघून जातील.

लक्षात ठेवा - अशा वेळी न घाबरता 'संयम' बाळगणे हाच जीव वाचवण्याचा एकमेव मार्ग आहे.