Maruti SUVs: मारुती सुझुकीचा SUV धमाका; बाजारात येणार नव्या गाड्यांची फौज
सार
पुढच्या तीन वर्षांत मारुती सुझुकी भारतीय बाजारात तब्बल नऊ नव्या गाड्या आणणार आहे, ज्यात सात SUV असतील. ब्रेझा फेसलिफ्ट, फ्रॉन्क्स हायब्रीड आणि टाटा पंचला टक्कर देण्यासाठी एक नवी मायक्रो-एसयूव्ही या गाड्या कंपनीच्या या मोठ्या योजनेचा भाग आहेत.
भारतीय SUV बाजारात आपली पकड आणखी मजबूत करण्याच्या तयारीत मारुती सुझुकी आहे. कंपनी पुढच्या तीन वर्षांत नऊ नवीन मॉडेल्स लाँच करण्याची योजना आखत आहे. रिपोर्ट्सनुसार, यात सात SUV गाड्या असतील. ब्रेझा फेसलिफ्ट, फ्रॉन्क्स फेसलिफ्ट, तीन-रो सीटिंग असलेली प्रीमियम एसयूव्ही आणि एक नवीन मायक्रो-एसयूव्ही या प्रमुख गाड्या असणार आहेत.
नवी ब्रेझा फेसलिफ्ट
लोकप्रिय सब-कॉम्पॅक्ट एसयूव्ही ब्रेझाचं नवीन व्हर्जन लवकरच बाजारात येणार आहे. यात थोडे डिझाइन बदल आणि अधिक आधुनिक फीचर्स मिळतील असं समजतंय. फ्रॉन्क्समध्ये वापरलेलं 1.0-लिटर टर्बो बूस्टरजेट पेट्रोल इंजिन नव्या ब्रेझामध्येही दिलं जाऊ शकतं. हे इंजिन 100 BHP पॉवर आणि 148 Nm टॉर्क जनरेट करतं. यासोबत 6-स्पीड मॅन्युअल गिअरबॉक्स मिळण्याची शक्यता आहे. विशेष म्हणजे, ब्रेझामध्ये पहिल्यांदाच ॲडव्हान्स्ड ड्रायव्हर असिस्टन्स सिस्टीम (ADAS) फीचर दिलं जाऊ शकतं, अशीही चर्चा आहे.
फ्रॉन्क्सला मिळणार हायब्रीड अपडेट
मारुतीची सर्वाधिक विकली जाणारी कॉम्पॅक्ट क्रॉसओव्हर फ्रॉन्क्सला 2027 मध्ये मिड-लाइफ फेसलिफ्ट मिळण्याची शक्यता आहे. गाडीच्या बाहेरील लूकमध्ये आणि इंटिरियरमध्ये किरकोळ बदल अपेक्षित आहेत, पण सर्वात मोठं आकर्षण असेल ते म्हणजे कंपनीने स्वतः तयार केलेलं स्ट्रॉंग हायब्रीड तंत्रज्ञान. या हायब्रीड व्हर्जनमध्ये 35 किलोमीटर प्रति लिटरपेक्षा जास्त मायलेज मिळेल, असं रिपोर्ट्समध्ये म्हटलं आहे. टोयोटाच्या ॲटकिन्सन सायकल हायब्रीड तंत्रज्ञानापेक्षा मारुतीचं स्वतःचं हायब्रीड तंत्रज्ञान कमी खर्चिक आणि अधिक कार्यक्षम असेल, असा अंदाज वर्तवला जात आहे.
टाटा पंचला टक्कर देण्यासाठी नवा भिडू
Y43 या कोडनेमने विकसित केली जाणारी मारुतीची नवीन मायक्रो-एसयूव्ही, बंद झालेल्या इग्निसची जागा घेईल. ही गाडी 2027 पर्यंत लाँच होण्याची शक्यता आहे. टाटा पंच आणि ह्युंदाई एक्सटर या गाड्या तिचे मुख्य स्पर्धक असतील.
ही गाडी माइल्ड-हायब्रीड पेट्रोल, सीएनजी, इलेक्ट्रिक, सीबीजी आणि स्ट्रॉंग-हायब्रीड पॉवरट्रेन अशा विविध इंजिन पर्यायांसह सादर केली जाईल, असं समजतंय. या माध्यमातून विविध प्रकारच्या ग्राहकांना आकर्षित करण्याचा मारुतीचा प्रयत्न असेल.
अधिकृत घोषणेची प्रतीक्षा
या नवीन एसयूव्हीच्या लाँचची तारीख, किंमत आणि फीचर्सबद्दल मारुती सुझुकीने अद्याप कोणतीही अधिकृत माहिती दिलेली नाही. मात्र, वाहन बाजारातील तज्ज्ञांच्या मते, ही नवीन मॉडेल्स पुढच्या तीन वर्षांत भारतीय एसयूव्ही बाजारातील स्पर्धा आणखी तीव्र करतील.