Jeans Care Tips : रंग न जाता आणि न फाटता जीन्स वर्षानुवर्षे टिकवायचीय? या ट्रिक्स नक्की वापरा

तुमची आवडती जीन्स लवकर जुनी होतेय का? ती वारंवार धुणे टाळण्यापासून ते योग्य पद्धतीने वाळवण्यापर्यंत, जीन्स वर्षानुवर्षे नवीनसारखी टिकवून ठेवण्याच्या काही सोप्या आणि भन्नाट टिप्स…

जीन्सची काळजी घेणे

ऑफिस, कॉलेज किंवा मित्रांसोबतची ट्रिप असो, जीन्स ही प्रत्येकाची पहिली पसंती असते. पण आवडीने घेतलेली जीन्स काही महिन्यांतच रंग उडून जुनी दिसते. जीन्सची काळजी घेणे हे काही रॉकेट सायन्स नाही. ती धुण्याच्या आणि वाळवण्याच्या पद्धतीत थोडे बदल केले, तर ती वर्षानुवर्षे टिकते.

प्रत्येक वापरानंतर जीन्स वॉशिंग मशीनमध्ये टाकण्याची अजिबात गरज नाही. घाम, दुर्गंधी किंवा जास्त घाण असेल तरच ती पूर्ण धुवा. एरवी ती हवेशीर ठिकाणी वाळवली तरी चालते. एखादा डाग लागल्यास फक्त तोच भाग ओल्या कापडाने हलक्या हाताने पुसून काढा.

मशीनममध्ये टाकताना जीन्स उलटी करा

डाग काढण्यासाठी तुम्ही कडक ब्रशने जीन्स घासली, तर तिथला रंग नक्कीच उडेल. त्यामुळे डाग काढताना नेहमी हलक्या हातानेच काम करा. रोज एकच जीन्स वापरण्याऐवजी दुसरी जीन्स आलटून-पालटून वापरल्यास ती लवकर खराब होत नाही.

मशीनमध्ये टाकण्यापूर्वी जीन्स उलटी करणे ही सर्वात महत्त्वाची पायरी आहे. तिची चेन आणि बटणे व्यवस्थित लावून धुतल्यास, ती इतर कपड्यांना घासून फाटणार नाही. जीन्ससोबत जड कपडे किंवा चेन असलेले इतर कपडे धुतल्यास घर्षण वाढते, हे नेहमी लक्षात ठेवा.

वाळवण्याची पद्धत

गरम पाण्याऐवजी थंड पाण्याचा वापर केल्यास डेनिमचे कापड आकसणार नाही आणि रंगही जाणार नाही. जास्त डिटर्जंट किंवा कडक ब्लीच वापरणे टाळा आणि सौम्य साबणच वापरा. जीन्स जास्त वेळ पाण्यात भिजवून ठेवल्याने आणि मशीनमध्ये वेगात फिरवल्याने तिचे आयुष्य कमी होते.

नवीन जीन्सचा रंग जाऊ नये म्हणून ती व्हिनेगर किंवा मिठाच्या पाण्यात भिजवण्याची अनेकांना सवय असते. पण हा उपाय सर्वच डेनिमवर काम करेल याचा कोणताही पुरावा नाही. रंग जाण्याची शक्यता असल्यास, सुरुवातीचे काही वेळा ती हलक्या रंगाच्या कपड्यांपासून वेगळी धुवा.

वाळवण्याची पद्धतही महत्त्वाची

मशीनमधील ड्रायर जास्त उष्णता देतो, त्यामुळे जीन्ससाठी त्याचा वापर टाळा. जास्तीचे पाणी हलक्या हाताने पिळून काढा आणि जीन्स थेट उन्हात न वाळवता सावलीत हवेशीर ठिकाणी वाळवा. उन्हात वाळवल्यास काळ्या आणि गडद निळ्या रंगाची जीन्स लवकर फिकी पडते. पूर्ण वाळल्यानंतरच ती घडी करून कपाटात ठेवा. ओलसर असतानाच कपाटात ठेवल्यास तिला दुर्गंधी येऊ लागते. इस्त्री करताना जास्त उष्णता टाळा आणि लेबलवरील सूचनेनुसार योग्य तापमान ठेवा.

थोडीशी काळजी घेणं गरजेचं

जीन्सच्या गुडघ्यांवर, खिशांवर आणि मांड्यांच्या भागावर जास्त झीज झाली आहे का, याकडे नेहमी लक्ष ठेवा. थोडी जरी शिलाई उसवली असेल, तर ती लगेच शिवून घ्या. यामुळे जीन्स जास्त फाटण्यापासून वाचेल. महागडे प्रॉडक्ट्स न वापरता, या छोट्या-छोट्या गोष्टींची काळजी घेतली, तर तुमची जीन्स दीर्घकाळ अगदी नवीनसारखीच राहील.