Mountain Travel : डोंगरात फिरायला जाताय? कपड्यांआधी बॅगेत या ६ गोष्टी नक्की ठेवा, नाहीतर फसाल!

डोंगराळ भागात फिरायला जाताना फक्त जॅकेट आणि स्वेटर पुरेसे नाहीत. थंडी, जास्त उंची आणि अचानक बदलणारं हवामान यामुळे अनेकजण अडचणीत येतात, कारण त्यांच्या बॅगेत गरजेच्या वस्तू नसतात. ट्रॅव्हल एक्सपर्ट्सच्या मते, डोंगरात जाण्यापूर्वी बॅगेत ६ गोष्टी असायलाच हव्यात.

मुंबई : दार्जिलिंग, सिक्कीम की हिमाचल? कुठे जायचं हे फायनल झालंय? तिकीट काढलं, हॉटेल बुक झालं, सगळं ओके. आता फक्त बॅग भरायची बाकी आहे. आपण सहसा १० कपड्यांचे जोड आणि ५ चपलांचे जोड बॅगेत कोंबतो. पण डोंगरात ज्या ६ गोष्टी सर्वात जास्त गरजेच्या असतात, त्या आपण विसरून जातो आणि मग तिथे गेल्यावर पश्चात्ताप करतो.

डोंगर म्हणजे सपाट मैदान नाही. तिथे एका तासात हवामान बदलतं. त्यामुळे बॅग भरताना थोडं स्मार्ट बना.

१. चांगल्या क्वालिटीचा रेनकोट किंवा पोंचो - छत्री नकोच

डोंगराळ भागात वाऱ्यामुळे छत्री काहीच कामाला येत नाही, ती लगेच उलटते आणि तुमचा एक हात अडकून राहतो. त्याऐवजी एक हलका, पातळ रेनकोट किंवा पोंचो बॅगेत वरच्या बाजूला ठेवा. याची किंमत साधारण ३०० रुपये असेल, पण तो तुमची पूर्ण ट्रिप वाचवेल. ट्रेकिंगला जाणार असाल तर हे सोबत असलंच पाहिजे.

२. पॉवर बँक आणि टॉर्च

डोंगराळ भागात लाईट जाणं ही खूप सामान्य गोष्ट आहे. त्यात थंडीमुळे मोबाईलची बॅटरी ५०% जास्त लवकर संपते. त्यामुळे २००००mAh क्षमतेची एक पॉवर बँक आणि एक छोटा टॉर्च किंवा हेडलॅम्प सोबत नक्की घ्या. रात्री हॉटेलमध्ये लाईट गेली किंवा जंगलात फिरायला जायचं असेल, तर याच गोष्टी तुमच्या कामी येतील.

३. औषधांचं छोटं किट

ही सर्वात महत्त्वाची गोष्ट आहे.

- Diamox किंवा Coca 30 - जास्त उंचीमुळे होणाऱ्या डोकेदुखीसाठी (डॉक्टरांच्या सल्ल्यानेच घ्या)

- Vicks, कापूर, इनहेलर

- ताप, उलटी, पोटदुखी, डोकेदुखीची औषधं

- बँडेज, कापूस

लक्षात ठेवा, डोंगराळ भागात मेडिकल दुकान शोधणं खूप अवघड असतं.

४. चांगली ग्रीप असलेले शूज - फॅशन नाही, सेफ्टी महत्त्वाची

डोंगरात फिरायला जाताना स्नीकर्स किंवा हिल्स घालून चालणार नाही. थोडे उंच, वॉटरप्रूफ आणि चांगली ग्रीप असलेले ट्रेकिंग शूज किंवा स्पोर्ट्स शूज घ्या. एकदा पाय घसरला की सगळी ट्रिप तिथेच संपेल. सोबत ३-४ जाड मोज्यांच्या जोड्या घ्यायला विसरू नका.

५. ORS, ड्राय फ्रुट्स आणि कापूर

डोंगरावर चढताना शरीरातील पाणी कमी होतं, ज्याला डिहायड्रेशन म्हणतात. त्यामुळे बॅगेत नेहमी पाण्याची बाटली आणि २ ORS पाकिटं ठेवा. सोबत काही चॉकलेट, बदाम, खजूर ठेवा. एनर्जी कमी झाल्यावर हे त्वरित उपयोगी पडेल. गाडीत उलटीचा त्रास होत असेल, तर कापूर किंवा लिंबाचा वास घेतल्यास आराम मिळतो.

६. कागदपत्रांच्या झेरॉक्स कॉपी आणि रोख रक्कम

डोंगराळ भागात नेटवर्कची समस्या असते, त्यामुळे UPI पेमेंट चालत नाही. म्हणून काही रोख रक्कम सोबत नक्की ठेवा. सोबत आधार कार्ड, मतदार ओळखपत्राची झेरॉक्स आणि २ पासपोर्ट साईज फोटो ठेवा. अनेक ठिकाणी परवानगीसाठी यांची गरज लागते.

बॅगेत एका छोट्या प्लास्टिकच्या पिशवीत मीठ ठेवा. जळू लागल्यास ती काढायला याचा खूप उपयोग होतो.

कपडे तुम्ही कुठेही खरेदी करू शकता, पण गरजेच्या वेळी या ६ वस्तू तुम्हाला कोणीही देणार नाही. त्यामुळे फॅशनपेक्षा सुरक्षेला प्राधान्य द्या आणि मगच डोंगराच्या सौंदर्याचा आनंद घ्या.