Healthy Paratha : पराठे बनवताना तूप, बटर की तेल... आरोग्यासाठी काय आहे बेस्ट?

आजकाल मुलांचा डबा असो किंवा सकाळचा नाश्ता, गरमागरम पराठे हा एक उत्तम पर्याय बनला आहे. पण पराठे भाजताना नक्की काय वापरायचं, असा प्रश्न अनेकांना पडतो.

पराठ्यांसाठी साजूक तूप वापरावं का?

अनेक घरांमध्ये लोक पराठे भाजण्यासाठी साजूक तूप वापरतात. तुपामुळे पराठ्यांना छान चव आणि कुरकुरीतपणा येतो. तुपात ए, डी, ई आणि के ही जीवनसत्त्वे असतात. तसेच यातील ब्युटीरेट आतड्यांच्या आरोग्यासाठी फायदेशीर ठरते. तुपाचा स्मोकिंग पॉईंट जास्त असल्याने ते स्वयंपाकासाठी उत्तम मानले जाते. पण यात सॅच्युरेटेड फॅट जास्त असते. त्यामुळे कोलेस्ट्रॉलची समस्या असलेल्यांनी तूप जपूनच खावे. गरज वाटल्यास डॉक्टरांचा सल्ला नक्की घ्या.

पराठ्यांसाठी तेल कसं वापरायचं?

पराठे बनवण्यासाठी तुम्ही तेलही वापरू शकता. पण रोज रिफाइंड तेल वापरण्याऐवजी अनसॅच्युरेटेड फॅट असलेले तेल निवडा. तुम्ही मोहरी, सोयाबीन, ऑलिव्ह किंवा कॅनोला तेल वापरू शकता. लक्षात ठेवा, तेलातही कॅलरीज जास्त असतात. त्यामुळे तेल कितीही हेल्दी असले तरी त्याचा अतिवापर टाळा. पराठ्याला थोडेसे तेल लावून भाजणे हा एक चांगला पर्याय आहे.

पराठ्यांसोबत बटर

पराठ्याला बटर लावले की त्याची चव आणखी वाढते. बटरमध्ये काही जीवनसत्त्वे आणि शॉर्ट चेन फॅटी ॲसिड्स असतात, जे एनर्जी मेटाबॉलिझमला मदत करतात. पण बटरमध्येही सॅच्युरेटेड फॅटचे प्रमाण जास्त असते. त्यामुळे रोज बटर लावून पराठे खाणे टाळा. कधीतरी चवीसाठी तुम्ही थोडे बटर नक्कीच वापरू शकता, पण प्रमाणावर नियंत्रण ठेवा.

आरोग्यासाठी बेस्ट काय?

पराठे बनवण्यासाठी तूप किंवा तेल हे दोन्ही चांगले पर्याय आहेत. पण तुम्ही काहीही वापरले तरी त्याचे प्रमाण कमी ठेवणे महत्त्वाचे आहे. जर तुमचे कोलेस्ट्रॉल वाढले असेल, तर सॅच्युरेटेड फॅट असलेले तूप आणि बटर जास्त वापरू नका. तेलाचाही अतिवापर टाळा. जर तुम्ही कधीतरीच पराठे खात असाल, तर चवीसाठी थोडे बटर नक्कीच चालेल. पण रोज पराठे खाण्याची सवय असेल, तर कमी तेलात किंवा तुपात ते भाजणे आरोग्यासाठी उत्तम ठरते.