Scorpio N Update : महिंद्रा स्कॉर्पिओ-N आणखी हायटेक, ३.८० लाख ग्राहक, नवीन काय?

महिंद्राने आपल्या लोकप्रिय स्कॉर्पिओ-एन SUV मध्ये मोठे बदल केले आहेत. आता यात पॅनोरॅमिक सनरूफ, 540-डिग्री कॅमेरा आणि नवीन टचस्क्रीनसारखे हायटेक फीचर्स मिळणार आहेत.

मुंबई  : भारतातल्या दमदार आणि परवडणाऱ्या गाड्यांमध्ये महिंद्रा स्कॉर्पिओचं नाव आवर्जून घेतलं जातं. महिंद्रा नेहमीच आपल्या गाड्यांमध्ये नवीन स्टाईल, पॉवरफुल इंजिन आणि आकर्षक डिझाइन देत आली आहे. याच जोरावर कंपनी भारतीय आणि परदेशी बाजारपेठेत आपला विस्तार करत आहे. आता महिंद्राने आपल्या लोकप्रिय स्कॉर्पिओ-एन (Scorpio-N) मॉडेलला एक महत्त्वाचं अपडेट दिलं आहे. या SUV मध्ये अनेक नवीन आणि अत्याधुनिक सुविधा जोडण्यात आल्या आहेत.

काय आहेत नवीन फीचर्स?

• मोठा पॅनोरॅमिक सनरूफ: यामुळे गाडीच्या आत अधिक मोकळेपणा आणि प्रशस्तपणा जाणवेल.
• 540-डिग्री सराऊंड व्ह्यू सिस्टीम आणि ब्लाइंड व्ह्यू मॉनिटर: गाडीच्या आजूबाजूचा आणि ड्रायव्हरला न दिसणारा भागही स्क्रीनवर दिसेल. सुरक्षित आणि सोप्या ड्रायव्हिंगसाठी ही एक अत्याधुनिक कॅमेरा टेक्नॉलॉजी आहे.
• नवीन R18 डायमंड कट अलॉय व्हील्स: यामुळे गाडीच्या दमदार आणि आकर्षक डिझाइनला आणखी शोभा येईल.
• 31.24 सेमी फ्लोटिंग एचडी टचस्क्रीन इन्फोटेनमेंट सिस्टीम: यासोबतच अपडेटेड डॅशबोर्डमध्ये सहा फिजिकल बटन्सही देण्यात आले आहेत.
• 26.03 सेमी एचडी डिजिटल इन्स्ट्रुमेंट क्लस्टर: यात नॉर्मल, इन्फॉर्मेटिव्ह आणि मिनिमल असे तीन डिस्प्ले मोड मिळतील.
• 65W यूएसबी टाइप-सी फास्ट चार्जिंग पोर्ट: पुढच्या सीटवर बसलेल्या प्रवाशांसाठी ही सुविधा आहे.
• अ‍ॅडव्हेंचर स्टॅटिस्टिक्स: हे फीचर इंजिनची कामगिरी, रोल आणि पिच, कंपास, अल्टिमीटर, जी-फोर्स यांसारखी गाडीची महत्त्वाची माहिती दाखवते.

3.80 लाखांहून अधिक विक्रीचा विक्रम

महिंद्रा स्कॉर्पिओ-एन 2022 मध्ये पहिल्यांदा लाँच झाली होती. हा स्कॉर्पिओचा नवीन अवतार होता. लाँच झाल्यापासून आतापर्यंत तब्बल 3.80 लाख ग्राहकांनी ही गाडी खरेदी केली आहे.

महिंद्रा स्कॉर्पिओ-एनची किंमत 13.69 लाख रुपयांपासून सुरू होऊन 25.49 लाख रुपयांपर्यंत (एक्स-शोरूम) जाते. ही गाडी पेट्रोल आणि डिझेल या दोन्ही व्हेरिएंटमध्ये उपलब्ध आहे.

महिंद्राने 2024 मध्ये Z8 सिलेक्ट आणि 2025 मध्ये Z8T मॉडेल सादर केले होते. त्यानंतर लेव्हल-2 ADAS (Advanced Driver Assistance Systems) सारखी अत्याधुनिक सुरक्षा प्रणाली जोडून गाडीला आणखी आधुनिक बनवले आहे. डिझाइन, दमदार कामगिरी आणि अत्याधुनिक तंत्रज्ञानामुळे स्कॉर्पिओ-एनने आपल्या सेगमेंटमध्ये एक नवीन ओळख निर्माण केली आहे. या SUV मध्ये G20 TGDI एमस्टॅलियन (पेट्रोल) आणि D22 एमहॉक (डिझेल) इंजिनचे पर्याय आहेत. तसेच ही गाडी रिअर-व्हील ड्राइव्ह (RWD) आणि फोर-व्हील ड्राइव्ह (4WD) पर्यायांमध्येही उपलब्ध आहे.

याशिवाय, गाडीत लेव्हल-2 ADAS, 12-स्पीकर सोनी ऑडिओ सिस्टीम, व्हेंटिलेटेड सीट्स, ऑटो-डिमिंग आयआरव्हीएम, 6-वे पॉवर्ड ड्रायव्हर सीट, लेदर सीट्स आणि इलेक्ट्रॉनिक पार्किंग ब्रेक यांसारख्या अनेक अतिरिक्त सुविधाही देण्यात आल्या आहेत.