Hair Care : हेल्दी आणि लांबसडक केसांसाठी या पद्धतीने लावा नारळाचे तेल

नारळाचे तेल योग्य पद्धतीने आणि नियमित वापरल्यास केसांना खोलवर पोषण मिळते. कोमट तेलाने मसाज, नैसर्गिक घटकांची मिसळ आणि योग्य केसधुण्याची सवय ठेवल्यास केस लांबसडक, मजबूत आणि निरोगी राहू शकतात. 

Hair Care : दाट, लांबसडक आणि निरोगी केस हे प्रत्येकाचं स्वप्न असतं. मात्र प्रदूषण, ताणतणाव, चुकीचा आहार आणि केमिकलयुक्त प्रॉडक्ट्समुळे केस कोरडे, निस्तेज आणि गळणारे होतात. अशा वेळी घरगुती आणि नैसर्गिक उपाय सर्वाधिक प्रभावी ठरतात. त्यातील सर्वात जुना, सोपा आणि खात्रीशीर उपाय म्हणजे नारळाचे तेल. मात्र केवळ तेल लावणं पुरेसं नसून, योग्य पद्धतीने तेल लावल्यासच केसांना खरा फायदा मिळतो.

नारळाचे तेल केसांसाठी का फायदेशीर आहे?

नारळाच्या तेलात फॅटी अ‍ॅसिड्स, व्हिटॅमिन E आणि अँटी-बॅक्टेरियल गुणधर्म असतात. हे तेल केसांच्या मुळांपर्यंत खोलवर पोहोचते आणि केसांना आतून पोषण देते. नियमित वापरामुळे केस गळती कमी होते, कोंडा दूर राहतो आणि केस अधिक मजबूत बनतात. तसेच केस तुटणे, दोन्ही टोकं फुटणे (split ends) यांसारख्या समस्या कमी होतात.

कोमट नारळाचे तेल – योग्य पद्धतीने कसं लावाल?

नारळाचे तेल थोडंसं कोमट करून घेतल्यास ते अधिक परिणामकारक ठरतं. बोटांच्या टोकांनी हलक्या हाताने स्काल्पवर मसाज करा. हा मसाज किमान 10 ते 15 मिनिटे करावा. यामुळे डोक्यातील रक्ताभिसरण सुधारते आणि केसांच्या मुळांना अधिक पोषण मिळते. तेल लावल्यानंतर किमान 1 ते 2 तास किंवा शक्य असल्यास रात्रभर ठेवा.

नारळाच्या तेलात मिसळा नैसर्गिक घटक

नारळाच्या तेलाचा प्रभाव वाढवण्यासाठी त्यात काही नैसर्गिक घटक मिसळू शकता. केसगळतीसाठी तेलात थोडेसे कढीपत्ता किंवा मेथी दाणे उकळून घ्या. केसांची वाढ जलद होण्यासाठी नारळाच्या तेलात कांद्याचा रस किंवा आवळ्याची पूड मिसळू शकता. आठवड्यातून एकदा अशा प्रकारे तेल लावल्यास केस लवकर लांब आणि दाट होण्यास मदत होते.

केस धुण्याची योग्य पद्धतही महत्त्वाची

तेल लावल्यानंतर केस फार गरम पाण्याने धुणे टाळा. कोमट किंवा साध्या पाण्याचा वापर करा. सल्फेट-फ्री शॅम्पू वापरल्यास केसांची नैसर्गिक आर्द्रता टिकून राहते. आठवड्यातून 2 ते 3 वेळाच केस धुवावेत. जास्त वेळा केस धुतल्यास केस कोरडे होतात आणि तेलाचा फायदा कमी होतो.