Nita Ambani Look : साडी, गजरा आणि शाही नेकलेस; नीता अंबानींचा गणेशोत्सवात रॉयल अंदाज!

अंबानी कुटुंबाच्या गणपती सेलिब्रेशनमध्ये नीता अंबानी यांनी आपल्या रॉयल फेस्टिव्ह लुकने सर्वांचं लक्ष वेधून घेतलं. त्यांची व्हायब्रंट सिल्क साडी, स्टेटमेंट जडाऊ नेकलेस आणि पारंपरिक गजरा यामुळे त्यांच्या लुकमध्ये भारतीय सौंदर्य खुलून दिसत होतं.

नीता अंबानींचा लूक

गणेश चतुर्थीचा उत्सव सुरू होताच, सेलिब्रिटींच्या फेस्टिव्ह फॅशनची चर्चा पुन्हा एकदा सुरू होते. अँटिलियामध्ये झालेल्या अंबानी कुटुंबाच्या गणपती सेलिब्रेशनमध्ये नीता अंबानी आपल्या पारंपरिक पण तितक्याच सुंदर लुकमुळे उठून दिसत होत्या. त्यांच्या या लुकमध्ये क्लासिक भारतीय फॅशन आणि रॉयल टचचा सुंदर मिलाफ दिसला.

ऑरेज मजेंटा रंगातील साडी

या सणासाठी नीता अंबानी यांनी नारंगी आणि मजेंटा रंगाची व्हायब्रंट सिल्क साडी निवडली. या बोल्ड कलर कॉम्बिनेशनमुळे त्यांच्या लुकला एक सणाचा फील आला, तर रिच सिल्क फॅब्रिकमुळे तो अधिक आकर्षक दिसला. साडी पारंपरिक पद्धतीने नेसल्यामुळे भडक रंग असूनही लुक ग्रेसफुल वाटत होता.

स्टेटमेंट नेकलेसची चर्चा

नीता अंबानी यांच्या लुकमधला सर्वात मोठा हायलाइट होता तो म्हणजे त्यांचा खास स्टेटमेंट नेकलेस. जडाऊ डिझाइन असलेला हा मोठा नेकलेस गळ्याच्या खालीपर्यंत येत होता आणि त्यामुळे लुकला एक शाही टच मिळाला होता. इतका आकर्षक दागिना घातल्यामुळे, हा नेकलेसच त्यांच्या संपूर्ण लुकचा केंद्रबिंदू ठरला.

गजऱ्याने वेधले लक्ष

नीता अंबानी यांनी आपली हेअरस्टाईलही पारंपरिक ठेवली होती. त्यांनी लांब वेणी घालून त्यात गजरा माळला होता. या फुलांच्या गजऱ्यामुळे साडी आणि दागिन्यांचं सौंदर्य आणखी खुललं. सोबतच, एका छोट्या लाल टिकलीने त्यांचा लुक पूर्ण झाला. साडी, गजरा आणि पारंपरिक दागिन्यांमुळे त्यांचा लुक अस्सल भारतीय सणासुदीचा वाटत होता.

सणासुदीत कसं नटावं?

नीता अंबानी यांच्या गणपती लुकमधून एक सोपी फॅशन टीपही मिळते: जेव्हा तुमचा ड्रेस आधीच रिच आणि रंगीबेरंगी असेल, तेव्हा एकच स्टेटमेंट दागिना संपूर्ण लुकची शोभा वाढवू शकतो. त्यांच्या भव्य नेकलेसने, साध्या ॲक्सेसरीज आणि पारंपरिक स्टायलिंगसोबत मिळून, लुकला ओव्हर न करता त्यात भव्यता आणि सणाचा फील आणला.