Sheetala Ashtami 2026 : कधी आहे शीतला अष्टमी? जाणून घ्या योग्य तारीख, महत्त्व आणि शिळं अन्न खाण्यामागचं कारण

Sheetala Ashtami 2026 : शीतला अष्टमी हा हिंदू धर्मातील एक महत्त्वाचा सण आहे. या दिवशी शीतला देवीची विशेष पूजा केली जाते. असं केल्याने थंडीमुळे होणाऱ्या आजारांपासून मुक्ती मिळते, अशी श्रद्धा आहे. या दिवशी अनेक घरांमध्ये शिळं अन्न खाण्याची परंपरा आहे.

Sheetala Ashtami 2026 : हिंदू धर्मात अनेक देवी-देवतांची पूजा केली जाते. शीतला देवी ही त्यापैकीच एक आहे. तिला देवी पार्वतीचं रूप मानलं जातं. दरवर्षी चैत्र महिन्याच्या कृष्ण पक्षातील अष्टमी तिथीला शीतला देवीची पूजा केली जाते. यालाच शीतला अष्टमी म्हणतात. शीतला देवीच्या पूजेत थंड वस्तूंचाच वापर केला जातो, जसं की शिळं अन्न, थंड पाणी इत्यादी. चला तर मग जाणून घेऊया यावर्षी शीतला अष्टमी कधी आहे आणि त्याबद्दलच्या खास गोष्टी…

कधी आहे शीतला अष्टमी 2026?

पंचांगानुसार, यावर्षी चैत्र महिन्याच्या कृष्ण पक्षातील अष्टमी तिथी १० मार्च, मंगळवारी रात्री ०१ वाजून ५४ मिनिटांनी सुरू होईल आणि १२ मार्च, गुरुवारी पहाटे ०४ वाजून १९ मिनिटांपर्यंत राहील. अष्टमी तिथीचा सूर्योदय ११ मार्च रोजी होणार आहे आणि दिवसभर हीच तिथी राहील, त्यामुळे याच दिवशी शीतला अष्टमीचा सण साजरा केला जाईल. या दिवशी अनेक शुभ योगही जुळून येत आहेत, ज्यामुळे या सणाचं महत्त्व आणखी वाढेल.

शीतला अष्टमीला शिळं अन्न का खातात?

शीतला अष्टमीशी संबंधित अनेक श्रद्धा आणि परंपरा आहेत, ज्यामुळे हा सण आणखी खास बनतो. या दिवशी शिळं म्हणजे आदल्या दिवशी बनवलेलं अन्न खाल्लं जातं. अशी मान्यता आहे की, हिवाळा आणि उन्हाळ्याच्या संक्रमण काळात (संधीकाळात) थंडीमुळे होणाऱ्या आजारांचा धोका वाढतो. शीतला देवी या आजारांपासून आपलं रक्षण करते, असं मानलं जातं. तिला प्रसन्न करण्यासाठीच या दिवशी शिळं अन्न खाण्याची परंपरा सुरू झाली.

शीतला अष्टमीची कथा

शीतला माता व्रताशी संबंधित अनेक कथा प्रचलित आहेत. त्यापैकी एक कथा अशी आहे - 'एके काळी एका गावात एक म्हातारी बाई राहत होती. ती शीतला मातेची मोठी भक्त होती. प्रत्येक वर्षी शीतला अष्टमीला ती देवीची पूजा करायची आणि सर्व नियमांचं पालन करायची. गावात दुसरं कोणीही शीतला देवीची पूजा करत नव्हतं. एके दिवशी संपूर्ण गावात भीषण आग लागली, पण त्या म्हाताऱ्या बाईचं घर मात्र सुरक्षित राहिलं. लोकांनी जेव्हा याचं कारण विचारलं, तेव्हा तिने सांगितलं, 'मी शीतला मातेची भक्त आहे, त्यामुळे अग्नीसुद्धा माझं काही वाईट करू शकला नाही.' हे ऐकून गावातील सर्व लोक देवी शीतलाची पूजा करू लागले.

Disclaimer
या लेखात दिलेली माहिती ज्योतिषी आणि पंचांग अभ्यासकांनी सांगितलेल्या माहितीवर आधारित आहे. आम्ही फक्त ही माहिती तुमच्यापर्यंत पोहोचवण्याचं माध्यम आहोत.